له پېښو سره د طالبانو د مبارزې ادارې خبر ورکړی، چې د «ډاکار» په نوم له یوې مرستندویه موسسې سره یې په کونړ، ننګرهار او لغمان ولایتونو کې له زلزلهځپلو کورنیو سره د مرستې هوکړهلیک لاسلیک کړی. یاده موسسه به له زلزلهځپلو کورنیو سره د ۴۵۰ زره امریکایي ډالرو په ارزښت بشري مرستې وکړي.
د لبنان د حزبالله ډلې سرمنشي نعیم قاسم وویل: «موږ باید تر خپلې وسې دوښمن ته "نه" ووایو، تسلیم نهشو او مقابلې ته یې ور ودانګو. اسلامي جمهوریت د نړۍ د تاج سر دی، پر خپل ځای به پاتې وي او کولی شي په دې روانه مقابله کې امریکا او اسراییل ته ماتې ورکړي».
د امریکا پوځ د ایران یوه بېپیلوټه الوتکه چې د عربي سمندرګي پر لور ابراهام لینکن الوتکهلېږدوونکې بېړۍ ته نږدې کېده، نسکوره کړې ده. دغه بې پیلوټه الوتکه د امریکا اېف ۳۵ الوتکې ویشتلې ده.
د طالبانو سترې محکمې خبر ورکړی، چې په کابل کې د نشهيي توکو او مسکراتو پر وړاندې د مبارزې لومړنۍ محکمې ۲۲ کسانو ته د نشهیي توکو د پلور، قاچاق او کارونې په تور تعزیري سزا ورکړې ده.
اکسیوس د دوو باخبرو سرچینو په حواله راپور ورکړی، چې ایران غواړي د مذاکراتو ځای له استانبول څخه عمان ته بدل شي او همدارنګه دا خبرې اترې په دوه اړخیزه بڼه یوازې له امریکا سره ترسره شي.
د سویلي وزیرستان په اعظم ورسک سیمه کې اتحادالمــجاهدین وسله والې ډلې پر خلکو د شپې پاڼو له لارې غږ کړی، چې له امنیتي ځواکونو دې لرې ګرځي او خپل ماشومان دې امنیتي پوستو ته نږدې نه پرېږدي. پاڼې د یادې ډلې د څانګې جیش خــراسان له خوا خپرې شوې دي.
جېفري اپسټین هغه نوم دی چې د شتمنۍ، سیاست، شاهي کورنیو او نړۍواله رسوايي ورپورې تړلې او د نن ورځې تر ټولو په تودو بحثونو کې یادېږي. دا کیسه یوازې د یوه تورن یا مجرم داستان نه دی، بلکې د هغو پټو سیستمونو انځور دی چې د پیسو او ځواک تر سیوري لاندې د کلونو لپاره خوندي پاتې شوې.
د روسیې ولسمشر ولادیمیر پوتین او د سعودي عربستان ولیعهد محمد بن سلمان د ټیلیفوني خبرو پر مهال د اوپیک پلس په چوکاټ کې پر ګډو هڅو او د انرژۍ نړیوالو بازارونو د ثبات پر موضوع خبرې کړې دي. د سعودي دولتي اژانس ویلي، چې دواړه مشران د سیمې او نړۍ پر وضعیت هم غږېدلي.
د طالبانو ویاند د روسیې د بهرنیو چارو وزیر سرګي لاوروف دا څرګندونې رد کړې چې ګني د افغانستان له خاورې څخه امنیتي ګواښونه موجود دي. هغه وویل، چې په پنځو کلونو کې هیڅ هیواد د افغانستان له خاورې څخه له امنیتي ګواښ سره مخ نه دی.
د طالبانو د ریاست الوزرا ملامحمد حسن په مشرۍ ددې ډلې د کابینې غونډه کې د پراختیایي بودجې د لګولو او د افغان کډوالو ستونزو ته د رسېدنې په اړه بحث شوی.
د پاکستان د ملي اسامبلۍ د اپوزېسیون مشر محمود خان اڅکزي د سې شنبې په ورځ ددغه هېواد لومړي وزیر شهباز شریف ته لیک استولی او له هغه یې د عمران خان د روغتیا په برخه کې د شخصي مداخلې غوښتنه کړې ده. اڅکزي ویلي، د عمران خان روغتیايي وضعیت باید د هغه باوري ډاکټران وګوري.
په خوست کې سیمه یزو سرچینو افغانستان انټرنشنل ته وویل، چې د باتور خان په نامه د طالبانو یو غړي په مرکز متون کې په خپل کور کې ځان وژنه کړې ده. د سرچینو په وینا، نوموړي په دې وروستیو کې خپله دنده له لاسه ورکړې وه. د باتور خان پلار او ورو د طالبانو په نظامي لیکو کې دندې لري.
د تخار ولایت د خواجه بهاوالدین، درقد او دشتقلعه ولسوالیو ترمنځ د کهنه خانې مشهور ځنګل د طالبانو د کرنې وزارت او محلي ادارو د پرېکړې له مخې وهل شوی او پر خلکو وېشل شوی دی. د سیمې خلکو دا د چاپیریال لپاره زیانناک ګام ګڼلی، خو طالبانو تراوسه په دې اړه غبرګون نه دی ښودلی.
د سویس د سنت ګالن ښار د اورګاډي تمځي پر وړاندې د شنبې په ماښام پنځو افغان ځوانانو یو ۳۷ کلن سویسی وګړی وهلی او ډبولی دی. پولیسو ویلي، چې یاد کس برسېرن ټپي شوی او ټول بریدګر نیول شوي دي.
طالبانو په جرمني کې د افغانستان د دریو کونسلګریو له عوایدو شاوخوا لس میلیونه یورو را غونډ کړي، خو لاهم د بانکي بندیزونو له امله کابل ته د دې پیسو په لیږلو کې له ستونزو سره مخ دي. تېرکال هم ورته یو رپوټ ورکړل شوی و.
د ایران د خراسان رضوي د ټرانسپورټ مرستیال محمود امتي وايي، چې د دوغارون-اسلام کلا پر پوله هره ورځ د شاوخوا ۲۰۰۰ کانټینرونو او لاریو دریدل دوی ته له یونیم تر دوو میلیونو ډالرو زیان اړوي. د نوموړي په وینا، زیاتره کانټینر او لارۍ افغانستان ته د اوښتو هڅه کوي.
د طالبانو د بهرنیو چارو وزارت وايي، چې امیرخان متقي په کابل کې د ترکیې «د ډيپلوماتیک ماموریت له نوي مشر» سادین ای يلديز سره تعرفي کتنه کړې ده. طالبانو دا نه دي روښانه کړي چې سادین ای یلديز کابل ته د سفیر په کچه استول شوی او که انقرې د خپل ډيپلوماتیک استازي کچه راټیټه کړې ده.
د خیبر پښتونخوا د دیره اسماعیل خان ولسوالۍ چارواکي وايي، چې شاوخوا یو درجن وسله والو په پاروه سیمه کې د پولیسو پر مرکز برید کړی او د نږدې بانک د څانګې لوټلو هڅه یې کړې ده.
د طالبانو کورنیو چارو وزارت خپلو نژدې رسنیو ته ویلي، چې د یرموک ۶۰ ځانګړې عملیاتي قطعې ځواکونو د کابل د عیدګاه جومات په شاوخوا کې د عملیاتو پر مهال یو مشهور سړي تښتوونکی، خلیلزاد، چې د خدایداد مرستیال بلل کېده، وژلی دی. رییس خدایداد د جمهوریت پر مهال اعدام شوی و.
په کندز کې د وژل شویو درې کسانو د کورنۍ غړو افغانستان انټرنشنل ته وویل، چې د کندز نظامي محکمې ته پر عریضې سربېره، درې ورځې تېرې شوې، خو لاهم هغه طالبان نه دي نیول شوي، چې د دوی د کورنۍ درې غړي یې په لېزري وسلې وژلي دي. د طالبانو مسوولینو د کندز نظامي محکمې عریضې بابیزه بللې.
د خیبر پښتونخوا ایالت د صوابۍ د پولیسو یو مشر عبدالعلي له دې امله له دندې لرې شوی، چې پر خپل واټساپ یې د طالبانو ددفاع وزیر مولوي یعقوب مجاهد انځور لګولی و. نوموړي دغه راز په ودونو کې پر موسیقۍ او بازار ته د ښځو پر تګ هم نیوکې کړې وې.