د افغانستان د رسنیو ملاتړ سازمان (امسو) ویلي چې طالبانو د هرات خبریالانو ته خبرداری ورکړی، چې که له جلاطنه رسنیو سره د اعتراضونو په تړاو ویډیوګانې او خبرونه شریک کړي، له مرګ سره به مخامخ شي.
د طالبانو بهرنیو چارو وزارت وايي، په کابل کې یې د پاکستان شارژدافیر پر افغانستان د تازه هوايي بریدونو په تړاو احضار کړی او خپل شدید او قاطع اعتراض یې ور سپارلی. د طالبانو بهرنیو چارو وزارت دغه برید بشري جنایت او د نړیوالو اصولو او قوانینو ښکاره نقض بللی.
د متحده عرب اماراتو اړوند اتحاد هوايي شرکت اعلان کړی چې د جولای میاشتې له ۱۵ مې نیټې څخه به د ابوظبۍ زاید نړۍوال هوايي ډګر او کابل هوايي ډګر ترمنځ خپلې الوتنې دوه برابره کړي او هره ورځ به له ابوظبۍ څخه کابل ته دوه الوتنې ولري.
د طالبانو د زابل ولایت امنیه قوماندانۍ ویلي چې د شاجوی ولسوالۍ په یوه ترافیکي پېښه کې ترلاسه شوې ۶۴ نیم میلیونه افغانۍ او څه باندې درې زره امریکایي ډالر یې خپل اصلي څښتن ته سپارلي دي. دغه پیسې د پېښې په ځای کې عامو خلکو را غونډې کړې وې.
د نهم او لسم جون تر منځ شپه کې پاکستان یو وار بیا د افغانستان په دریو ولایتونو، خوست، پکتیکا او کونړ کې هوايي بریدونه کړي دي. د پاکستان پوځي منابعو پاکستانی ژورنالستانو ته ویلي دي چې دغه هوايي بریدونه د استخباراتو له خوا په ګوته شويو د ټي ټي پي پر پټنځایونو شوي دي.
په افغانستان کې د ملګرو ملتونو مرستندویه پلاوي په هرات کې د طالبانو لهخوا د حجاب په پلمه د ۳۰ ښځو نیولو، ګواښلو او د لاریون والو پر وړاندې د زور زیاتي کارولو په اړ اندېښنه ښودلې او پر یادې ډلې یې غږکړی، چې د ښځو او نجونو د بشري حقونو او ازادیو محدودوونکې تګلارې پریږدي.
د طالبانو د دفاع وزیر له مسکو سره د پوځي همکاریو له تړون وروسته، د غبرګولي پر ۹مه په کابل هوايي ډګر کې ویلي و چې نور به پاکستان د افغانستان پر خاوره د برید جرئت ونه کړي، خو پاکستان تېره شپه د افغانستان پر دریو ولایتونو هوايي بریدونه وکړل.
په تهران کې یو شمېر افغان کډوالو د چارشنبې په ورځ د هرات د خلکو د اعتراضونو په ملاتړ د طالبانو تر کنټرول لاندې د افغانستان سفارت مخې ته لاریون کړی. لاریونوالو د «کار، زده کړې او ازادۍ» شعارونه ورکول.
په نیویارک کې یوې فدرالي محکمې د طالبانو پخوانی قوماندان حاجي نجیبالله په۴۲ کاله بند او ۵ کاله تر څار لاندې ازادۍ سزا محکوم کړی. پر هغه تور و چې په ۲۰۰۸ او ۲۰۰۹ کلونو کې یې یو امریکایی خبریال تښتولی و او ډلې یې په څو نورو تښتونو او بریدونو کې لاس درلود.
د پاکستان پوځ ویلي چې د یاد هېواد تر کنټرول لاندې د کشمیر په مظفر اباد کې یې یوه اېمای ۱۷ پوځي چورلکه راغورځېدلې او د الوتکي ټوله عمله په پېښه کې مړه شوې. جمو او کشمیر په دې وروستیو کې د لاریونونو او تاوتریخوالي شاهد دی.
د بښنې نړۍوال سازمان په یوه نوې حقوقي ارزونه کې ویلي چې د طالبانو د زوجینو د تفریق اصولنامه د کم عمره نجونو ودونو ته لاره اواروي. یاد سازمان ویلي چې د طالبانو دغه قانون په ماشومتوب کې شوي ودونه تاییدوي او د نجونو وړتیا محدودي.
د پاکستان د پنجاب ایالت په جنگ ولسوالۍ کې پولیسو پر یوې زده کوونکې نجلۍ د ډلهییز جنسي تېري او وژنې په تور درې تنه نیولي دي. د پولیسو په وینا، دغه ۱۷ کلنه نجلۍ لومړی تښتول شوې وه او وروسته په بېهوښه حالت کې روغتون ته لېږدول شوې وه، چې هلته یې ساه ورکړه.
په برېتانیا کې څلور هغه افغانان پر یوې ۱۷ کلنې نجلۍ د جنسې تیري په تور محاکمه کېږي، چې درې یې له پیښې وروسته په قاچاقې توګه فرانسې ته تللي وو، خو په فرانسه کې تر نېول کېدو وروسته برېتانیا ته لېږدول شوي دي.
افغانه فوټبالره خالده پوپل د ټایم مجلې د ۲۰۲۶ کال د ورزش د ۱۰۰ اغیزناکو څېرو په نوملړ کې شامله شوې ده. نوموړې د افغان ښځینه فوټبال لوبډلې د فعالیتونو رسمي کولو په برخه کې هڅې کړې دي.
ځايي سرچینو افغانستان انټرنشنل ته ویلي چې طالبانو نن سهار په هرات کې د یو شمېر ښوونځیو د ښوونکو موبایلونه پلټلي دي. د سرچینو په وینا، طالبانو د هرات ښار د رسالت ښوونځي درې ښوونکي د هغوی د ټولنیزو رسنیو فعالیتونو له څارلو او پلټنې وروسته له ځان سره بیولي دي.
سرچینو افغانستان انټرنشنل ته ویلي، چې د طالبانو د امربالمعروف محتسبان له تېرو دوو ورځو راهیسې د کندهار ښار په بېلابېلو سیمو کې د ښځینه توکو د پلور په مارکیټونو کې پلټنې پیل کړې دي او یو شمېر هټۍوال یې هم بندیان کړي دي.
په داسې حال کې، چې پاکستان یوځل بیا پر افغانستان هوايي بریدونه کړي، د ترکیې د بشري حقونو او ازاديو سازمان په استانبول کې د طالبانو او پاکستان د استازو دویمه ناسته رغنده بللې. تېره ورځ سرچینو افغانستان انټرنشنل ته وویل، چې د دواړو خواوو استازو د جون پر اتمه او نهمه خبرې کړې دي.
د طالبانو روغتیا وزارت وايي، چې په هرات کې یې د څارنې او پلتنې يو پلاوي د روغتیايي قوانینو د سرغړونې له امله د درملو ۷ عمده پلورنځي تړلي. یاد وزارت ویلي، چې دغه پلاوي په هرات کې له ۷۲ درمل پلورنځيو څخه څارنه کړې.
د افغانستان د اسلامي وحدت ګوند مشر محمد محقق په هرات کې د ښځو او نجونو نیول «د هېواد د ښځو پر عزت او حیثیت ښکاره برید» وباله. نوموړي خبرداری ورکړی، چې د خلکو پر حیثیت، حقونو او ناموس تېری د حل لاره نهده او دغه ډول کړنې د کړکېچونو او ټولنیزو درزونو کچه نوره هم پراخوي.
د پنجشېر درې باغونه سږکال هم د ګیلاسو له ښه حاصلاتو برخمن شوي او بڼوال د محصولاتو په راټولولو بوخت دي. په پنجشېر کې د طالبانو والي محمداغا حکیم وایي، چې د روان کال ګیلاس به په ځانګړي ډول منځنۍ اسیا، چین او عربي هېوادونو ته صادر شي او د نورو بازارونو د موندلو هڅې هم روانې دي.
په ۲۰۲۱کال کې واک ته د طالبانو له رسېدو راهیسې پاکستان پر افغانستان شاوخوا ۸ لوی بریدونه کړي، چې د هېواد په تاریخ کې بېساري ګڼل کېږي. دغه بریدونه پر کابل، خوست، کونړ، پکتیکا، پکتیا، کندهار، ننګرهار او یوشمېر نورو ولایتونو شوي دي.