آرشیف

رویټرز خبري اژانس وایي،‌ اسراییل په لوېدیځه غاړه کې د یوه هوایي برید په ترڅ کې د حماس ډلې یو غړی او د هغه دوه ملګري وژلي دي. د اسراییل پوځ او سیمه‌ییزو سرچینو ویلي، چې دغه هوایي برید د جمعې په ورځ د لوېدیځې غاړې په شمال کې د جنین په سیمه کې یو موټر په نښه کړی دی.

د لبنان د حزب‌الله مشر نعيم قاسم وویل، په فلسطین، لبنان، عراق، یمن او د سیمې په نورو برخو کې د «مقاومت» په نوم یادېدونکې ډلې د ایران ترڅنګ ولاړې دي او په وینا یې، د دغو ډلو پر ضد پوځي، اقتصادي او تبلیغاتي فشارونه به څه پایله ورنه‌کړي.

د امریکا ولسمشر ډونالډ ټرمپ اعلان وکړ، چې هېواد یې له وېنزوېلا سره د تېلو یو مهم تړون لاسلیک کړی دی. د دغه تړون له‌مخې به امریکا د امریکایي مالیه ورکوونکو لپاره له هېڅ ډول لګښت پرته، د وېنزوېلا د څه باندې ۶۵ میلیارده بېرله تېلو د زېرمو د اکثریت برخې کنټرول ترلاسه کړي.

د بلوچستان اعلی وزیر سرفراز بګټي د مستونګ سیمې بڼوالو ته خبرداری ورکړی، که د هغوی له بڼونو د دوی پر ځواکونو د وسله‌والو بریدونه دوام وکړي، نو یا به له دې سیمې کډه کوي او یا به یې بڼونه له‌منځه یووړل شي. هغه د مستونګ اوسېدونکو ته ګوت‌څنډه کړې: «په دې سره تاسو بې‌ګناه نه‌یاست».

د امریکا د بهرنیو جګړو د پخوانیو سرتېرو سازمان ویلي، هغه پرېکړې چې افغانستان کې د جګړې د پای او د امریکايي ځواکونو د وتلو لامل شوې، باید په غور سره وڅېړل شي. دغه سازمان ټینګار کړی، افغانستان کې د ۲۰ کلونو جګړې پر مهال ترلاسه شوې تجربې باید د امریکا راتلونکو عملیاتو کې وکارول شي.

د طالبانو ویاند ذبیح‌الله مجاهد د هند او پاکستان ترمنځ د احتمالي ناندریو په اړه ویلي، چې جګړه د هېچا په ګټه نه‌ده او دوی په سیمه کې د سولې غوښتونکي دي. نوموړي زیاته کړې، چې افغانستان په خپله له جګړو ډېر زیانمن شوی او نه‌غواړي چې په سیمه کې بل هېواد له جګړې او بې‌ثباتۍ سره مخ شي.

د ملي ډیموکراټیک غورځنګ مشر مُحسن داوړ پاکستان کې د نویو ایالتونو د جوړولو روانې هڅې رد کړې او دا پروسه یې «عسکري» وبلله. نوموړي ویلي: «موږ د انګرېز راکښلې کرښه [ډيورند] نه‌ده منلې او د ایالتونو وېش به هم ونه‌منو». د ډیورند دواړه غاړه پښتانه ډیورند کرښه د انګرېز راکښلې کرښه بولي.

د روسیې د بهرنیو چارو وزیر امریکا تورنه کړې، چې د ۲۰۰۱ کال د سپټمبر ۱۱مې له بریدونو وروسته یې د «ترهګرۍ» پر له‌منځه وړلو د تمرکز پر ځای پرېکړه وکړه، چې افغانستان کې خپل پوځي حضور وساتي. هغه ویلي، مسکو د امنیت شورا د پرېکړې له‌مخې له «ترهګرۍ» سره د مبارزې لپاره همکاریو ته چمتو وو.

د لغمان لپاره د طالبانو د والي ویاند عبدالمالک نیازی وايي، نن مازدیګر (جمعه د وږي ۶مه) شاوخوا ۵ بجې د دغه ولایت په مرکز کې د شوې چاودنې له امله ۱۴ ولسي وګړي ټپیان شوي دي. د نوموړي په وینا، د لومړنیو ارزونو له‌مخې، دغه پېښه د یوې ریکشا د ګاز ډبې د چاودنې له امله رامنځته شوې ده.

د ایران ولسمشر په یوې ټلویزیوني مرکه کې د سیمې له هېوادونو سره د اړیکو پر پراختیا او د بهرنیو فشارونو پر وړاندې پر کورني یووالي ټینګار وکړ. هغه وویل، اداره به یې له افغانستان، پاکستان، عربستان، ترکیې، امارات، قطر، عمان، اذربایجان، ترکمنستان او نورو هېوادونو سره هوکړې ته ورسېږي.

په هرات کې د یوې چاودنې راپور ورکړل شوی دی. دوو سرچینو افغانستان انټرنشنل ته ویلي، چې دا پېښه کېدای شي د طالبانو پر یوه لوړپوړي قومندان قاري عطاالله غورماچي هدفي برید وي.

د خیبر پښتونخوا په سويلي لکي‌مروت ولسوالۍ کې د پولیسو د سولې کمېټې په پېښور کې د یادې کمېټې د یوه سرتېري د ورکېدو یا تښتول کېدو په غبرګون کې لاریون وکړ او له امله یې په لکي‌مروت ښار کې ورځنۍ چارې ټکنې شوې وې.

د ایران ولسمشر مسعود پزشکیان وویل، که امریکا د اسلام‌اباد په هوکړه‌لیک کې خپلې ژمنې عملي کړي، د هرمز تنګی به پرانېستل شي. هغه همداراز له دې اوب‌لارې د کښتیو د تګ‌راتګ په تړاو د ایران او عمان ترمنځ له هوکړې خبر ورکړ.

د افغانستان د خبریالانو مرکز په کابل کې د موبی‌ګروپ اړوند د لاپیس رسنیز دفتر تړل کېدل غندلي او د دغه دفتر د بیا پرانېستلو غوښتنه یې کړې ده. د طالبانو اړوند یوې رسنۍ ادعا کړې، چې دغه دفتر باربُد، فضا او دریا رسنیو لپار د مطالبو د برابرولو له امله تړل شوی دی.

د افغانستان د جګړې د څېړنې کمېسیون د ۵شنبې په ورځ اعلان وکړ، چې د دغه بنسټ د کار موده د یوه بل کال لپاره غځول شوې ده. دا کمېسیون وايي، د افغانستان د ۲۰ کلنې جګړې په اړه یې وروستی راپور به د ۱۴۰۶ کال په وږي میاشت کې خپور شي. دغه کمېسیون د امریکا کانګرس په ۱۴۰۰م کال کې جوړ کړی دی.

د پاکستان د پلازمېنې اسلام اباد د عالي محکمې يوه قاضي د افغان محصلينو د تحصيلي ويزو د تمدېدو د څرنګوالي د قضيې په اورېدنه کې ويلي، « موږ دا مهال له افغانستان سره د جګړې په حالت کې یو او افغانستان دښمن هېواد دی».

د وژل شوي سوداګر یوه خپلوان افغانستان انټرنشنل ـ پښتو ته وویل، چې د تېلو او ګازو یو سوداګر حاجي نقیب‌الله علي‌خېل د کابل د قمبر څلورلارې کې د طالبانو د یوې پوستې د عسکر له‌خوا په ډزو وژل شوی دی. طالبانو لا تر اوسه په دې تړاو څه سپیناوی نه‌دی کړی.

د پاکستان په لوی اقتصادي ښار کراچۍ کې د افغان کډوالو د نیولو په عملیاتو کې له ۳۰ ډېر هغه پاکستاني پښتانه هم نیول شوي چې د پاکستان پېژندپاڼې لري، خو د معلوماتو له مخې لا هم په توقیفي کمپونو کې ساتل کېږي.

د پنجشېر په مرکز کې د ۱۲۰ ځوانو ورزشکارانو په ګډون د غېږ نیونې یا پهلوانۍ د غوراوي سیالۍ پیل شوې دي. د طالبانو د المپیک، بدني روزنې او سپورټ ریاست په یوې خبرپاڼه کې ویلي، چې دا سیالۍ د پنجشېر د سپورټ امریت او د پهلوانۍ فدراسیون په همکارۍ جوړې شوې دي.

د افغانستان د کرېکټ نامتو ستوري راشد خان په نیپال کې د وروستیو ویجاړونکو سېلابونو له امله پر اوښتو ځاني او مالي زیانونو ژور خپګان څرګند کړی دی. نوموړي په خپله اېکس‌پاڼه کې لیکلي، چې په دغه هېواد کې د سېلابونو له امله د خلکو زیانونه زړه بوږنوونکي دي.

سکای‌نیوز راپور ورکړی چې د نړیوالو مرستو کمېدو او د طالبانو انزوا تر ټولو ډېر پر ښځو او ماشومانو اغېز کړی دی. راپور وايي، د کابل په اندرا ګاندي روغتون کې هره ورځ تر شپږو پورې ماشومان خپل ژوند له لاسه ورکوي.