د طالبانو د ټرانسپورت او هوایي چلند وزارت وایي، چې دا مهال د دوی تر واک لاندې په ۲۷ هوايي ډګرونه کې ۹ نړۍوال هوایي شرکتونه فعالیت او الوتنې ترسره کوي. دغه وزارت زیاتوي، چې په راتلونکې پنجشنبه به د ایران وارش په نوم شرکت هم خپلې الوتنې پیل کړي.
د طالبانو د ټرانسپورټ او هوایي چلند وزارت ویاند حکمتالله اصفي د سېشنبې په ورځ (د لیندۍ ۲۵مه) د دغه ډلې تر واک لاندې ملي ټلوېزیون سره په خبرو کې ویلي، چې په راتلونکې پنجشنبه به د ایران وارش په نوم یو هوایي شرکت له تهران - کابل او کابل - تهران تر منځ الوتنې پیل کړي.
د اصفي په خبره، دا مهال د دوی تر واک لاندې د ۵ نړۍوالو هوايي ډګرونو په ګډون ۲۷ محلي ډګرونه فعاله دي.
هغه زیاتوي: «د ټرانسپورټ او هوایي چلند وزارت ۲۷ هوایي ډګرونه دي، چې پنځه یې نړۍوال او پاتې ۲۲ یې محلي دي.»
د نوموړي په خبره، ټول هوايي دګرونه معیاري او مساپرو ته اسانتیاوې په پام کې نیول شوې دي.
اصفي ویلي، چې د دوو کورنیو شرکتونو ترڅنګ ۹ نړۍوال هوایي شرکتونه افغانستان ته الوتنې لري، چې له یادې شمېر څخه یې ۴ د ایران اړوند دي.
نوموړي د هوايي ډګرونو د نورو معیارونو او خدمتونو د وړاندې کولو ډاډ ښودلی.
د افغانستان تر سقوط او واک ته د طالبانو له بیا رسېدو را وروسته ډېرو هېوادونو او نړۍوالو هوايي شرکتونو دغه هېواد ته خپلې الوتنې وځنډلې، چې تر اوسه هم ډېری هېوادونه افغانستان ته مستقیمې الوتنې نهلري.
سیاسي شنونکي وايي، چې له مسکو پرته هېڅ هېواد طالبان په رسمیت نهدي پېژندلي نو ځکه د هوایي حریم د خوندیتوب په اړه ډاډمن نهدي.
