په کابل کې د یو خصوصي شرکت مسوولان وايي، چې د یوه معتبر هندي شرکت د څانګې په پرانیستل کېدو سره له هند نه افغانستان ته د درملو واردات په رسمي ډول پیل شول. د یاد شرکت په وینا، په لومړي پړاو کې د ۲۵ قلمه درملو واردات پیل شوي دي.
د طالبانو اړوند حریت راډیو خبر ورکړی دی، چې په لومړي پړاو کې به ۲۵قلمه درمل وارد شي او په نږدې راتلونکي کې به دغه پروسه پراخه او د هېواد روغتیایي اړتیاوې به پوره شي.
په ورته مهال د هند «سپلا» شرکت مسوولانو ویلي، دغه شرکت د درملو د تولید برخه کې د ۹۰کلنې تجربې په درلودلو سره ژمن دی چې په روغتیایي برخه کې له افغانستان سره دوامداره همکاري وکړي.
د افغانستان د درملو د خدماتو اتحادیي مسوولان بیا وايي، چې دا مهال په هېواد کې د درملو واردولو تر ۴۰۰زیات شرکتونه فعالیت کوي او ټول دغه شرکتونه هڅه کوي په روغتیایي معیارونو برابر او باکیفیته درمل هېواد ته وارد کړي.
د طالبانو له لوري له پاکستان نه د درملو پر واردولو تر بندیز وروسته د درملو واردوونکو ته سپارښتنه شوې، چې د درملو واردولو لپاره بدیلي لارې ولټوي او دا ځل دوی هڅه کوي په دې برخه کې له هند څخه مرسته وغواړي.
دا په داسې حال کې ده، چې د هند د بهرنیو چارو وزارت ویاند ویلي، چې د طالبانو د عامې روغتیا وزیر مولوي نور جلال جلالي نوي ډیلي ته رسېدلی او تود هرکلی یې شوی دی.
د رندهیر جیسوال په وینا، دا سفر د افغانستان د روغتیايي نظام د ملاتړ برخه کې د هند دوامداره ژمنتیا څرګندوي.
