یوه طالب جنګیالي د طالب مشرانو او عامو خلکو د اولادونو ترمنځ د فرصتونو پر توپیر نیوکه کړې

نوموړي ویلي: «بېوزلي او بېکاري عيب نه ده، خو دا چې د مشرانو زامن خپل درسونه، دندې او کاروبارونه کوي، د عامو خلکو زامن د يوې ګولې ډوډۍ پسې ځانونه د مرګ تر پولې رسوي، په داسې حال کې چې دواړه د يو وطن بچيان دي».

هغه زیاته کړې چې د دې وضعیت په لیدو سره د عدالت په اړه جدي پوښتنې راپورته کېږي او پوښتنه یې کړې: «دلته هغه پوښتنه پيدا کېږي چې عدالت چېرته دی»؟

دا څرګندونې په داسې حال کې مطرح کېږي چې د طالبانو حکومت تل د عدالت، مساوات او د اسلامي نظام د اصولو پر بنسټ د چارو د پرمخ وړلو ادعا کوي، خو په وروستیو کلونو کې د ټولنیزو رسنیو له لارې د طالبانو د ځینو غړو له لوري د امتیازاتو، ګومارنو او د مشرانو د اولادونو د ځانګړو فرصتونو په اړه ورته نیوکې هم وخت ناوخت خپرې شوې دي.