د افغانستان لپاره د پاکستان پخواني ځانګړي استازي اصف دُراني له افغانستان انټرنشنل سره په تازه مرکه کې ویلي، پر کابل واکمنو طالبانو بله لاره نه وه پرېښې، نو ځکه پرې هوايي برید وشو. هغه زیاتوي، چې دی په دغو بریدونو خوښ نه دی.
د هغه په وینا، افغان طالبان ښایي د «ټيټيپي» د کنټرول توان ونهلري او یا هم په قصدي ډول نه غواړي چې د دغه ډلې د فعالیتونو مخه ډب کړي. نوموړي وویل: «تر اوسه پورې افغان طالبانو هغه کړنې نه دي غندلي چې د ټيټيپي له لوري په پاکستان کې ترسره شوي دي». دا پاکستانی ډیپلوماټ وایي، دی فکر نه کوي چې افغان طالبان دې اوس د اسلاماباد دوستان وي.
د هغه په خبره: «د طالبانو په لیکو کې داسې کسان شته چې هغوی د طالبانو سر سخته مخالفین دي». د نوموړي په وینا، دی فکر نه کوي، چې پر کابل واکمن دې د چا دوستان وي، بلکې دغه ډله هر چا سره د خپلو ګټو لهمخې اړیکې ساتي او که یې پهکې ګټې نه وي؛ نو ورسره یې نه پالي.
اصف دُراني وویل، چې په افغانستان کې بدلون په افغانانو پورې تړلې مسله ده. له افغانستان انټرنشنل سره په مرکه کې له دغه پاکستاني ډېپلوماټ څخه د هېواد پر بېلابېلو ولایتونو د هوایي بریدونو په تړاو پوښتنه وشوه چې ایا پاکستان پهکې خپلې موخې ته ورسېد: «۷بریدونه ټولټال شوي چې ۶یې هدف ته رسېدلي او متاسفانه په یو کې نور زیانونه هم وو».
د هغه په وینا، لا تر اوسه پورې د طالبانو او پاکستان ترمنځ د مذاکراتو دروازې نه دي بندې شوي او له دغه ډلې سره د اسلاماباد یوازینۍ مسله د «ټيټيپي» اړوند ده. هغه له طالبانو څخه غوښتنه کړې، چې پرته له ګاونډیو ژوند سخت دی او پرته له پاکستان څخه د دې ډلې ژوند ستونزمن دی.
دُراني ټینګار کړی، چې د پاکستان او افغانستان د امنیت لپاره ښې اړیکې خورا اړینې دي. نوموړی همداراز زیاتوي، چې تر اوسه پورې یې د طالبانو خلاف د هېواد دننه نظامي او سیاسي مخالفین ډېر نه دي حس کړي.
دا لوړپوړی پاکستانی ډېپلوماټ داسې مهال دا څرګندونې کوي، چې وړمه شپه پاکستان د ننګرهار او پکتیکا ولایتونو په یو شمېر سیمو هوایي بمبارۍ وکړې، چې لسګونه ملکي وګړو ته یې پهکې مرګژوبله واړوله. طالبانو هم د دغه بریدونو د غچ اخیستنې ګواښونه کړي دي.
د پاکستان د پنجاب په قاید اعظم میډيکل کالج کې سرچینو افغانستان انټرنشنل- پښتو ته ویلي، ځايي پولیسو نن د یاد کالج افغان محصلان د ویزو د مودې ختمېدو له امله نیولي او د اېستنې له ګواښ سره مخ دي. دغه محصلان وايي، د ویزو د تمدید لپاره یې نوم لیکنه کړې خو لا هم تر پروسس لاندې دي.
پاکستان له شاوخوا پنځو میاشتو راهیسې په دغه هېواد کې د افغان محصلانو په ګډون د ټولو مېشتو افغانانو د ویزو د تمدید چارې درولې دي او له دې سره د زدهکړیالانو په ګډون ګڼ افغانان له ستونزو سره مخ شوي دي.
تازه په پنجاب کې د قاید اعظم میډیکل کالج افغان محصلان له ورته برخلیک سره مخ شوي دي. په دغه کالج کې سرچینو افغانستان انټرنشنل- پښتو ته ویلي، نن سهار (دوشنبه د کب ۴مه) ځايي پولیس یاد کالج ته ورغلي او پهکې ټول هغه افغان زدهکړیالان چې د ویزو موده یې ختمه شوې نیولي او د توقیف مرکز ته یې لېږدولي دي.
د دغه کالج یوه افغان محصل افغانستان انټرنشنل- پښتو ته ویلي: «موږ هر یوه مو له اتو میاشتو ان تر یو کال مخکې د ویزو د تمدیدېدو لپاره نوم لیکنه کړې او تر اوسه تر پروسس لاندې دي او رد شوي نهدي».
دغه محصلان زیاتوي، ځينې داسې محصلین هم شته چې سبا ته یې ازموینه ده او د پولیسو له لوري توقیف شوي او که چېرې خپلو ازموینو ته ونهرسېږي، نو یو کال زحمت به یې په سیند لاهو شي.
دوی وايي، ځايي پولیسو ورته ګواښ کړی چې په زوره یې افغانستان ته ستنوي او په وینا یې: «که داسې وشي، نو زموږ زدهکړې به نیمګړې پاتې شي او دوی [پاکستان] زموږ له برخلیک او ان راتلونکې سره لوبې کوي».
په توقیف کې افغان زدهکړیالان وايي، په اسلاماباد کې یې هم د طالبانو له سفارت څخه د همدې ستونزې د حل غوښتنه کړې، خو په وینا یې، چې طالبانو هم ورته مثبت ځواب نهدی ورکړی او ورته یې د دواړو لوریو د اړیکو د خرابېدو یادونه کړې ده.
د پنجاب په کالجونو کې افغان زدهکړیالان د پاکستان له حکومت څخه غواړي، چې د ویزو د تمدید بهیر دې پیل کړي، څو دوی هم په قانوني توګه دغه هېواد کې واوسېږي او خپلو درسونو ته دوام ورکړي.
سره له دې، چې پاکستان له څو میاشتو راهیسې له کوم دلیل پرته په دغه هېواد کې د مېشتو افغانانو د ویزو د تمدید بهیر په ټپه درولی، د یاد کالج د افغان محصلانو د دغې ستونزې په تړاو یې هم تر اوسه څه نهدي ویلي.
د یادونې وړ ده، چې دمګړی یوازې د پنجاب د کالجونو په طب څانګه کې څه باندې ۲۴۰ افغان محصلین پر زدهکړو بوخت دي.
په کابل کې د روسیې سوداګریز مرکز وایي، چې بېلاروس په ۲۰۲۵ کال کې افغانستان ته ټولټال ۳۸۱ زره ټنه تیلي محصولات صادر کړي، چې دا د تېر کال په پرتله ۲۳ ځله زیاتوالی ښیي. په ورته وخت کې له ایران څخه افغانستان ته د تیلو صادرات په پراخه کچه کم شوي دي.
دغه مرکز، نن دوشنبه د کب په ۲مه نېټه راپور ورکړی، چې بېلاروس په ۲۰۲۴م کال کې یوازې ۱۶ زره ټنه تیلي محصولات صادر کړي وو، خو د افغانستان د سونتوکو نوي معیارونه، چې د ټیټ اکتان بنزین(۸۰- ای اې) او د لوړ سلفر ګازوییل واردات یې ممنوع کړل، د تیلو افغان بازارونه یې د بېلاروس پر لور مات کړي دي.
د دې بدلون له امله له ایران څخه د تیلو واردات په پراخه کچه کم شوي او افغانستان خپل واردات د بدیل عرضه کوونکو لکه بېلاروس او روسیې پر مایع ګازو متمرکز کړي دي.
د روسیې د تیلو او اوبلنو ګازو د ادارې راپور ښیي چې له جنورۍ څخه تر نومبر میاشتې پورې یې د اوبلن ګاز صادرات د مرکزي اسیا او افغانستان لپاره نږدې دوه برابره زیات شوي، چې ټولیزه اندازه یې له یو میلیون او ۱۶زره ټنو څخه ډېره ده.
دغه بدلون د اروپایي ټولنې په وروستیو محدودیتونو پورې تړلی، چې د روسیې د اوبلنو ګازو پر وارداتو یې په ډسمبر کې محدودیتونه ولګول. په پایله کې، مسکو د خپلو صادراتو یوه برخه د مرکزي اسیا او افغانستان بازارونو ته واړوله، او د تیلو په نړیوال بازار کې یې د بدلونونو اغېز ښکاره شو.
نیویارک ټایمز خبر ورکړی، چې شاوخوا لس زره افغان کمانډویان چې د "صفري قطعو" غړي وو، اوس مهال په متحده ایالاتو کې له ناڅرګند راتلونکي سره مخ دي. په واشنګټن کې د امریکا د ملي ګارډ پر سرتېرو د یوه افغان له ډزرو وروسته د صفري قطعو د ځواکونو د پناه غوښتلو بهیر هم ځنډول شوی.
په واشنګټن کې د ملي ګارډ پر دوه سرتېرو د یوه افغان له ډزرو وروسته د افغانانو او صفري قطعو د ځواکونو د پناه غوښتلو بهیر ځنډول شوی دی.
نیویارک ټایمز د دوشنبې په ورځ د پخواني افغان حکومت په وخت کې د صفري قطعې غړي، محمد اقبال زماني د ژوند کیسه خپره کړې، چې له ننګونو د هغه د ډک ژوند اړخونه انځوروي.
محمد اقبال، چې اوس مهال د کالیفورنیا دایل کاجون په یوه هوټل کې د تخنیکي خدماتو کارمند په توګه کار کوي، ویلي، چې د امریکا د ملي ګارډ پر سرتېرو د تېر کال ډزې کوونکی رحمان الله لکڼوال د جمهوري حکومت په وخت کې د صفري قطعې غړی و.
اقبال په ۲۰۱۷ کال کې په کندهار کې له صفر درې قطعې سره یوځای شو. هغه په پیل کې ژباړونکی و خو وروسته د مرستیال او بیا د قطعې د مشر په توګه وټاکل شو.
د ۲۰۲۱ کال په اګست کې د افغانستان له سقوط سره، د صفري یونټونو غړي د کابل هوايي ډګر ته ولیږدول شول، او بالاخره شاوخوا لس زره یې د دوی د کورنۍ له شل زره زیاتو غړو سره یوځای امریکا ته اېستل شوي دي.
متحده ایالاتو ته له ننوتلو وروسته دوی ته "لنډمهاله بشري حیثیت" ورکړل شو خو تر اوسه یې پناه نه ده ترلاسه کړې.
اوس ډېری دغو کسانو د پناه غوښتنې یا کډوالۍ ځانګړو ویزو غوښتنه کړې ده خو د واشنګټن د ډزو له پېښې وروسته، د پناه غوښتنې او ځانګړي ویزې ټول غوښتنلیکونه او د صفري قطعاتو د غړو قضیې ځنډولې دي.
د صفري قطعو یو بل پخواني سرتېري موسی نیویارک ټایمز ته وویل:«که موږ دایمي قانوني حیثیت ونه لرو، موږ نشو کولای کار وکړو. ډیری یې بې کاره دي.»
نوموړي وویل، چې نن ورځ ډیری دا سرتیري، چې د امریکا په تر ټولو اوږده جګړه کې یې کلونه په افغانستان کې جګړې کړې، له نیول کیدو او شړل کېدو وېره لري.
موسی وویل: «دوی حتا ارامه خوب هم نشي کولی.»
د طالبانو ارشاد، حج او اوقافو وزارت وايي چې په روانه ژوره کې د کابل ښار د ۲۲ ناحیو په ګډون د هېواد په ۳۴ ولایتونو کې د تراویح لمونځونو لپاره ۳۴۰۰ تنه قاریان د ازموینې له لارې ګومارل شوي دي.
د طالبانو ارشاد، حج او اوقافو وزارت نن دوشنبه، د کب ۴مه د یوې خبرپاڼې په خپرولو سره لیکلي، چې د کابل ښار د ناحیو او ټولو ولایاتو لپاره د شرعي معلوماتو او فلکي حساباتو پر اساس د روژه ماتي او پیشلمي مهالویشونه ترتیب، چاپ او وېشل شوي دي.
په اعلامیه کې راغلي، چې د جوماتونو د منبرونو له لارې د جمعې په خطبو کې د روژې د فضیلتونو او مسایلو بیانولو ځانګړې لړۍ هم پیل شوې ده.
د خبرپاڼې له مخې، په ۴۱۱ لویو نظامي مرکزونو کې د قران کریم د ترجمې او د تفسیر دورې پیل شوې دي چې ملي راډیو تلویزیون له لارې هم په دواړو ملي ژبو په ژوندۍ بڼه خپریږي.
د ۲۰۲۱ کال په اګست کې پر کابل د طالبانو له بیا واکمنېدو وروسته، د افغانستان او پاکستان ترمنځ سیاسي او امنیتي اړیکوپام وړ بدلون موندلی او پر ډېورنډ کرښه د نظامي ترینګلتیاوو کچه لوړه شوې ده.
د شته شمېرو له مخې، په دې موده کې د طالبانو او پاکستاني ځواکونو ترمنځ لږ تر لږه اته ځله مستقیمې نښتې او هوايي بریدونه ثبت شوي دي. د دغو پېښو ټولیز انساني لګښت دروند و. په مجموع کې د افغانستان اړخ ته۱۴۲ ملکي وګړي وژل شوي او تر ۵۰۰ پورې نور ټپیان شوي دي.
په ورته وخت کې، د ۲۰۲۵ کال شمېرې ښيي چې په پاکستان کې هم له وسلهوالو شخړو سره تړلې مرګ ژوبله ۷۳ سلنه لوړه شوې ده، چې د بېثباتۍ او د تاوتریخوالي د تصاعد ښکارندويي کوي. په یاده موده کې ۲۱۱۵ وسلهوال، ۶۶۴ امنیتي سرتېري او ۵۸۰ ملکي وګړي وژل شوي دي.
د همدې امنیتي کړکېچ په پایله کې، د طالبانو او پاکستان ترمنځ د ډېورنډ پر کرښه درې ځله اوږدمهالې او نسبتا پراخې نښتې شوې دي، چې څو ورځې یې دوام کړی او درنې وسلې پکې کارول شوې دي. سربېره پر دې، څلور ځله یوازې متقابلې ډزې شوې دي، چې که څه هم لنډمهالې وې، خو د سرحدي مدیریت د میکانېزمونو د نشتوالي او د باور د کچې د ټیټوالي له امله یې دوام کړی دی.
په تېرو څه باندې څلورو کلونو کې د کابل او اسلاماباد ترمنځ امنیتي اړیکې څو ځله له کړکېچ سره مخ شوې دي.
د دواړو خواوو د اړیکو د ترینګلتیا یو مهم لامل ټي ټي پي او نور پاکستاني وسله وال ګڼل کیږي، چې له ۲۰۲۱ کال وروسته یې په خیبر پښتونخوا ایالت کې د پاکستان پر امنیتي ځواکونو بریدونه او چاودنې چټک کړي دي.
پاکستان د ټي ټي پي د بریدونو په غبرګون کې څو ځله د افغانستان پر ختیزو او سوېل ختیزو ولایتونو هوايي بریدونه کړي، چې د ملکي وګړو د مرګ ژوبلې راپورونه ورسره مل وو.
اسلاماباد ټینګار کوي چې هدف یې د تحریک طالبان پاکستان وسلهوال دي، چې له دې سیمو نه په پاکستان کې بریدونه کوي، خو د طالبانو اداره دا بریدونه د افغانستان د حریم او حاکمیت سرغړونه بولي او وايي، چې ټي ټي پي د پاکستان کورنۍ مساله ده.
پاکستان په یو شمېر هوايي بریدونو کې د ټي ټي پي د وسله والو او قوماندانانو د وژل کېدو ادعاوې هم کړې دي، خو طالبانو دغه ادعاوې رد کړې دي.
د بریدونو لړۍ
د ۲۰۲۲ کال د اپرېل په ۱۶مه، د خوست سپېره او د کونړ شلټن سیمې د شپې ناوخته د هوايي بریدونو هدف وګرځېدې.
د ملګرو ملتونو د بشري چارو د همغږۍ ادارې اعلان وکړ، چې د پاکستان هوايي ځواک په خوست کې د څلورو کلیو استوګنیزې سیمې په نښه کړې، چې لږ تر لږه ۴۱ ملکي وګړي پکې ووژل شول او ۲۲ نور ټپیان شول. وژل شوي او ټپیان شوي کسان ډېری وزیرستاني کډوال ګڼل کېدل. په کونړ ولایت کې هم د بریدونو له امله ۶ ملکي وګړي ووژل شول. په همدې حال کې، د کونړ څو ولسوالۍ له دې وړاندې د درنو توپچي بریدونو لاندې وې چې درې ورځې یې دوام کړی و.
دا هوايي بریدونه وروسته له هغه و شول چې د پاکستان صدراعظم شهباز شریف خبرداری ورکړ چې په شمالي وزیرستان کې د کمین په برید کې د اوو سرتېرو له وژل کېدو وروسته به غچ اخیستل کېږي.
د پاکستان د بهرنیو چارو وزارت له طالبانو وغوښتل چې د هغو وسلهوالو پر وړاندې «جدي اقدامات» وکړي چې د افغانستان له خاورې څخه پر پاکستان بریدونه کوي، او ادعا یې وکړه چې «ترهګر له افغان خاورې په ازاد ډول د پاکستان دننه فعالیتونه کوي.»
په ۲۰۲۴ کال کې د «طالب لیکس» په نامه هېکرانو د یورنډ کرښې په اوږدو کې د پاکستانې نظامیانو د بریدونو د جزئياتو یو مکتوب خپور کړ. د مکتوب له مخې، د ۲۰۲۴ کال په ډسمبر کې پاکستان د افغانستان په ۶ ولایتونو کې د بې پيلوټه الوتکو ۱۶ ګزمې او له ډيورنډ کرښې دې خوا په څلور ولایتونو کې ۱۴ توغنديز بریدونه کړي.
دغه ۶۴۲ ګڼه مکتوب د طالبانو امنیتی همکاريو او سرحدي چارو ادارې په پاکستان کې د طالبانو سفارت ته لېږلی او له هغوی یې غوښتي وو، چې د کوربه هېواد اړوند وزارت ته يې وليږي.
په مکتوب کې د ۲۰۲۴ کال د ډسمبر مياشتې له ۲۵مې څخه بیا د ۲۰۲۵ کال د جنوري تر ۳ مې پورې د پاکستاني ځواکونو د بې پيلوټه الوتکو او د ډیورنډ کرښې څخه پر افغان خاوره د وسله والو بريدونو مکمل جزئيات او د سیمو (کوردینات) لیکل شوي وو.
په مکتوب کې په ډاګه شوې وه، چې په همدې جريان کې د پاکستان نظامي ځواکونو په پکتیا، پکتیکا، خوست، غزني، کندهار او هلمند ولایتونو کې د بې پيلوټه او جټ الوتکو ۱۶ هوايي ګزمې کړې دي. طالبانو په خپل دې ۶ مخیز مکتوب کې په بشپړو جزئياتو سره ليکلي، چې د پاکستان پوځيانو له ډيورنډ کرښې دې خوا د پکتیا، پکتیکا، خوست او کونړ بيلابيلو سيمو ته توغندي توغولي او د طالبانو پر تاسیساتو يې هم وسله وال بريدونه کړي دي.
دغه مکتوب افغانستان انټرنشنل خپور کړی و، خو پاکستاني چارواکو د طالبانو ددغو ادعاوو په اړه غبرګون ونه ښود.
د ۲۰۲۴ کال د مارچ په ۱۸مه د پاکستان هوايي بریدونو په خوست ولایت (د سپېره ولسوالۍ، افغان دوبۍ سیمه) کې ملکي وګړو ته مرګ ژوبله واړوله، چې له امله یې یو بالغ نارینه ملکي وګړی ووژل شو او دوه نور ټپیان شول.
همداراز په پکتیکا ولایت (د برمل ولسوالۍ، لمن سیمه) کې اووه ملکي وګړي ووژل شول چې دوه ښځې، درې نجونې او دوه هلکان پکې شامل وو.په همدې ورځ وروسته، د پکتیا ولایت (د ډنډې پټان ولسوالۍ په خرلاڅي سیمه) کې د طالبانو د سرحدي ځواکونو او د پاکستاني ځواکونو ترمنځ وسلهوالې نښتې وشوې چې له امله یې څلور افغان ملکي وګړي (درې ماشومان او یو بالغ نارینه) ووژل شول او اووه نور افغان ملکي وګړي (دوه ماشومان، څلور بالغې ښځې او یو بالغ نارینه) ټپیان شول.
د طالبانو ویاند ذبیح الله مجاهد دغه پېښې په کلکه وغندلې، خو د پاکستان د بهرنیو چارو وزارت د مارچ د ۱۸مې د پېښو په اړه ملګرو ملتونو ته وویل چې دوی دا تورونه ردوي، چې ګواکې د پاکستان پوځ په افغانستان کې ملکي وګړي په نښه کړي دي.
یاد وزارت وویل، چې«پر پاکستاني ملکي وګړو او وسلهوالو ځواکونو د بریدونو پلان جوړېده او داسې ښکاري هغه کسان چې د مارچ پر۱۸مه له منځه وړل شوي، د ملکي وګړو په توګه شمېرل کېږي».
۲۰۲۵ کال د طالبانو او پاکستاني ځواکونو ترمنځ په مختلفو سیمو کې ډزې تبادله شوې.
د ملګرو ملتونو د افغانستان مرستندویه ماموریت (یوناما) د ۲۰۲۵ کال د اکتوبر له لومړۍ تر ډسمبر ۳۱مې پورې په خپل رپوټ کې وویل، چې د پاکستاني ځواکونو او د طالبانو د سرحدي ځواکونو ترمنځ په نښتو او بریدونو کې لږ تر لږه ۷۰ ملکي وګړي وژل شوي او ۴۷۸ نور ټپیان شوي دي.
یوناما وویل، یوازې د اکتوبر له ۱۰مې تر ۱۷مې پورې د ترینګلتیاوو د چټک زیاتوالي په ترڅ کې تر ۵۰۰ ډېرې ملکي مرګ ژوبلې ثبت شوې چې ۴۷ تنه پکې وژل شوي او ۴۵۶ نور ټپیان شوي دي.
د اکتوبر په ۱۱مه ماښام د پکتیا او کونړ ولایتونو په بېلابېلو سرحدي سیمو کې درنې نښتې پیل شوې چې تر بل سهاره یې دوام وکړ. په پکتیا، ډنډ پټان ولسوالۍ، نري کنډو سیمه کې د هاوان مرمیو له امله ۶ ملکي وګړي (۴ سړي او ۲ ښځې) ټپیان شول. دغه راز د کونړ په ناړۍ ولسوالۍ کې لږ تر لږه ۱۱ ملکي وګړي، چې ښځې او ماشومان هم پکې شامل وو، ټپیان شول.
د اکتوبر پر ۱۲مه د هلمند په دېشو ولسوالۍ کې د هاوان مرمۍ له امله یو ملکي کس ووژل شو او یو بل ټپي شو.
د یوناما د رپوټ له مخې، د اکتوبر ۱۵مه د ملکي مرګ ژوبلې له پلوه تر ټولو سخته ورځ وه.
په همدې ورځ ۴۵۷ ملکي کسانو ته مرګ ژوبله واوښته (۳۵ وژل شوي، ۴۲۲ ټپیان)، چې نږدې ۹۰ سلنه یې د کندهار سپین بولدک ولسوالۍ کې وو. دغه ملکي کسان د پاکستان په هوايي بریدونو او د هاوان مرمیو د توغولو په پایله کې ووژل شول او ټپيان شول. په یوه جلا هوايي برید کې د ماشومانو او ښځو په ګډون۷ تنه ووژل شول او ۳۰ نور ټپیان شول. د قربانیانو له ډلې ۲۷ تنه د یوې کورنۍ غړي وو.
د طالبانو په متقابلو بریدونو کې د ډیورنډ کرښې پورې غاړې ته هم ملکي کسان په نښه شول.
په همدې ورځ د کابل ښار څلورمې حوزې اړوند پروژه تایمني کې دوې چاودنې وشوې چې لږ تر لږه ۹ تنه پکې ووژل شول او ۳۷ نور ټپیان شول. د استوګنې کورونه او دوکانونه سخت زیانمن شول. طالبانو لومړی دا د ټانکر د چاودېدو پېښه وګڼله، خو وروسته یې ومنله، چې دا برید و. دا لومړی ځل و چې پاکستان پر پلازمېنې کابل برید وکړ او دلیل یې دا باله، چې د ټي ټي پي غړي یې په نښه کړي دي.
دغه راز په خوست کې د ډزو په تبادله کې یو خبریال ووژل شو او بل ټپي شو.په پکتیکا کې هم د هاوان مرمیو له امله ماشومان ټپیان شول.
که څه هم د اکتوبر ۱۵مې ماښام دواړو لوریو د اوربند اعلان وکړ، خو له اوربند وروسته هم مرګ ژوبلې دوام درلود.
د اکتوبر ۱۷مه په پکتیکا کې د هوايي برید له امله ۱۱ ملکي وګړي ووژل شول او ۱۴ نور ټپیان شول.
د نومبر په ۶مه په سپین بولدک کې ۵ ملکي وګړي ووژل شول او ۵ نور ټپیان شول. دغه راز د نومبر په ۲۴مه په خوست کې د هوايي برید له امله ۱۰ ملکي وګړي (۵ هلکان، ۴ نجونې او یوه ښځه) ووژل شول او ۳ نور ټپیان شول.په همدې شپه په پکتیکا او کونړ کې نور بریدونه وشول چې ماشومان او ښځې پکې ټپیان شول.
د ۲۰۲۵ کال د نومبر پر۲۵مه ، په خوست کې ۱۰ کسان ووژل شول او شپږ نور ټپیان شول. ځايي اوسېدونکو د ملګرو ملتونو د استازځي دفتر ته وویل چې کورونه او ملکي تاسیسات زیانمن شوي دي.
طالبانو ددغه برید مسوول د پاکستان پوځ وباله، خو د پاکستان د پوځ ویاند ډګر جنرال احمد شریف چوهدري په راولپنډۍ کې خبریالانو ته وویل چې د طالبانو د ادارې له لوري لګول شوي تورونه «بېاساسه» دي. چوهدري وویل: «هر کله چې پاکستان برید کوي، په ښکاره یې کوي»، او زیاته یې کړه چې د اسلاماباد «جګړه له ترهګرو سره ده، نه له افغانانو سره».
هغه ټینګار وکړ چې تر هغه به له کابل سره خبرې ونه شي څو طالبان د افغانستان له خاورې د فعالیت کوونکو وسلهوالو پر ضد «د تایید وړ» اقدام ونه کړي.
د ډسمبر په ۴مه په پکتیکا کې ۳ مزدوران ووژل شول او ۳ نور ټپیان شول. د ډسمبر په ۵مه په سپین بولدک کې ۵ ملکي وګړي ووژل شول او ۵ نور ټپیان شول. ۱۵ ورځې وروسته په کونړ کې یو ۱۵ کلن هلک د هاوان مرمۍ له امله ټپي شو او وروسته یې ساه ورکړه.
له اوربند وروسته د دواړو خواوو ترمنځ په قطر او ورپسې په ترکیه او سعودي عربستان کې خبرې اترې وشوې، خو دې خبرو اترو پایله نه درلوده، ځکه د ډیورنډ کرښې پورې غاړې ته پر پاکستاني ځواکونو بریدونو دوام وکړ او پاکستاني چارواکو ددې بریدونو سرچینه په افغانستان کې میشت پاکستان ضد وسله وال ګڼل.
طالبانو د روژې په پیل کې د سعودي عربستان یوه پلاوي ته درې پاکستاني سرتېري چې د اکتوبر پر ۱۲مه نیول شوي وو، وسپارل، خو پاکستان یوځل بیا د ۲۰۲۶ کال د فبرورۍ پر۲۲مه په ننګرهار او پکتیکا کې هوايي بریدونه وکړل، چې د راپورونو له مخې شاوخوا ۱۳ کسان پکې ووژل شول او تر شلو ډېر نور ټپیان شول. پاکستان یو ځل بیا وویل چې هدف یې د تحریک طالبان پاکستان وسلهوال وو، خو ځايي اوسېدونکو او د ملګرو ملتونو استازځي وویل چې په بریدونو کې۱۳ وژل شوي کسان ملکي وګړي دي.
دغه بریدونه په اسلام اباد کې پر یوه جومات او په بنو او باجوړ کې له بریدونو وروسته وشول.
پاکستاني چارواکو اعلان وکړ، چې د اسلام اباد ځانمرګي بریدګر افغانستان ته سفر کړی و او په نورو بریدونو کې افغان وګړي ښکیل وو.
د پاکستان کړکېچن امنیتي وضعیت
د پاکستان د شخړو او امنیت د مطالعاتو انسټیټیوټ په ۲۰۲۵ کال کې رپوټ ورکړ، چې له وسله والو شخړو سره تړلې مړینې ۷۳ سلنه زیاتې شوې. د رپوټ لهمخې، په دې موده کې ۲۱۱۵ وسلهوال، ۶۶۴ امنیتي سرتېري او ۵۸۰ ملکي وګړي وژل شوي دي.
په دې رپوټ کې ویل شوي، چې یاد کال له ۲۰۱۵ راهیسې د وسلهوالو لپاره تر ټولو خونړی او له ۲۰۱۱ کال راهیسې د امنیتي ځواکونو لپاره تر ټولو وژونکی او په وروستۍ لسیزه کې د ملکي تلفاتو له پلوه تر ټولو بد کال و. دغه انسټیټیوټ وویل، چې په یاده موده کې د دولتپلوه سولې د کمېټو ۲۸ غړي هم په بېلابېلو بریدونو کې وژل شوي دي. د دې ادارې د ۲۰۲۴ کال په رپوټ کې له ترهګرۍ سره تړلي ۱۹۵۰ مړینې ثبت شوې وې.
د پاکستان د شخړو او امنیت د مطالعاتو انسټیټیوټ د رپوټ له مخې، دغه هېواد په ۲۰۲۵ کال کې د تاوتریخوالي له "بېساري زیاتوالي" سره مخ و، هم د شدت او هم د پېښو له اړخه چې په وروستیو کلونو کې تر ټولو لوړې کچې ته رسېدلی دی.
په ۲۰۲۵ کال کې د پاکستان د امنیتي ځواکونو د تلفاتو شمېر هم د ۲۰۲۴ کال په پرتله ۲۶ سلنه زیات شوی و او د ملکي وګړو مرګژوبله هم د ۲۰۲۴ کال په پرتله ۲۴ سلنه لوړه شوې وه.
ډرون څرخکې د پاکستاني طالبانو په جګړه ییز تاکتیک کې نوی اړخ دی، چې په ۲۰۲۶ کال کې یې د استعمال کچه لوړه شوې ده.
افغانستان انټرنشنل د روان کال په لومړیو کې رپوټ ورکړی و، چې وسله وال جنګیالي د ډرون څرخکو په لټه کې دي او لومړنۍ ازموینې یې په لمن سرحدي سیمه کې ترسره کړې دي. ددغه رپوټ له خپرېدو وروسته د ډرون څرخکو د بریدونو پېښې ډېرې شوې، چې اوس د پاکستان د امنیتي ځواکونو، په ځانګړې توګه د پولیسو لپاره یوه ستره ننګونه ده.
پاکستاني ځواکونو هم په خپلو لیکو کې د ډرون څرخکو او جمر تجهیزاتو استعمال ډېر کړی او په دې وروستیو کې یې پولیس هم په دې تجهیزاتو سمبال کړي دي.
د کړکېچ د پراخېدو اندېښنې
د ۲۰۲۱ کال له اګست وروسته د یادو امنیتي پېښو په رڼا کې وضعیت د ټیټ شدت شخړې له پړاوه د محدودسرحدي تقابل پر لور د تدریجي خوځښت نښې ښيي. ثبت شوي هوايي بریدونه، متقابلې نښتې، د هاوان او درنو وسلو استعمال او دواړو خواوو ته د ملکي او نظامي مرګ ژوبلې لوړ ارقام ښيي چې له بریدونو او خبرو اترو سره سره تر اوسه د وضعیت په ښه والي کې هیڅ راز تغییر نه دی راغلی.
د ټي ټي پي مساله د دواړو لوریو ترمنځ لاهم د شخړې اوبېباورۍ اصلي محور دی.
اسلاماباد دا ګواښ د افغانستان له خاورې سره تړي، خو طالبان یې د پاکستان داخلي موضوع بولي. د همدې اختلاف له امله سیاسي ډیالوګ له بنبست سره مخ دی، اوربند دوام نه کوي او د منځګړیتوب هڅې مخ پر پیکه کېدو دي.
د شنونکو په باور، وضعیت ته په پام، که د طالبانو او پاکستان ترمنځ د اعتماد جوړونې تدابیر، د شخړې د حل ډیپلوماټیک کانالونه او پر کرښه د همغږۍ تخنیکي چوکاټونه فعال نه شي، د شخړې د لا پراخېدو او د ملکي تلفاتو د زیاتېدو احتمال ښايي لوړ پاتې شي.