د ناروې د کډوالو شورا: د پاکستان د بریدونو له وېرې په ننګرهار او کونړ خلک بېځایه شوي
د ناروې د کډوالو شورا وايي، چې د پاکستان د بریدونو له وېرې په ننګرهار او کونړ ولایتونو کې ۱۱۵ زره کورنۍ له خپلو کورونو څخه بېځایه شوي دي. دوی په خپل راپور کې زیاتوي، چې دا بېځایه شوې کورنۍ زیاتره د ډیورنډ کرښې په اوږدو کې مېشتې وې.
د ناروې د کډوالو شورا په خپله ویبپاڼه کې د یوه راپور په خپرولو سره لیکلي، چې د پاکستان او طالبانو ترمنځ په وروستیو نښتو کې تر دې مهاله لږ تر لږه ۸۰۰ کورونه زیانمن شوي یا ویجاړ شوي دي.
په دې راپور کې د بختیار په نوم د یوه کس کېسه راخیستل شوې ده، چې ډیورنډ کرښې ته څېرمه تورخم کې له خپل کور څخه د خپلو شپږو ماشومانو سره بېځایه شو.
هغه وویل:«د شپې شاوخوا لس بجې وې چې موږ ناڅاپه د راکټونو او ډزو غږونه واورېدل، په څو دقیقو کې بریدونه خورا شدید شول، موږ د تیښتې پرته بله چاره نه درلوده.»
د ملګرو ملتونو د راپور پر بنسټ د ۲۰۲۶ کال د فبروري په ۲۶مه، د افغانستان په کونړ او ننګرهار ولایتونو کې بریدونه پیل شول.
د دغه شورا د راپور له مخې یوازې په دوو اونیو کې، ۷۶ افغان ملکي وګړي ووژل شول او ۲۱۳ نور ټپیان شول.
