د امریکا د دفاع وزیر پیټ هېګسېت ویلي، چې متحده ایالاتو د هند سره ۱۰ کلن دفاعي تړون لاسلیک کړی دی. د رویټرز راپور له مخې، هېګسېت له خپل هندي سیال راج نات سنګ سره له لیدنې وروسته پر اېکس لیکلي، چې دا تړون د سیمهییز ثبات لپاره بنسټیز اهمیت لري.
د طالبانو د سرحدي پولیسو ویاند عبادالله فاروقي وايي، چې سبا د پاکستان له خوا د تورخم دروازه یوازې د ګډوالو لپاره پرانېستل کېږي. نوموړي پر اېکسپاڼه لیکلي:«هېوادوال او مسافرین دې تورخم ته سفر نه کوي، ځکه د پاکستان لورې له قوله دروازه یوازې د کډوالو لپاره پرانېستل کېږي.»
د افغانستان د کرېکټ ملي لوبډلې د زمبابوې کرېکټ ملي لوبډلې ته په دویمه شل اوریزه لوبه کې د ۷ ویکټو په توپیر ماته ورکړه. د لوبې پچه زمبابوې لوبډلې ګتلې وه او افغان لوبډلې ته یې د ۱۲۶ منډو هدف ورکړی و.
د طالبانو د مخابراتو او ټېکنالوژۍ وزارت ویاند عنایت الله الکوزی وايي، افغانستان کې دمګړۍ ۲۶ میلیونه فعال سیمکارټونه موجود دي. د نوموړي په وینا د افغانستان شاوخوا ۸۵ سلنه جغرافیه تر مخابراتي پوښښ لاندې ده.
د پاکستان د دفاع وزیر خواجه اصف ویلي، تر څو چې افغان طالبان د ټی ټي پي له ملاتړ نه لاس نه وي اخیستی، تر هغو به د کابل او اسلام اباد اړیکې عادي نه شي. نوموړي ویلي، چې د ټي ټي پي یو شمېر غړي په افغانستان کې اوسیږي او پاکستان ته یې د ننوتو مخه باید ونیول شي.
د قومي وطن ګوند مشر او د پاکستان د کورنیو چارو پخواني وزیر افتاب احمد خان شیرپاو ویلي، چې د پاکستان او طالبانو ترمنځ د خبرو اترو بیاپیل او د اوربند دوام د دواړو هېوادونو ترمنځ د سولې او ثبات د ټینګېدو هیلې پیاوړې کړې دي.
د اوکراین د امنیتي خدماتو ادارې مشر واسیلي مالیوک وايي، اوکراین په روان کال کې تردې مهاله د روسیې د تېلو او انرژۍ پر ۱۶۰ تاسیساتو بریدونه کړي دي. نوموړي زیاته کړې چې دغه ډول برېدونو ته به دوام ورکړي.
په تورخم کې د طالبانو د «عمري» پنډغالي مسوولینو ویلي، چې له پاکستانه د افغان کډوالو د احتمالي بیروبار د مدیریت له ستونزو د مخنیوي لپاره یې له وړاندې په تورخم کې لازم چمتووالی نیولی دی.
د پاکستان د بهرنیو چارو وزارت ویاند طاهر اندرابي ویلي، اسلام اباد هیله لري چې د نومبر په ۶مه له طالبانو سره پیلیدونکي درېیم پړاو مذاکرات به مثبته پایله ولري.
د طالبانو د کډوالو او بېرته راستنېدونکو چارو وزارت ویلي چې پرون د نيمروز د ورېښمو پله له لارې ۸۱، د هرات د اسلام کلا له لارې ۶۹، د کندهار د سپين بولدک له لارې ۱۱۰۸ او د هلمند د بهرامچې له لارې ۱۶۳ کورنۍ هېواد ته راستنې شوې دي.
د هند د تېلو ستر تصفیه کوونکي شرکت اېنډین اېل کارپورېشن یو ځل بیا له یوشمېر روسي شرکتونو څخه خام تېل پېرلي دي. د راپورونو له مخې؛ دغه روسي شرکتونه د واشنګټن له لوري د بندیزونو سره نهدي مخ.
په ملګرو ملتونو کې د افغانستان د دایمي استازولۍ سرپرست نصیر احمد فایق خبرداری ورکړی، چې په افغانستان کې اوسنی نازک او کاواکه وضعیت د سیمې او نړۍ امنیت لپاره جدي پایلې لرلای شي.
د طالبانو تر واک لاندې افغاني سرې میاشتې ټولنې ویلي، د وچکالۍ له کبله د بزګرانو سره د مرستې په پار یې په کونړ ولایت کې پر ۱۰۰۰بزګرو ۲۵مېلیونه افغانۍ نغدي مرسته وېشلې ده. یاده اداره وایي، دا لړۍ ټولو ولسوالیو کې پیل شوې او موخه یې د کروندګرو د کرنیزو محصولاتو پیاوړتیا او ملاتړ دی.
بېلابېلو سیاسي مشرانو، د خواله رسنیو کاروونکو، افغانانو او طالب چارواکو د فوټسال په اسیا جام سیالیو کې د افغانستان د تنکیو ځوانانو د فوټسال ملي لوبډلې اتلولي ستایلې ده.
د طالبانو تر واک لاندې ملي ټلوېزیون یوه ویډیو خپره کړې، چې پهکې یو تازه ستون شوی افغان کډوال د پاکستاني پولیسو له چلند او بډو اخیستو نه شکایت کوي. د عبدالکریم په نوم دغه کس وایي، پاکستاني پولیس د دغه هېواد بېلابېلو ایالتونو کې افغانان ځوروي او په زوره ترې پیسې اخلي.
په افغانستان کې د ملګرو ملتونو مرستندویه ماموریت (یوناما) د افغان ښځو پر فعالې ونډې ټنیګار کړی دی. یوناما ویلي، چې په سیاسي، اقتصادي او ټولنیزو چارو کې د افغان ښځو حضور د افغانستان د ثبات، مشروعیت او نړۍوال باور رامنځته کولو لپاره بنسټیز ارزښت لري.
د امریکا ولسمشر ډونالډ ټرمپ د ۲۰۲۶کال لپاره د کډوالو د منلو کچه ۷۵۰۰ ته راټیټه کړه. دغه شمېره په امریکا کې د کډوالو د منلو تر ټولو ټیټه کچه بلل شوې ده.
نن د ۲۰مې ورځې لپاره هم د ډیورنډ کرښې په اوږدو کې له پاکستان سره د افغانستان ټولې لارې تړلې دي او د خلاصېدو په اړه یې کوم څرک نه لیدل کېږي. په پاکستان کې له کورونو اېستل شوي افغان کډوال شکایت کوي، چې نه افغانستان ته ستنېدای شي او نه هم په پاکستان کې سرپناه لري.
د حماس وسلهوالې ډلې د پنجشنبې په ورځ د (لړم ۸مه) اسراییل ته دوه هغه جسدونه سپارلي، چې تر یرغمل کېدو وروسته په غزه کې وژل شوي وو. دغه مړي په داسې حال کې سپارل شوي، چې لا هم پر غزې د اسراییل هوایي او ځمکني بریدونه دوام لري.
خوست کې د طالبانو ولایتي ویاند مستغفر ګربز وایي، په نادرشاه کوټ ولسوالۍ کې ۶۵بېلابېلې رغنیزې او پراختیایي پروژې پیل شوې چې ټول ټال ارزښت یې ۱۵۵ مېلیونه افغانۍ کېږي. هغه وایي، دغه پروژو کې استنادي دېوالونه، کانالونه، سړکونه، پلچکونه او د اوبو رسونې شبکې شاملې دي.
هرات کې د طالبانو رسنیز دفتر وایي، په دغه ولایت کې د راستنو شویو کډوالو لپاره د یوه ښارګوټي د نومرو د وېش چارې پیل شوې دي. په هرات کې د طالبانو والي مولانا اسلام جار ویلي، د ښارګوټي د نومرو د وېش بهیر په عادلانه توګه مخته وړي او ورسره به د راستنو شویو کډوالو ستونزې هم اوارې شي.