د طالبانو د کورنیو چارو وزارت ویلي چې په ۱۲ ولایتونو کې یې د نشهيي توکو د قاچاق او پلور په تړاو ۶۰ کسان نیولي دي. له نیول شویو کسانو څخه لسګونه کیلوګرامه نشهيي توکي هم ترلاسه شوي دي.
د جاپان په ناګویا کې د ۲۰۲۶ کال د اسیايي لوبو په لړ کې د افغانستان د ووشو برخې پېژندل شوي لوبغاړي محمد خالد هوتک خپل یمني سیال امر محمد ته ماته ور کړې ده. هوتک په دغه بري د لوبو دویم پړاو ته لاره ومونده.
په کابل کې ځايي سرچینو افغانستان انټرنشنل ته وویل، چې د طالبانو استخباراتو د ځینو پخوانیو افغان چارواکو په کورونو کې مېشتو خلکو ته ویلي چې کورونه خالي کړي. د سرچینو په وینا، د طالبانو استخباراتو دغو کورنیو ته ویلي چې دا کار د مولوي هبت الله په امر کوي.
د طالبانو د کور او ښارجوړولو وزیر نجیب الله حیات حقاني د مزارشریف په دشت شور سیمه کې د کډوالو لپاره د ښارګوټي تفصیلي پلان لاسلیک کړی دی. د طالبانو د ښارجوړونې وزارت ویلي چې دغه ښارګوټی پر ۸۸۵۹ جریبه ځمکه جوړیږي.
د افغانستان کرکټ بورډ وايي، ابدالیان کرکټ ملي لوبډله د اسیايي اولمپیکي سیالیو په شلمه دوره کې د ګډون لپاره نن یکشنبه جاپان ته روانه شوې ده. کرکټ بورډ ویلي، چې افغان ابدالیان به راتلونکې پنجشنبه له کوربه هیواد سره د لوبې ډګر ته ووځي.
د پاکستان دفاع وزیر خواجه اصف وايي، چې له افغانستان نه د ناټو له وتلو وروسته یې تمه درلوده چې هېواد به یې خوندي شي، خو دده په وینا، اوس د پاکستان په « ۷۰ تر ۸۰ سلنه بریدونو کې افغانان» ښکیل دي. نوموړي ویلي، چې د اسلاماباد خلاف «د افغانانو دښمني» کمه شوې نه ده.
۲۳ کلنې افغانې فریبا هاشمي، چې په فاریاب کې یې له ویرې په نارینه جامو کې ورزش کاوه، د اسیايي لوبو د ښځو انفرادي «ټایم ټرایل» سیالۍ اووم مقام ګټلی. نوموړې ویلي، «په کوردننه مې ډېرې سختې ورځې تېرې کړې خو دا نه وایم چې زموږ خلک بد دي. موږ ډېر ښکلی هېواد لرو، خو ذهنیتونه متفاوت دي».
په ننګرهار کې د طالبانو رسنیز دفتر ویلي چې په جلال اباد ښار، بټي کوټ او کوټ ولسوالیو کې په دریو جلاجلا ترافیکو پېښو کې د ښځو او ماشومانو په ګډون ۷ تنه مړه شوي او یو بل ټپي دی.
د طالبانو په واک کې د افغانستان بانک وايي، له بازارونو یې د زړو بانکنوټونو د راټولولو او پر ځای یې د نویو نوټونو د وېش بهیر پیل کړی دی.
پخواني ولسمشر حامد کرزي او د سولې عالي شورا پخواني مشر عبدالله عبدالله د جمعیت اسلامي ګوند د بنسټګر برهان الدین رباني د پنځلسم تلین په مناسبت نوموړی سوله غوښتونکی شخصیت بللی دی.
د طالبانو د باخبره سرچینو له قوله، د سپټمبر پر ۱۱مه د پکتیا په ګرده څېړۍ کې د سراج الدین حقاني په کوربه توب ددې ډلې یو شمېر مشرانو ناسته کړې. په ناسته کې ملا برادر، حقاني، د طالبانو د وژل شوي مشر اختر محمد منصور زوی فتحالله منصور او یو شمېر نورو طالب چارواکو ګډون کړی و.
د طالبانو د امارتي شرکتونو رییس احمدجان بلال ایران ته د سفر پر مهال د دغه هېواد د کرنې له وزیر غلام رضا نوري سره لیدلي دي. یاد شرکت ویلي، چې د ایران د کرنې وزیر د افغانستان د سیلوګانو د بیارغونې په برخه کې همکاریو ته تیاری ښودلی.
روسي چارواکي وایي، اوکراین د دغه هېواد پر بېلابېلو سیمو د څه باندې زرو بېپیلوټه الوتکو بریدونه کړي، چې د مسکو ښاروال یې پر پلازمېنه تر ټولو لوی بریدونه بولي. په دغو بریدونو کې د تېلو یوې تصفیهخانې او د استوګنې یوې ودانۍ ته زیان اوښتی دی او دوه کسان پکې وژل شوي.
د پاکستان مالیې وزیر محمد اورنګزېب ویلي، راتلونکي لاریونونه او اعتراضونه د دغه هېواد اقتصاد ته هره ورځ شاوخوا ۱۲۰ میلیارده کلدارې، نږدې ۴۳۴ میلیونه ډالره زیان رسولی شي.
د افغانستان او پاکستان ترمنځ د سوداګریزو لارو له تړل کېدو سره سره، د کوټې د سبزۍ منډۍ یو سوداګر وایي چې افغان پیاز لا هم د بلوچستان له بېلابېلو غیررسمي لارو پاکستان ته انتقالېږي او د دغه هېواد په بازارونو کې پلورل کېږي.
نن د سپټامبر۲۰مه د پاکوالي له نړۍوالې ورځې سره برابره ده. افغانستان یو له هغو هېوادونو څخه دی چې د خځلو د سم مدیریت لپاره یو منظم سیستم نه لري او دې مسلې د خلکو پر ورځني ژوند، چاپیریال، او روغتیا مستقیم اغیز کړی دی.
د ترکیې د بهرنیو چارو وزیر هاکان فیدان وایي، د یمن د حوثیانو د بریدونو له امله ښايي سعودي عربستان پوځي مرستو ته اړتیا پیدا کړي، او انقره چمتو ده چې له ریاض سره د ترکیې، پاکستان او سعودي عربستان د درې اړخیز دفاعي تړون له مخې تخنیکي او پوځي مرستې وکړي.
برېټانوۍ ورځپاڼې «ډېلي مېل» د ریور په نوم د یوې افغانې ښځې کیسه خپره کړې چې وايي، په ۲۰۱۴ کال کې یې د طالبانو د یوه برید پر مهال ځان مړ اچولی و او له پېښې ژوندۍ وتلې ده. نوموړې وروسته له افغانستانه وتلې او سږ کال د اېورسټ څوکې ته د ختلو لومړنۍ افغانه ښځه شوې ده.
د طالبانو د امر بالمعروف وزارت ویاند سیفالرحمن خیبر د ښځو د وضعیت په اړه د بېلابېلو بنسټونو څرګندونې رد کړي او ادعا یې کړې چې د دوی له خوا په افغانستان کې ښځو ته داسې ټولنیز حقوق ورکړل شوي چې د دغه هېواد په تاریخ کې ساری نه لري.
له ګوزڼ د پاک افغانستان بنسټ وايي، ټاکل شوې ده چې سبا دوشنبه به په ټول افغانستان کې د ګوزڼ ناروغۍ (پولیو) ضد واکسین کمپاین پیل شي.
د پېښور عالي محمکې د یوه افغان وګړي فیاض او د هغه د ماشومانو جبري ایستل ودرول او د پاکستان د هویت د ثبت ادارې نادرا ته یې امر وکړ چې په شپږو میاشتو کې د هغوی د اسنادو په اړه پرېکړه وکړي. دا پرېکړه د قاضي وقار احمد او قاضي فرح جمشید په مشرۍ وشوه.