د طالبانو د حج او اوقافو وزیر نور محمد ثاقب ویلي چې ټولو هېوادونو ته پیغام ورکوي چې افغانستان ته دې پلمې نه لټوي او نه دې ګواښونه کوي. هغه وویل، چې که څوک دا ناوړه اراده ولري نو ددی له سخت ځواب سره به مخ شي.
نوموړي د سلواغې پر ۲۶مه له افغانستان څخه د شوروي اتحاد د پوځونو د وتلو د کلیزې په مراسمو کې، په غیر مستقیم ډول پاکستان ته اشاره وکړه او ویې ویل: «موږ د جګړې مزه څکلې ده، او ټولو هېوادونو ته وایو چې موږ ته دې پلمې او سترګې نه برګوي.»
دا څرګندونې وروسته له هغه کېږي چې د پاکستان دفاع وزیر د اسلام اباد له ځانمرګي برید وروسته ویلي وو، چې ښایي له روژې مخکې په افغانستان کې د دغه برید غچ واخلي.
نور محمد ثاقب ټینګار وکړ، څوک چې د افغانستان پر وړاندې ناوړه نیت ولري، له سخت غبرګون سره به مخ شي.
هغه همداراز افغانان جګړې ته وهڅول او ویې ویل: «جنت د تورو تر سیورو لاندې دی»، او پر راتلونکي نسل یې غږ وکړ چې د خپلو پلرونو او نیکونو لاره تعقیب کړي.
بل خوا، د طالبانو ویاند ذبیح الله مجاهد، له یوې رسنۍ سره په خبرو کې ویلي، چې«موږ داسې مستند شواهد او راپورونه لرو چې پاکستان داعش ډلې ته لومړی د بلوچستان په مستونګ سیمه کې پناه ځایونه ورکړي وو او د خپلو موخو لپاره یې کارول، او اوس یې په خیبر پښتونخوا کې دا ډله ځای پر ځای کړې او د پوځ له ملاتړه برخمنه ده.»
د طالبانو د چارواکو دا څرګندونې په داسې حال کې دي چې د سیمې د امنیتي وضعیت او د افغانستان او پاکستان ترمنځ د اړیکو په اړه اندېښنې زیاتې شوې دي.
پاکستان ادعا کوي چې طالبانو په افغانستان کې ټي ټي پي ته خوندي پټنځایونه ورکړي او له هغه ځایه د پاکستان پر ضد وسله وال بریدونه تنظیموي، خو طالبان بیا وایي چې ټي ټي پي د پاکستان کورنۍ مساله ده او دوی هیچاته اجازه نه ورکوي چې د افغانستان خاوره د نورو پر ضد وکاروي.
