د پاکستان د اطلاعاتو وزارت وايي چې د یاد هېواد هوايي دفاع د خیبر ولسوالۍ په شینکو سیمه کې د طالبانو ډرون الوتکه کشف او نسکوره کړې ده. یاد وزارت ویلي، ډرون په چټکۍ سره کنټرول شوی او هیڅ مرګ ژوبله نه لري.
د جاپان د بهرنیو چارو وزارت خبر ورکړی، چې د یوه جاپاني شرکت اړوند تېل وړونکې بېړۍ له هرمز تنګي څخه په خوندي ډول تېره شوې او له فارس خلیج نه وتلې ده. د یاد وزارت په خبرپاڼه کې راغلي، چې دغه بېړۍ په فارس خلیج کې د جګړې له امله درېدلې وه او اوس د جاپان په لور خوځېدلې ده.
د پاکستان د جمعیت علمای اسلام ګوند مشر مولانا فضل الرحمان د افغانستان او ایران پر وړاندې د پاکستان د ځینو سیاستونو په اړه نیوکه کړې او هغه یې ناسم بللي دي. نوموړي یو ځل بیا د طالبانو او پاکستان ترمنځ د ستونزو د حل لپاره پر خبرو اترو ټینګار کړی دی.
په بدخشان کې د طالبانو لهخوا د سرو زرو کانونو بندېدو او د خلکو د اعتراضونو او ناراضۍ اړوند د افغانستان انټرنشنل- پښتو راپور تر خپرېدو وروسته یادې ډلې ویلي، په بدخشان کې د سرو او سپينو زرو کانونو د کېندنې لړۍ په لنډمهالي ډول درېدلې چې اوس یو وار بیا پيلېږي.
د ملګرو ملتونو د کډوالو عالي کمېشنرۍ خبر ورکړی، چې د ۲۰۲۳کال له وروستیو میاشتو راهیسې تر ۶ مېلیونه ډېر افغانان خپل هېواد ته ستانه شوي دي. د یاد سازمان په وینا؛ له دې ډلې نیمایي یې له کلونو جلاوطنۍ وروسته خپل هېواد ته ستانه شوي، چې ان د افغانستان اړوند اسناد هم نهلري.
په کاپیسا کې د طالبانو د کرنې، اوبو لګولو او مالدارۍ ریاست وایي، چې سږکال د دغه ولایت د غنمو حاصلات د تېرکال پرتله دوه سلنه زیات شوي دي. د یاد ریاست په وینا؛ د غنمو سږني حاصلات د راتلونکي کال تر پایه د یاد ولایت د شاوخوا ۴۰ سلنه اوسېدونکو اړتیاوې پوره کولی شي.
د غور یوه اوسېدونکي افغانستان انټرنشنل ته په رالېږلي پیغام کې ویلي، د یاد ولایت ښاروالۍ په ۱۳۸۱کال کې د ښار دننه د څلورم پلان سیمه پر خلکو ووېشله چې له هغه وخت راهیسې ۲۰ کاله تېر شوي؛ خو اوس طالبان غواړي چې خلک د خپلو ځمکو لپاره بیاځلې پیسې ورکړي.
د اسراییل پوځ وایي، د جمعې په سهار په سویلي لبنان کې څلور اسراییلي سرتېري وژل شوي دي. د اسراییل پوځ دغه پېښه د روانې درې میاشتنۍ جګړې له پیل راهیسې د خپلو ځواکونو لپاره ترټولو خونړۍ پېښه بللې ده.
د کندهار په دولتي او خصوصي پوهنتونونو کې د سمستر ازموینې روانې دي. لسګونه محصلین وایي، د طالبانو امر بالمعروف محتسبین پوهنتونونو ته ورځي او هغه محصلان له ازموینو باسي چې ږېرې یې کمې کړې یا یې خریلې دي. محصلین دغه اقدام د زدهکړو بهیر د ګډوډۍ او د فشار زیاتوالی بولي.
د طالبانو دفاع وزارت منلې، چې په بلوچستان او خیبر پښتونخوا ایالتونو کې یې د (داعش) ډلې مرکزونه په نښه کړي دي. د یاد وزارت په وینا؛ په دغه مرکزونو کې د ځینو استخباراتي کړيو په مرسته د افغانستان په خاوره بریدونه پلان کېده.
د بېپولې خبریالانو سازمان د کډوالو نړۍوالې ورځې په درشل کې ویلي، چې افغانستان د «خبریالانو د تبعید اصلي مرکز» ګرځېدلی دی. دغه سازمان وایي، چې د طالبانو له بیا واکمنېدو وروسته لږترلږه ۶۷۷ افغان خبریالان د شته ګواښونو له امله د دغه سازمان په ملاتړ له افغانستان نه وتلي دي.
د خیبر پښتونخوا په ډېره اسماعیل خان، اورکزیو او باجوړ ولسوالیو کې د پنجشنبې په ورځ (د غبرګولي ۲۸مه) د سخت باران او توپان له امله اووه کسان مړه او اته نور ټپیان شوي دي.
د طالبانو د دارلعلوم یوې زدهکوونکې افغانستان انټرنشنل پښتو ته په رالېږلي یو پیغام کې ویلي، چې په کتابونو کې راغلي د ښځو اړوند موضوعات د ښوونکو لهخوا نه تدریس کېږي او له دوی غواړي دغه پاڼه واړوي او له لوستلو یې ډډه وکړي.
وال سټریټ ژورنال راپور ورکړی، د امریکا دفاع وزارت له قانون جوړوونکو غوښتي چې د ایران د جګړې او ځینو نورو ژمنو د لګښتونو پوره کولو لپاره ۸۰ مېلیارد ډالره اضافي بودجه ځانګړې کړي. تمه کېږي، چې دغه غوښتنه به ډېر ژر کانګرس ته وړاندې شي.
د امریکا ولسمشر ډونالډ ټرمپ له اکسیوس سره په یوه مرکه کې ویلي، چې امریکا له پوځي اړخه ایران ته «په بشپړه توګه» ماتې ورکړې ده. نوموړي ویلي، چې له ایران سره جګړې هغه ته د خپل ځواک د محدودیتونو په اړه هېڅ درس نهدی ورکړی او لاهم د خپل واک او ځواک لپاره «هیڅ محدودیت» نه مني.
طالبانو ته نږدې رسنۍ «المرصاد» د خپلو سرچینو په حواله راپور ورکړی، چې د خیبر پښتونخوا د قمبرخېلو په سیمه کې د داعش پر یوه مرکز هوایي برید شوی. یاده رسنۍ وايي، چې په برید کې د داعش مرکز لهمنځه وړل شوی او د داعش ګن وسلهوال پهکې وژل شوي دي.
اکسیوس وېبپاڼې د یوه امریکایي چارواکي په حواله راپور ورکړی، په لبنان کې له اوربند نه د اسراییل د سرغړونې په اړه د ایران ادعا ښایي د دې لامل شوې وي چې د جمعې په ورځ په سویس کې د تهران او واشنګټن ترمنځ ټاکل شوې خبرې اترې وځنډېږي.
د ایران د پارلمان مشر محمد باقر قالیباف په یوه پیغام کې مجتبی خامنهیي ته په خطاب له امریکا سره د تفاهملیک په اړه د هغه د «پیغام» هرکلی کړی دی. هغه ویلي، دغه پیغام ښیي چې د تفاهملیک په وروستي کېدو «یوه ستونزمنه او پېچلې لاره» په مخکې ده.
له کابل نه یو افغان معلول افغانستان انټرنشنل ته په لېږلي غږیز پیغام کې د خپل ژوند د اقتصادي ستونزو او سخت وضعیت څخه شکایت کړی. نوموړي ویلي، چې طالبانو د معلولیت تنخواوې پرې بندې کړې او «د معلولیت لرونکو کسانو په نوم بهرنۍ مرستې هم طالبان اخلي».
له پاکستان نه اېستل شوي افغان کډوال وايي، چې پاکستاني پولیسو ان د اېستلو په وروستیو ورځو کې هم ځورول او پر وړاندې یې له «ظلم» کار اخیستی دی. دغه کډوال وايي، چې د وهلو او بندیانولو ترڅنګ پولیسو پیسې هم ترې اخیستې دي.
د پاکستان او افغانستان د سوداګرۍ او صنایعو ګډه خونه وايي، چې په تېرو اتو میاشتو کې د دواړو هېوادونو ترمنځ د لارو تړل پاتې کېدو پاکستاني سوداګرو ته تر ۲۷۸ مېلیارده پاکستاني روپیو (۹۸۱ مېلیون ډالرو) ډېر زیان رسولی دی.