د ناامنۍ دوام؛ د بلوچستان خضدار ولسوالۍ کې په ځانمرګي او وسلهوال برید کې ۱۲ کسان وژل شوي
د بلوچستان د خضدار ولسوالۍ په شهزاد ټاون سیمه کې د پاکستان پيپلز ګوند د ځايي مشر میر شفیق الرحمان مېنګل پر کور ځانمرګی او وسلهوال برید شوی، چې له امله یې لږترلږه ۱۲ کسان وژل شوي او تر ۱۰ ډېر ټپیان دي.
د پاکستاني چارواکو په وینا؛ برید هغه مهال شوی چې یوه ځانمرګي بریدګر له چاودېدونکو توکو ډک موټر د شفیق مېنګل د کور دروازې سره وجنګاوه. تر چاودنې وروسته څلور یا پنځه وسلهوال د کور انګړ ته ننوتل او ډزې یې پیل کړې.
چارواکو ویلي، شفیق مېنګل د برید پرمهال په کور کې و؛ خو له برید روغ وتلی دی. د هغه ساتونکو او پولیسو له بریدګرو سره نږدې درې ساعته نښته وکړه. د شفیق مېنګل ویاند ندیم الرحمان ویلي، په برید کې د هغه ۱۲ ساتونکي او ملګري وژل شوي دي.
د هغه په وینا؛ برید پنځو ځانمرګو بریدګرو ترسره کړی، یو یې د چاودېدونکو توکو ډک موټر ته چاودنه ورکړه، بل ځان ته چاودنه ورکړه او درې نور د نښتې پرمهال وژل شوي دي. پولیسو ویلي، په وژل شویو کې پنځه پولیس هم شامل دي.
د ټپیانو په ډله کې د شفیق مېنګل تره او د خضدار ولسوالۍ شورا مرستیال اقبال بلوڅ هم شامل دی. د پاکستاني رسنیو د راپورونو له مخې؛ شفیق مېنګل تر برید وروسته پولیسو ته اجازه ورنه کړه، چې سملاسي د پېښې ځای ته د پلټنو لپاره ننوځي.
هغه ادعا کړې، چې پولیس ناوخته ورسېدل او ده او ساتونکو یې یوازې د بریدګرو مقابله وکړه.
د برید مسوولیت د بلوڅانو ازادۍ پوځ (بي اېل اې) منلی او ویلي یې دي، چې برید د «مجید لوا» لهخوا ترسره شوی دی.
د بلوچستان سر وزیر سرفراز بګټي دغه برید غندلی او ویلي یې دي، چې شفیق مېنګل په زړورتیا له بریدګرو سره مقابله کړې ده. هغه امنیتي ادارو ته امر کړی، چې د برید عاملین او د هغوی همکاران ونیسي.
شفیق مېنګل د بلوچستان د پخواني لنډمهالي سر وزیر او پخواني وفاقي وزیر میر نصیر مېنګل زوی دی. نوموړی د پاکستان پيپلز ګوند غړی او د بلوڅ بېلتونپاله وسلهوالو ډلو سخت مخالف بلل کېږي. هغه او د کورنۍ غړي یې تر دې وړاندې هم څو ځلې د ورته بریدونو هدف ګرځېدلي دي.
