په کونړ کې د پاکستان په برید کې د وژل شوې ډاکترې او زوی جسدونه یې کورنۍ ته سپارل شوي
سرچینو افغانستان انټرنشنل - پښتو ته وویل، چې په ناړۍ ولسوالۍ کې د پاکستاني ځواکونو په ډزو کې د وژل شوې ډاکټرې «اونځرا زوالزۍ» او د هغې د زوی میهن، جسدونه یې له ۴۰ ساعتونو تېرېدو وروسته کورنۍ ته سپارل شوي. دوي زیاتوي، پاکستاني ځواکونو جسدونو ته پر نږدې کېدونکو کسانو هم ډزې کولې.
د یادې ډاکټرې کورنۍ وايي، چې د وژل شوې« اونځرا او زوی» جنازه به یې سبا د کونړ په مرکز کې ادا شي.
د وژل شوې ډاکټرې ورور په یوه ویډیو کې وایي، چې د خور او خوریه جسدونه یې د سیمې د خلکو په مرسته انتقال شوي دي.
تېره ورځ په کونړ کې یو شمېر سرچینو افغانستان انټرنشنل- پښتو ته وویل، چې د ناړۍ ولسوالۍ په بريکوټ سیمه کې د پاکستاني ځواکونو له لوري یوه ډاکټره اونځرا زوالزۍ او د هغې زوی میهن په ډزو وژل شوي.
ځايي اوسېدونکو ویلي و، چې پاکستاني عسکر په خپلو ډزو سره خلکو ته اجازه نه ورکوي چې جسدونه له سیمې وباسي.
د اسېدونکو په وینا چې د پاکستان عسکرو تېره ورځ د اختر په لومړۍ ورځ د هاوان مرمۍ هم ورولي او د نورستان دوو ولسوالیو کامدېش او برګمټال ته تلونکې لارې هم طالبانو تړلي دي. طالبانو دغه لاره ځکه تړلې چې پاکستاني عسکر پر تېریدونکو موټرو او خلکو ډزې کوي.
