په خوست کې د طالبانو ولایتي ویاند مستغفر ګربز ویلي، چې د دې ولایت د نرخونو د کنټرول او د احتکار د مخنیوي کمېسیون مسوولینو د هټیو د څار او ارزونې په لړ کې، د خوست ښار د تڼیو لین ته څېرمه ساحه کې ۱۳ هټۍ د خوراکي توکو د وزن د کموالي او د بیو د لوړوالي له امله وتړلې.
د اریانا افغان هوايي شرکت د طالبانو د اقتصادي مرستیال د پرېکړې پر بنسټ له یکشنبې څخه د ډیلي سکټور لپاره د کارګو له لارې تر ټولو ټيټې بیې عملي کوي. دوی ویلي، یو کیلو سوداګریر صادراتي توکي په یو امریکايي ډالره او یو کیلو وارداتي سوداګريز توکي په ۸۰ سنټه لېږدوي.
د پاکستان ولسمشر اصف علي زرداري د شنبې په ورځ د وسلهوالو ځواکونو د درېیو برخو (پوځ، هوايي او بحري ځواک) اړوند مسودې لاسلیک کړې. د وسلهوالو ځواکونو اړوند لایحې یوه ورځ وړاندې د سنا له لارې تصویب شوې وې.
د پاکستان او طالبانو تر منځ له مخامخ وسلهوالې جګړې وروسته د دواړو لوریو ترمنځ لفظي ناندریو زور اخیستی او یو بل په یوه ډول نه په یوه ډول ګواښي. تازه د پاکستان د لومړي وزیر سلاکار ویلي، له افغانستان څخه هر ډول یرغل ته به مناسب ځواب ورکړي.
د بندي لیکوالانو نړۍواله ورځ هر کال د نومبر په ۱۵مه د پېن نړۍوالې ټولنې په نوښت نمانځل کېږي. دا ورځ د هغو لیکوالانو د درناوي لپاره ځانګړې شوې، چې د خپل نظر د څرګندولو او د خپلو عقایدو د خپرولو له امله بنديان شوي دي.
د طالبانو مشر ملا هبتالله اخوندزاده په «بیعت» کتاب کې چې تر اوسه نه دی خپور شوی ویلي، که د دوی صف متحد وي بیا دې واشنګټن او ناټو زور وهي او دوی دې د شریعت له نفاذ څخه راوګرځوي.
د جنوبي افریقا چارواکي هغه «مرموزه الوتنه» څېړي چې له امله یې له ۱۵۰ زیات فلسطینیان د اسنادو پرته له غزې څخه دغه هیواد ته لېږدول شوي دي. دا الوتنه چې پنجشنبه د «او ار تامبو» نړیوال هوایي ډګر ته رسېدلې وه، مسافر یې نږدې ۱۲ ساعته د اسنادو نشتوالي له امله په الوتکه کې ساتل شوي وو.
د ایران د پارلمان غړی فرهاد شهرکي ویلي، چې د ایران او افغانستان ترمنځ سرحدي، سوداګریزه او اقتصادي همکاري به د هلمند سیند په اوبو کې ایران ته د حقابې په ورکولو پورې مشروطه وي.
د افغانستان الف کرېکټ لوبډلې د ځوانانو اسیا جام کرېکټ سیالۍ پر بریا پیل کړه او په خپله لومړنۍ لوبه کې یې د سریلانکا الف لوبډلې ته د درېیو ویکټو په توپیر ماتې ورکړه.
د اندونیزیا د پېښو پر وړاندې د مبارزې ادارې ویلي، چې د مرکزي جاوا د سیلاچاپ ښار په سیبیونینګ کلي کې د ځمکي ښوېدنې په پېښه کې ۱۲ کورونه ویجاړ شوي، چې له امله یې ۱۱ کسان مړه او ۱۲ نور لادرکه دي.
د اردن پاچا دویم عبدالله د شنبې په ورځ د پاکستان پلازمینې اسلام ته ورسېد. د پاکستان لومړي وزیر شهباز شریف او د پاکستان ولسمشر اصف علي زرداري په نورخان هوايي ډګر کې د اردن د پاچا تود هرکلی کړی.
د افغانستان لپاره د اسلامي هیوادونو همکارئ سازمان استازي طارق علي بخیت د اندونیزیا د بهرنیو چارو له مرستیال انیس متا سره لیدلي دي. په لیدنه کې د افغانستان د خلکو د ملاتړ لپاره ددې سازمان هڅې هم ارزول شوي دي.
د طالبانو تر واک لاندې د بدني روزنې ریاست وايي چې د وزلوبې سیالۍ د بلخ په مرکز د مزار شریف په سپورټي میدان کې ترسره شوې، چې ددې ولایت ۱۵۰ چاپندازانو پکې برخه اخیستې وه. دوی زیاتوي، چې وزلوبو سیالۍ د بلخ سربېره په بامیانو، کندز او سرپل ولایتونو کې هم سیالۍ ترسره شوي دي.
د طالبانو د کورنیو چارو وزارت د نشه يي توکو پر وړاندې د مبارزې معنیت ویلي، چې په ننګرهار کې یې په تېرو دوو اوونیو کې ۴۱ کسان د نشه يي توکو د قاچاق او استعمال په تور نیولي دي.
د امریکا ولسمشر دونالد ټرمپ وايي چې واشنګټن د سعودي عربستان هغه غوښتنه ارزوي چې غواړي له امریکا څخه «ایف – ۳۵» له رادار څخه پټېدونکې جنګي الوتکې وپیري. تمه ده چې دا تړون په راتلونکې اوونۍ کې د سعودي د وليعهد محمد بن سلمان د واشنګټن د سفر پر مهال لاسلیک شي.
د طالبانو د ټولګټو وزارت وايي، چې په میدان وردګو ولایت کې د کابل ـ بامیانو دویمې لویې لارې اړوند د مرکز میدان ښار څخه تر جلریز ولسوالۍ پورې د ۲۵ کیلومتره سړک د اساسي او معیاري جوړونې پروژه د شاوخوا ۵۷۰ میلیونه افغانیو په لګښت پیل او په ۱۵ میاشتو کې به یې چارې بشپړې شي.
د روسیې د بهرنیو چارو وزارت ویاندې ماریا زاخارووا ویلي، که طالبان او پاکستان غوښتنه وکړي، مسکو به د دواړیو لوریو ترمنځ د سولې په برخه کې خپله همکاري ونه سپموي.
د طالبانو له خوا له پاکستان سره د سوداګریزو او ټرانزیټي اړیکو د پرې کولو له پریکړې وروسته، د طالبانو د صنعت او سوداګرۍ وزیر نورالدین عزیزي ایران ته سفر کړې. عزیزي په هیرمند کې د ایران او افغانستان ترمنځ په ګډه اقتصادي غونډه کې ګډون وکړ، او له چابهار بندر څخه به هم لیدنه وکړي.
د طالبانو ټولګټو چارو وزارت ویلي، چې د ازبکستان د ترانسپورټ او لوجستیک نړوال فورم په څنډه کې یې د قزاقستان او ازبکستان د اوسپنې پټلۍ له مسولینو سره د هرات–کندهار د اوسپنې پټلۍ رغولو، چین ته د توکولو د لېږد رالېږد او د افغان ـ ټرانس پروژې د تخنییکي مطالعاتو د پیل په اړه خبرې کړي.
د طالبانو د اطلاعاتو او کلتور وزارت وایي، چې په کندهار کې یې د تېرې جګړې اړوند ځینو پېښو د عیني شاهدانو خبرې مستند کړي ترڅو یې راتلونکو نسلونو ته وسپاري. وزارت په اعلامیه کې لیکلی، چې د کندهار د زندان هغه تونل یې هم مستند کړ، چې ورڅخه ددې ډلې ۵۴۱ تنه نظامي بندیان ژوندي وتلي وو.
د امریکا لوړپوړو پوځي او حکومتي چارواکو په تېرو څو ورځو کې درې ځله په سپینه ماڼۍ کې له ولسمشر ډونالد ټرمپ سره لیدلي، څو پر ونزویلا د احتمالي پوځي عملیاتو په اړه سلا مشوره وکړي. سرچینې وايي که څه هم د ټرمپ وروستۍ پرېکړه لا نده معلومه، خو د برید په اړه جدي بحثونه روان دي.