آرشیف

د طالبانو تر واک لاندې د لوړو زده کړو وزارت د کابل پوهنتون په انګړ کې د طبي اکمال تخصص بستونو د شمولیت ازموینه نن د نجونو او ښځینه ډاکټرانو له حضور پرته واخیسته.

د افغانستان د بشري حقونو د خپلواک کمېسیون پخوانۍ مشرې شهرزاد اکبر ویلي، افغانستان د نړۍ د هغو هېوادونو په ډله کې دی چې د مېندو د مړینې کچه په‌کې خورا لوړه ده، خو طالبان د ښځو پر جامو څارنه کوي.

د طالبانو د اطلاعاتو او کلتور وزارت د خپرونو چارو مرستیال مهاجر فراهي پر پاکستان د طالبانو بریدونو ته په اشارې ویلي، د افغانستان د امنیت اخلالوونکي چې هر ځای وي، د دوی لباره مشروع اهداف دي. طالبانو ویلي، تېره شپه یې په خیبر پښتونخوا او بلوچستان کې د داعـ.شیانو مرکزونه په نښه کړي.

د امریکا د کورني امنیت وزارت اعلان کړی دی چې د دغه هېواد د عدلیې وزارت ۱۵ کسان د څه باندې ۱،۴ میلیونه ډالرو د مالي درغلۍ په یوه قضیه کې تورن کړي دي. په دغو کسانو کې ۱۱ تنه داسې کډوال شامل دي چې په ناقانونه توګه امریکا ته داخل شوي وو.

د ناروې حکومت اعلان کړی چې د راتلونکي ښوونیز کال له پیل سره به د ۱۳ کلونو څخه د کم عمره زده کوونکو لپاره د تولیدي مصنوعي ځیرکتیا (اې ای) کارول منع شي. حکومت وایي دغه پرېکړه یې ځکه کړې ده چې ماشومان د لوست، لیک او ریاضیاتو بنسټیز مهارتونه په ښه توګه زده کړي.

د ایټالیا لومړۍ وزیرې جورجیا میلوني د امریکا د ولسمشر ډونالډ ټرمپ هغه ادعا په کلکه رد کړې چې ګواکې نوموړې په فرانسه کې د جي۷ سرمشریزې پر مهال له هغه څخه د ګډ عکس اخیستو غوښتنه کړې وه. بل خوا، د ایټالیا د بهرنیو چارو وزیر انتونیو تایاني اعلان کړی چې امریکا ته خپل سفر لغوه کوي.

په بریتانیا کې ۷ افغان کډوالو د نورویچ په شاهي محکمه کې پر دوو تنکیو نجونو د جنسي تېري ۳۸ بېلابېل تورونه په کلکه رد کړل. دغه کسان د سختو امنیتي تدابیرو او عامه غوسې په فضا کې محکمې ته وړاندې شول او قاضي پرېکړه وکړه چې د جنوري په ۱۱مه به یې د محاکمې اصلي بهیر پیل شي.

رویټرز د یوه لوړپوړي امریکایي چارواکي له قوله راپور ورکړی چې اسراییل او حزب‌الله د اوربند پر یوې هوکړې سلا شوي دي. د دغه چارواکي په وینا، ټاکل شوې دغه اوربند نن د جمعې په ورځ د ځایي وخت له مخې د مازدیګر په څلورو بجو په عملي توګه پلي شي.

د تخار پوهنتون یوه محصل افغانستان انټرنشنل ته په رالېږلي پیغام کې ادعا کړې چې د تیرې چهارشنبې په ورځ، یو شمېر محصلان د خولۍ نه لرلو له امله د پوهنتون د طالب ساتونکو له خوا نیول شوي او د دغو ځواکونو استوګنځي ته لېږدول شوي دي.

ځايي سرچینو افغانستان انټرنشنل ته تایید کړې چې د حشمت الله په نوم د پخواني پوځ یو قوماندان په پروان ولایت کې په ډېرې بې‌رحمۍ وژل شوی دی. د سرچینو په وینا، حشمت‌الله د جمهوري نظام پر مهال د ۲۰۱ سیلاب قول‌اردو د څلورمې لوا د درېیم کنډک د تولۍ قوماندان و.

په اتریش کې د افغانستان سفیرې منیژې باختري د زوجینو د تفریق په اړه د طالبانو وروستی فرمان غندلی دی. نوموړې ویلي چې د طالبانو دا پرېکړه د افغان ښځو او نجونو حقونه او کرامت په بشپړ ډول تر پښو لاندې کوي.

د افغانستان رسنیو ملاتړي سازمان (امسو) د کډوالو د نړیوالې ورځې په مناسبت ویلي، په پاکستان، ایران، هند او ترکیه کې سلګونه جلا وطنه افغان خبریالان او د رسنیو کارکوونکي له ناڅرګند برخلیک، حقوقي ستونزو، اقتصادي فشارونو او رواني ګواښونو سره مخ دي.

د افغانستان لپاره د ملګرو ملتونو ځانګړي راپور ورکوونکي ریچارد بېنېټ ویلي چې د زوجینو د تفریق اصولنامه د ماشومانو ودونو ته اجازه ورکوي او ښځې او نجونې په تاوتریخجنو ودونو کې ایساروي.

د سویس د بهرنیو چارو وزارت اعلان وکړ چې د امریکا او ایران ترمنځ په بورګنسټوک په سیمه کې کې پلان شوي مذاکرات وځنډېدل. سویس ویلي چې لا هم د دغو مذاکراتو اسانتیا برابرولو ته چمتو دی او لومړني ګامونه یې پورته کړي دي.

د طالبانو د عامې روغتیا وزیر نور جلال جلالي په کابل کې د سنتي طب د فعالیتونو د ارزونې په غونډه کې د سنتي طب پر معیاري کولو ټینګار کړی دی.

د ازبکستان او افغانستان د سوداګرۍ او پانګونې د پراختیا په لړ کې، ازبک لوري وړاندیز کړی دی چې د افغانستان په نعیم‌اباد سیمه کې د ازبکستان د محصولاتو لپاره یو لوژستیکي مرکز او د ذخیره کولو ګودام جوړ شي څو د سوداګرۍ بهیر چټک او د ټرانسپورټ لګښتونه کم شي.

سرچینو افغانستان انټرنشنل ته ویلي چې د طالبانو مشر ملا هبت الله اخوندزاده د ډیورنډ کرښې د څار او امنیت ساتنې لپاره د یوې ۸۰۰۰ کسیزې ځانګړي قطعې د جوړولو امر ور کړی. د یادې قطعې نوم «هبتي قطعه» ده او د جنګیالیو معاشونه به یې د عادي طالبانو په پرتله لوړ وي.

د ایران د پارلمان د روغتیا کمیسیون رییس حسین‌علي شهریاري ادعا کړې چې پارلمان ځکه تړل شوی څو چارواکي د خپلې خوښې پرېکړې په خپلسري ډول لاسلیک کړي. نوموړي په کلکه ټینګار کړی چې له امریکا سره هر ډول هوکړه لیک باید د پلي کېدو دمخه په قانوني ډول د پارلمان له خوا تصویب شي.

د پاکستان د اطلاعاتو وزارت وايي چې د یاد هېواد هوايي دفاع د خیبر ولسوالۍ په شینکو سیمه کې د طالبانو ډرون الوتکه کشف او نسکوره کړې ده. یاد وزارت ویلي، ډرون په چټکۍ سره کنټرول شوی او هیڅ مرګ ژوبله نه لري.

د جاپان د بهرنیو چارو وزارت خبر ورکړی، چې د یوه جاپاني شرکت اړوند تېل وړونکې بېړۍ له هرمز تنګي څخه په خوندي ډول تېره شوې او له فارس خلیج نه وتلې ده. د یاد وزارت په خبرپاڼه کې راغلي، چې دغه بېړۍ په فارس خلیج کې د جګړې له امله درېدلې وه او اوس د جاپان په لور خوځېدلې ده.

د پاکستان د جمعیت علمای اسلام ګوند مشر مولانا فضل الرحمان د افغانستان او ایران پر وړاندې د پاکستان د ځینو سیاستونو په اړه نیوکه کړې او هغه یې ناسم بللي دي. نوموړي یو ځل بیا د طالبانو او پاکستان ترمنځ د ستونزو د حل لپاره پر خبرو اترو ټینګار کړی دی.