د بښنې نړۍوال سازمان له ۶۶ نړۍوالو سازمانونو، تړونونو او کنوانسیونونو څخه د امریکا د وتلو پریکړې ته سخت غبرګون ښودلی او د امریکا یاده پرېکړه یې له نړۍوالو همکارو بنسټونو څخه د غچ اخیستنې هڅه بللې ده.
د بښنې نړۍوال سازمان د جمعې په ورځ (د مرغومي ۱۹مه) د یوې اعلامیې په خپرولو سره، له لسګونو نړۍوالو سازمانونو څخه د امریکا د وتلو پرېکړه غندلې او یاده پرېکړه یې غچ اخیستونکې او د ملګرو ملتونو د اصولو پر بنسټ د نړۍوال نظم پر مشروعیت برید بللې ده.
د بښنې نړۍوال سازمان لوړپوړې چارواکې اړیکا ګوایرا روزاس ویلي:«د امریکا دا پرېکړه د ملګرو ملتونو د اصولو پر بنسټ جوړ شوي نړۍوال نظم او د نړۍوالې همکارۍ پر بنسټ یو غچ اخیستونکی او بې پروا برید دی. له دویمې نړۍوالې جګړې وروسته د بشري حقونو او ساتنې لپاره د جوړ شوي څو اړخیز نظام پر وړاندې د ټرمپ سپین سترګي او هڅه د شرم وړ ده».
نوموړې ویلي، چې امریکا له دې څخه وړاندې هم له یادو ډېرو ادارو سره خپلې اړیکې پرې او مالي ملاتړ درولی و.
یاد سازمان ویلي، چې د امریکا یاده پرېکړه د پراختیا، اقلیم بدلون، د ماشومانو پر وړاندې د تاوتریخوالي پای ته رسولو او د جنسیتي تبعیض پر وړاندې نړۍوالو قوانینو او ژمنو ته د سپکاوي نښه ده.
د بښنې نړۍوال سازمان پر ټولو غړو هېوادونو او نړۍوالو ادارو غږ کړی، چې د څو اړخیزو همکاریو او نړۍوالو حقوقي جوړښتونو د ساتنې په برخه کې دې ژر تر ژره عملي ګامونه پورته کړي.
دا په داسې حال کې ده، چې سپینې ماڼۍ تېره ورځ د یوې اعلامیې په خپرولو سره ویلي، چې د امریکا ولسمشر ډونالډ ټرمپ د یوه فرمان په لاسلیکولو سره پرېکړه کړې، چې له ۳۵ هغو نړۍوالو سازمانونو ووځي، چې د ملګرو ملتونو غړي نهدي او همداراز په ۳۱ نورو ادارو کې چې د دغه سازمان اړوند دي، هم خپل حضور پای ته ورسوي.
