د طالبانو مشر مولوي هبت الله اخوندزاده د کندهار ښار او د ولسوالیو له یو شمېر دیني عالمانو او قومي مشرانو سره په غونډه کې د اسلامي نظام د ټینګښت او پیاوړتیا په اړه خبرې کړې او له علماوو یې غوښتي چې د دغه نظام په ملاتړ کې ونډه واخلي.
د طالبانو د کډوالو او راستنېدونکو چارو وزارت چارواکي د کډوالۍ نړۍوال سازمان له استازي سره د کډوالو د ستونزو د حل او همکاریو پیاوړتیا په اړه غږېدلي دي. دواړو لوریو له راستنېدونکو سره د مرستو او د همکاریو پر دوام ټینګار کړی دی.
د طالبانو د عامې روغتیا وزارت ویلي، د هلمند ګرشک ولسوالۍ کې د خصوصي روغتیايي مرکزونو د څارنې پر مهال ۹ روغتیايي مرکزونه او درملتونونه د روغتیايي مقرراتو د نه مراعت، د قانوني جواز نشتوالي او نورو نمیګړتیا امله تړلي دي.
د هند د اپوزیسیون ګوندونو د چارشنبې په ورځ د پوهنې وزیر د استعفا غوښتنه وکړه. د اپوزیسیون غړو د محصلانو د اعتراضونو ملاتړ اعلان کړی او د پارلمان تالار ته له ننوتلو وروسته یې د ازموینو د پوښتنو د افشا کېدو او د محصلانو پر وړاندې د پولیسو د چلند په اړه د بحث غوښتنه وکړه.
د امریکا د بهرنیو چارو وزیر مارکو روبیو د فیلیپین په پلازمېنه مانیلا کې د اسهان سرمشریزې په څنډه کې ویلي، چې ایران له یوې لویې ستونزې سره مخ دی. د هغه په وینا؛ ایران د هرمز تنګي د پرانیستې په اړه د تفاهملیک له مهمې مادې سرغړونه کړې ده.
د طالبانو د معیار او کیفیت ادارې ویلي، د نیمروز په بندر کې یې دڅه باندي ۱۲۵ ټنه غیرمعیاري لمریزو هندارو واردېدو مخه نیولې ده. یادې ادارې زیاته کړې دغه لمریزو هندارو له کورنیو معیارونو سره سمون نه درلود.
د افغان محصلینو ټولنې مشر صدیق شریعتي افغانستان انټرنشنل پښتو ته ویلي، نږدې یو کال کېږي چې افغان محصلینو په پاکستان د خپلو تحصیلي ویزو د غځولو غوښتنلیکونه سپارلي؛ خو تراوسه یې نه ویزې تمدید شوې او نه هم ورته کوم رسمي ځواب ورکړل شوی دی.
د ملګرو ملتونو د سرمنشي ویاند اعلان کړی، چې د نورستان د وروستیو سېلابونو له امله تر ۴۰ ډېر کسان مړه شوي او یوشمېر نور لاهم تري تم دي. سټیفان دوجاریک زیاته کړې، چې د لټون او ژغورنې عملیات روان دي.
د افغان کډوالو له پراخو شکایتونو وروسته نن یو وار بیا د خیبر پښتونخوا په خیبر ولسوالۍ کې پولیسو د افغان کډوالو لپاره د لنډي کوتل په لنډمهاله پنډغالي کې له افغان کډوالو د بډې اخیستنې په تور پنځه کسان نیولي دي.
یوه افغانه انجنیره نجلا احمدیار چې په ۲۰۲۱کال کې د طالبانو له بیا واکمنېدو وروسته د اېرلنډ کورک ښار ته کډه شوې وایي، اوس غواړي له هغه افغان ښځو سره مرسته وکړي چې له زدهکړو او کاري فرصتونو بېبرخې شوې دي.
د طالبانو تر کنټرول لاندې د کډوالو ستونزو ته د رسېدنې عالي کمېسیون ویلي، چې د سېشنبې په ورځ له بېلابېلو لارو ۲زره او ۹۶۴ کډوال هېواد ته ستانه شوي او همداراز ۳زره او ۷۱۷ کورنۍ خپلو مېنو ته لېږدل شوې دي.
د پاکستان او ایران د کورنیو چارو وزیرانو د افغانستان له پولې د «ترهګرۍ، د نشهیي توکو قاچاق، ناقانونه کډوالۍ او انساني قاچاق» د مخنیوي لپاره د ګډې تګلارې پر جوړولو هوکړه کړې ده.
د افغانستان د سوداګرۍ او پانګونې خونې د عامه اړیکو مشر احسان الله احسان وایي، د امریکا او ایران ترمنځ جګړې او په منځني ختیځ کې کړکېچ د کابل او تهران ترمنځ پر سوداګرۍ کومه اغېزه نهده کړې. نوموړی وايي، د دواړه هېوادونو ترمنځ صادرات او واردات په عادي ډول دوام لري.
د خېبر پښتونخوا د مومندو ولسوالۍ مامد ګټ سیمې ته نږدې د پاکستان د امنیتي ځواکونو د ماین شنډولو پر یوې ډلې د دندې پرمهال چاودنه شوې، چې له امله یې درې سرتېري وژل شوي او څلور نور ټپیان دي.
د افغان محصلانو ټولنې د پاکستان د لاهور د کېنګ اېډورډ طبي پوهنتون له هغو افغان محصلانو، ډاکټرانو او د لیلیې اوسېدونکو څخه د خونې د خالي کولو پر پرېکړه اندېښنه ښودلې، چې ویزې یې نهدي غځول شوې.
په هرات کې د طالبانو رسنیز دفتر وایي، تېره شپه د اسلامکلا بندر له لارې افغانستان ته د اوبلن ګاز ۱۰۵ لوی واګونه وارد شوي او د دغه ولایت لپاره د طالبانو د والي اسلام جار په لارښوونه د یو کیلو اوبلن ګاز بیه ۵۵ افغانۍ ټاکل شوې ده.
رویټرز خبري اژانس د یوې باخبره سرچینې په حواله راپور ورکړی، چې پاکستان د خپلو بهرنیو اسعارو د زېرمو پیاوړتیا او پر خپل اقتصاد د فشار د کمښت لپاره له امریکا نه د ۱۰ مېلیارد ډالرو مالي مرستې غوښتنه کړې ده.
د افغانستان پخوانی ولسمشر حامد کرزی چې د ۲۰۲۱کال په اګست میاشت کې د جمهوریت تر پرځېدو وروسته په کابل کې پاتې شوی، د طالبانو لهخوا تر سختو محدودیتونو لاندې دی او ان خپل ولایت ته د تګ اجازه نهلري.
د ملګرو ملتونو د بشري چارو د همغږۍ دفتر (اوچا) ویلي، د افغانستان په ختیځ کې د سختو بارانونو او ناڅاپي سېلابونو له امله د نورستان، ننګرهار او لغمان ولایتونه سخت ځپل شوي چې تر ټولو ډېر زیان د نورستان مرکز پارون ښار ته اوښتی دی.
د عوامي نشنل ګوند د خیبر پښتونخوا څانګې مشر میا افتخار ویلي، د سیمې خلک له تېرو پنځوسو کلونو راهیسې پوهېږي چې په افغانستان او سیمه کې روانه جګړه تصادفي نهده؛ بلکې د منظم کاروبار، د لویو قدرتونو د لاسوهنو او شخصي ګټو له امله دوام لري.
په هرات کې د طالبانو رسنیز دفتر خبر ورکړی، د روان زېږدیز کال له پیل راهیسې له هرات نه جرمني ته تر ۱۰ زره متره مربع ډېرې لاسي اوبدل شوې غالۍ چې ټولیز ارزښت یې ۱۰۳زره امریکایي ډالرو ته رسېږي؛ صادرې شوې دي.