د امریکا د سټنفورډ پوهنتون د «مصنوعي ځيرکتيا شاخص ۲۰۲۶» کلنی راپور ښيي چې سعودي عربستان د مصنوعي ځيرکتيا په برخه کې د ښځو د ۳۲سلنې ونډې په لرلو سره د نړۍ په کچه لومړی مقام خپل کړی دی. تر دې وروسته اسټرالیا د ۳۰ سلنې او کاناډا د ۲۹ سلنې ونډې سره په دویم او درېیم ځای کې راغلي دي.
خو دا راپور ښيي چې مصنوعي ځيرکتيا تر ډېره د نارینهوو تر واک لاندې ډګر دی. د معلوماتو له مخې، په ټولو هېوادونو کې د مصنوعي ځيرکتيا په برخه کې د ښځو او نارینهوو ترمنځ څرګند توپیر شته. په دې مانا چې په هر ځای کې نارینه د دې برخې د لیکوالانو او اختراع کوونکو ډېره برخه جوړوي، او د ښځو ونډه کمه ده.
د سټنفورډ پوهنتون د مصنوعي ځيرکتيا شاخص په بېلګه کې برازیل، سویلي کوریا او جاپان یاد شوي، چېرې چې له ۸۰ سلنې ډېر کارکوونکي په دې برخه کې نارینه دي. سره له دې، سعودي عربستان د نړۍ لومړنی هېواد دی چې په کې ښځې د مصنوعي ځيرکتيا په برخه کې تر ټولو لوړه ونډه لري.
د سټنفورډ پوهنتون راپور دا هم ښيي چې تر اوسه هېڅ هېواد په دې برخه کې د جنسیتي برابرۍ کچې ته نه دی رسېدلی. ان په ډېرو هېوادونو کې د ۲۰۱۰او ۲۰۲۵ کلونو ترمنځ د ښځو او نارینهوو ترمنځ واټن نږدې هماغسې پاتې شوی دی.
د ښځو د پراخ ګډون تر څنګ، سعودي عربستان په ځینو تخصصي برخو کې هم مخکښ ښکاري. دا هېواد د مصنوعي ځيرکتيا د امنیت، محرمیت او کوډېنګ په برخه کې د ۱۵ سلنې ونډې سره د مخکښو هېوادونو په ډله کې راغلی دی.
د بشري ځواک د جذب له پلوه هم سعودي عربستان له هغو محدودو هېوادونو څخه دی چې په ۲۰۲۵ کال کې یې ډېر شمېر کارکوونکي جذب کړي دي.
همداراز، د ټکنالوژۍ د سترو شرکتونو ترمنځ د ۵ میلیارده ډالرو یو تړون سعودي عربستان کې د مصنوعي ځيرکتيا د بنسټیزو جوړښتونو د پراختیا لپاره اعلان شوی دی. د دې ګام موخه په هېواد کې د دې ټکنالوژۍ د کارونې چټکتیا او په نړیواله کچه د هغې د رول پراخول ښودل شوي دي.
تمه ده چې دا پانګونه به د مصنوعي ځيرکتيا په نړیواله سیالۍ کې د سعودي عربستان دریځ لا پیاوړی کړي.
