طالبانو ته نږدې رسنۍ حریت راډیو، د شنبې په ورځ د وږي په ۱۴مه راپور ورکړی، چې په بدخشان کې یو استرالیایي وګړی مړ شوی دی. خپلواکو سرچینو د دغه استرالیایي وګړي د مړینې د لامل په اړه څه نه دي ویلي، خو یادې رسنۍ لیکلي، چې استرالیايي وکړی د «زړه حملې» له امله خپل ژوند له لاسه ورکړی.
د پاکستان د پنجاب اعلی وزیرې مریم نواز ویلي، چې دغه صوبه د ګاونډیو صوبو له لوري له امنیتي ګواښونو سره مخ ده. د مریم نواز دغه څرګندونو ته محسن دواړ سخت غبرګون ښودلی او وايي چې خیبر پښتونخوا ته بیا د پنجاب د ملکي او پوځي «اشرافو» لهخوا ګواښونه متوجې دي.
د اسلامي حزب د رهبرۍ شورا غړي جمعه خان همدرد د دغه ګوند د مشر ګلبدین حکمتیار وروستۍ څرګندونې د هغه شخصي نظر بللی او زیاته کړېې یې ده، چې دا ډول څرګندوې په اوسنیو شرایطو کې د ستونزو د حل لاره نه ده.
د طالبانو د کانونو او پټرولیم وزارت ویلي، چې هدایتالله بدري د سعودي عربستان د دلتا نړیوالې کمپنۍ له اجراییوي رییس شاهر التقي سره د لیدنې پرمهال د افغانستان د نفتو او ګازو د تفحص، اکتشاف او استخراج په برخه کې د پانګونې او همکاریو په اړه غږېدلي.
د پاکستان تر واک لاندې کشمیر د باغ ولسوالۍ په کوپره سیمه کې د پولیسو پر یوې پوستې د وسلهوالو په برید کې یو پاکستانی سرتېری وژل شوی دی. ځايي مسولینو ویلي چې په ځوابي برید کې یو وسله وال برید ګر هم وژل شوی دی.
د طالبانو د ننګرهار ولایت د کرنې ریاست مسوولان وایي، چې سږکال به د دغه ولایت د جڼغوزیو له طبیعي ځنګلونو څخه ۱۴۰ مټریک ټنه حاصلات راټول شي. د دوی په خبره د جڼغوزیو حاصلات کې به د تېر کال په پرتله ۵۵ زیاوالی راشي.
طالب ځواکونو د شنبې په ورځ، د وږي په ۱۴مه، په کابل کې د خاتمالنبیین دینې مدرسه محاصره کړې او له مسوولانو او زده کوونکو یې غوښتي چې د مدرسې له ودانۍ ووځي. د سرچینو په وینا، د طالبانو د عدلیې وزارت اړوند ګڼ ځواکونه له پوځي تجهیزاتو سره د دغه دینې مرکز په شاوخوا کې ځای پر ځای شوي.
ځايي پولیسو ویلی چې ناپېژاندو وسله والو د خیبر پښتونخوا په سویلي ټانک ولسوالۍ کې د هلکانو یو دولتي ښوونځی په بمونو الوځولی دی. پولیس وايي، په پېښه کې چاته مرګژوبله نه ده اوښتې.
د ایران تسنیم خبري اژانس راپور ورکړی چې امریکايي ځواکونو د خارګ ټاپو کې د بېړو تنځای ته نږدې د ایران پر یوې تېل لېږدونکي بېړۍ څلور توغندیز بریدونه کړي دي، خو په یادو بریدونو کې چاته مرګژوبله نه ده اوښتې.
باوري سرچینو افغانستان انټرنشنل ته ویلي چې طالبانو د بدخشان ولایت هوایي ډګر ته څېرمه، د «بېپیلوټه الوتکو د عملیاتو یو مرکز» جوړ کړی دی. دغه مرکز په فیضاباد ښار او د بدخشان په څو ولسوالیو کې د تاوتریخوالي له زیاتېدو، د مخالفانو له بریدونو او وسلهوالو نښتو وروسته جوړ شوی دی.
د طالبانو د بهرنيو چارو وزارت وايي، امیر خان متقي او د روسیې سفیر دیمیتري ژیرنوف د لیدنې پر مهال د سیمې د وضعیت، د دوهاړخیزو اړیکو د لا پراختیا او پیاوړتیا په اړه غږېدلي دي.
د طالبانو د کورنیو چارو وزارت ویلي، چې په تېرو ۲۴ ساعتونو کې یې په فاریاب، نورستان، هلمند، نیمروز، غزني او فراه ولایتونو کې د غلا، قتل او قمار په تور ۱۶ تنه نیولي دي.
د طالبانو له لوري پر رسنیو او په ځانګړي ډول پر ښځینه خبریالانو د محدودیتونو له پراخېدو سره، ګڼ شمېر تجربه لرونکې خبریالانې له خپل مسلک لرې شوې دي. ډېری یې بېکاره دي او ځینې نورې د اقتصادي ستونزو له امله له خبریالۍ سره هېڅ تړاو نه لرونکو کارونو ته اړې شوې دي.
د امریکا هډسن انسټیټیوټ په یوه تازه راپور کې ویلي چې د افغانستان په شمال ختیځ بدخشان ولایت کې د طالبانو پر وړاندې د وسلهوال مقاومت وروستۍ هڅې ښايي د پراخ او منظم مقاومت د پیل نښې وي.
د اټومي انرژۍ نړیوالې ادارې ویلي چې د اوکراین د زاپوریژیا اټومي بټۍ ته د برېښنا د بېرته رسولو لپاره د زیانمن شوي برېښنايي مزي د ترمیم په موخه یو بل سیمهییز لنډمهاله اوربند نافذ شوی، ځکه دا بټۍ له څه مودې راهیسې د برېښنا د نشتوالي له جدي خطر سره مخ ده.
د افغانستان د سوداګرۍ او پانګونې خونه وایي، چې کام ایر هوايي شرکت هندوستان ته د تازه او وچو مېوو د هوايي کارګو صادراتو لپاره ۱،۵ امریکایي ډالر پر یو کیلو ګرام، ځانګړې تخفیفي بیه ټاکلې ده.
د طالبانو د هوا پېژندنې ادارې د افغانستان په ۱۰ ولایتونو کې د سختو اورښتونو، سیلابونو راوتلو او تالندې اټکل کړی دی. یادې ادارې زیاته کړې، چې ښايي نن په بدخشان، نورستان، کونړ، لغمان، کاپیسا، ننګرهار، لوګر، پکتیا، خوست او پکتیکا، ولایتونو کې باران ووریږي او سیلابونه راووځي.
په پنجشېر کې د طالبانو د کرنې، اوبولګولو او مالدارۍ ریاست وایي چې سږ کال د تېر کال پرتله په دغه ولایت کې د بادامو د حاصلاتو کچه ۸ سلنه لوړه شوې ده.
د طالبانو تر واک د کورنیو چارو وزارت خبر ورکړی چې د فاریاب ولایت امنیې قوماندانۍ د نشهیي توکو پر وړاندې د مبارزې مدیریت، د سوالګرو راټولولو له کمېسیون سره په همغږۍ، د دغه ولایت مرکز میمنه ښار کې یو تن مسلکي سوالګر له سل زره زیاتو افغانیو سره نیولی دی.
د افغانستان جمهوریت جبهې ادعا کړې چې جنګیالیو یې د کابل ښار په دیارلسمه امنیتي حوزه کې د طالبانو پر یوې پوستې برید کړی او د طالبانو د رینجر موټر ته یې دوه لاسي بمونه ورغورځولي دي.
ایشیا ټایمز په یوه راپور کې وايي، د طالبانو دننه د افغانستان د کانونو پر عوایدو او کنټرول سیالۍ، د دې هڅو پر وړاندې خنډ دي چې غواړي امریکايي او نور بهرني پانګوال د هېواد د معدني زېرمو استخراج ته وهڅوي، او له همدې امله د کانونو سکتور له جدي سیاسي خطرونو سره مخ دی.