آرشیف

د ایران د بهرنیو چارو وزارت ویلي، چې سید عباس عراقي تاجکستان ته د سفر پرمهال د دغه هېواد له ولسمشر امام علي رحمان سره د افغانستان او سیمې د تحولاتو په اړه خبرې کړې دي.

انترفاکس خبري اژانس خبر ورکړی، چې روسیه او چین به د اګست له لومړۍ تر پنځمې نېټې پورې د جاپان په سمندر کې ګډ سمندري تمرینونه ترسره کړي. د روسیې د پاسیفیک سمندري ځواک په یوه اعلامیه کې ویل شوي: «دا تمرینونه دفاعي بڼه لري او د کوم بل هېواد پر ضد نه دي».

د طالبانو تر واک لاندې د افغاني سرې مياشتې ټولنه وایي، چې په تېر یوه کال کې یې له ۴،۶ میلیونه کسانو سره بشري مرستې کړې دي. دغه مرستې د خوراکي او غیر خوراکي توکو د ویش، نغدي مرستې، روغتیایي خدماتو، سرپناه او د څښاک پاکو اوبو د تامین په برخه کې شوې دي.

د پاکستان مرکزي بانک ویلي، چې د ۲۰۲۴ ـ ۲۵ مالي کال په اوږدو کې افغانستان ته د پاکستان د صادراتو په کچه کې ۳۸،۶۸ سلنه زیاتوالی راغلی او د صادراتو دا کچه له ۵۵۸،۰۳۲ مېلیون ډالرو څخه ۷۷۳،۸۹۲ مېلیون ډالرو ته لوړه شوې ده.

د افغانستان پخواني ولسمشر حامد کرزي د بریتانیا حکومت له هغه تصمیم هرکلی کړی، چې غواړي د فلسطین مستقل دولت په رسمیت وپېژني. نوموړي دا "پرځای او باارزښته ګام" بللی دی.

د طالبانو د ریاست الوزرا اقتصادي مرستیال په کابل کې د سمون په نامه د خصوصي سکتور د ممیزو د پروسس یوه نوې فابریکه پرانېسته، چې ویل کیږي په کال کې د لس زره ټنه ممیزو د پروسس ظرفیت لري. پر دې فابریکه اته میلیونه ډالره شخصي پانګونه شوې.

د کډوالو ستونزو ته د طالبانو د رسیده ګي عالي کمېسیون دارالانشاء د کمېټو د ورځني کاري راپور له مخې، پرون ۱۹۱۴ کورنۍ چې شمېر یې ۱۵۶۰۱ تنه کیږي، هېواد ته ستنې شوې دي.

د افغانستان د سوداګرۍ او پانګونې خونې مسوولانو افغانستان انټرنشنل ته وویل، چې پر افغان ټرانزیټي توکو د خیبر پښتونخوا حکومت لګول شوی یو سلنه ایالتي محصول غیرقانوني دی او باید زر تر زره لرې شي. د دوی په وینا، دې چارې د دواړو هېوادونو ترمنځ د قانوني ټرانزیټ بهیر ټکنی کړی.

په کابل کې د شپږیزه کرېکټ لیګ روانو سیالیو په لړ کې د امو نهنګانو لوبډلې پیلیز توپ وهونکي نور الرحمان د چټکې سلیزې ریکارډ په خپل نوم کړ. هغه د بند امیر ښامارانو لوبډلې پر وړاندې په ۴۰ توپونو سلیزه وهلې او په یاده لوبه کې یې په ټولو ۴۳ توپونو ۱۱۵ منډې جوړې کړې دي.

سرچینو افغانستان انټرنشنل ته ویلي، چې د کندهار د امر بالمعروف ریاست شاوخوا ۲۴ هغه ځوانان نیولي، چې د ملي بېرغ د ورځې په مناسبت یې پر ټولنیزو رسنیو د درې رنګه بېرغ انځورونه خپاره کړي وو. ځینې ځوانان له ضمانت اخېستلو وروسته خوشې شوي دي.

د روسیې د دولتي دوما د بهرنیو اړیکو مرستیال وايي، چې د طالبانو « دا د باتورانو کور» سرود دوی ته د منلو وړ نه دی، ځکه په دې کې افغانستان د روسانو د ککریو ګور یاد شوی. په مسکو کې د طالبانو سفارت ویلي، چې دا د دوی «ملي سرود» نه دی.

که څه هم افغان ښځې د طالبانو «ځپونکو او سختو» بندیزونو سره مخامخ دي؛ خو په دې وروستیو میاشتو کې افغانستان ته د بهرنیو ښځینه سېلانیانو د ورتګ څپه پراخه شوې ده.

د ایران ولسمشر مسعود پزشکیان د راتلونکې شنبې په ورځ پاکستان ته سفر کوي. د راپورونو له مخې؛ نوموړی به د دغه سفر په لړ کې له لوړپوړو پاکستاني چارواکو سره رسمي ناستې ولري او د دواړو هېوادونو ترمنځ د سیاسي، اقتصادي او فرهنګي همکاریو پر پراختیا به بحث او خبرې وشي.

له ایرانه د سلګونه زره افغان کډوالو د اېستلو پر دوام ایراني چارواکي وايي، چې د دغه هېواد تولیدي کارخونې او د ښار کاري بنسټونه د کارګرانو له سخت کمښت سره مخامخ دي.

په قرغزستان کې د طالبانو سفیر عبدالشکور حقاني په دغه هېواد کې د روسیې له سفیر سرګي ایوانویچ سره په لیدنه کې د سیاسي، اقتصادي او سوداګریزو اړیکو پر پراختیا ټینګار کړی دی.

د ایران د ولسمشر مرستیال محمد رضا عارف د ایران او اسراییل ترمنځ ۱۲ ورځنۍ جګړې ته په اشارې سره ویلي، په دغه جګړه کې د خلکو د فعاله ونډې اخېستنې له کبله اسراییل اړ شو چې د اوربند غوښتنه وکړي.

د خېبرپښتونخوا په باجوړ ولسوالۍ کې لسګونه کورنۍ د خپلو مېنو پرېښودو ته اړې شوې دي. دا کورنۍ وروسته تر هغې د خپلو مېنو پرېږدو ته اړې شوې، چې پاکستاني پوځ په دغه سیمه کې د پوځي عملیاتو خبرداری ورکړی دی.

د طالبانو د کډوالو او بېرته راستنېدونکو چارو وزارت وايي، په تېر یو کال کې تر دوه مېلیونه ډېر افغانان هېواد ته راستانه او ۹زره او ۹۵۱ افغان بندیان د ایران او پاکستان له بندخونو خوشې شوي. د دغه وزارت په وینا؛ په تېرو درېیو میاشتو کې یو مېلیون او ۸۰۰زره کډوال له ایرانه اېستل شوي دي.

د امریکا ولسمشر ډونالډ ټرمپ وايي، که روسیه په اوکراین کې د جګړې د پای ته رسولو لپاره اقدام ونه‌کړي؛ نو تر راتلونکو لسو ورځو به پرې اقتصادي بندیزونه ولګوي.

د طالبانو د کډوالو او راستنېدونکو چارو سرپرست وزیر مولوي عبدالکبیر د اهل تشیع د علماوو شورا له غړو او د نیمروز ولایت له مرستیال والي سره د دوو جلا ناستو په ترڅ کې د افغان کډوالو او راستنېدونکو د وضعیت په اړه خبرې کړې دي.

د طالبانو د عامې روغتیا وزارت خبر ورکړی، چې له تاجکستان څخه د بېرته راستنېدونکو افغانانو د روغتیايي ستونزو د حل په موخه د شېرخان بندر په دروازه کې یو ګرځنده روغتیايي کمپ فعال شوی دی.