آرشیف

قطر د طالبانو له لوري د امریکايي وګړي «ډینس کویل» د خوشې کېدو هرکلی کړی او دا ګام یې د طالبانو له خوا د نړیوالې ټولنې پر وړاندې د ښه نیت په توګه ګڼلی دی.

د اروپایي پارلمان غړو د کډوالۍ هغه جنجالي طرحه تصویب کړه چې اجازه ورکوي د اتحادیې له پولې بهر د پناه غوښتونکو د بیرته ستنولو مرکزونه جوړ شي. دغه طرحه د ۳۸۹ موافقو او ۲۰۶ مخالفو رایو سره تصویب شوه.

د طالبانو ویاند ذبیح الله مجاهد وایي، چې د یادې ډلې رییس الوزرا ملا محمد حسن اخوند، د مالیزیا د لومړي وزیر، محمد انور ابراهیم، سره په ټیلیفوني اړیکه کې پر سیمه ییزو پرمختګونو، په ځانګړي ډول د پاکستان او طالبانو ترمنځ پر کړکېچ او وروستي وضعیت خبرې کړې.

د طالبانو د امر بالمعروف وزارت وايي چې په تېرو دوو اوونیو کې یې د ښځو د شرعي حقونو اړوند ۹۲ قضیو ته رسېدنه کړې. په داسې حال کې چې په خپله د طالبانو له خوا پر ښځو ګڼ شمېر محدودیتونه لګېدلي دي.

په کابل کې د ترکیې سفارت وایي، چې د یاد سفارت شارژدافیر، سادین اییلدز، د طالبانو د صنعت او سوداګرۍ وزیر نور الدین عزیزي سره کتلي دي. دغه سفارت زیاتوي، چې دواړو لوریو د سوداګرۍ او اقتصادي اړیکو د پراختیا په اړه خبرې کړي دي.

طالب چارواکو په کابل کې د روږدو کسانو د درملنې پر مرکز د هوایي برید د ۵۰ قربانیانو د جنازې ډله ییز مراسم ترسره کړل. د طالبانو د عامې روغتیا وزارت ویاند، شرافت زمان، وویل چې لا هم د دې برید د ځینو وژل شویو کسانو جسدونه لادرکه دي.

په افغانستان کې د ملګرو ملتونو د ماشومانو څخه د ملاتړ صندوق (یونیسف) استازي، تاج‌الدین اویوواله، په هېواد کې د ښوونیز کال له پیل کېدو سره سم ویلي چې په افغانستان کې هره نجلۍ د زده‌کړو حق لري.

د ملګرو ملتونو د خوړو نړیوال پروګرام وایي، چې د طالبانو او پاکستان ترمنځ د ډیورنډ کرښې ته په نږدې سیمو کې د کړکېچ په زیاتېدو سره، شاوخوا ۲۰زره کورنۍ د امنیت په لټه کې بې ځایه شوي دي.

د پاکستان د بهرنیو چارو وزیر اسحاق ډار ویلي، چې د منځني ختیځ د روانې جګړې د پای ته رسولو په اړه د سولې د خبرو اترو په اړه اوازې ناسمې دي. نوموړي ټینګار کړی چې اصلي پرمختګونه د پاکستان له لارې د امریکا او ایران ترمنځ د غیرمستقیمو اړیکو او پیغام‌ رسونې له لارې روان دي.

د طالبانو د پېښو پر وړاندې د مبارزې اداره وایي، چې د هېواد په بېلابېلو ولایتونو کې د وروستیو ۲۴ساعتونو په ترڅ کې سیلابونو پنځه کسان مړه کړي، شپږ نور یې ټپیان کړي او مالي زیانونه یې هم اړولي دي.

تورخم دروازه له اوږده ځنډ وروسته نن پنجشنبه، د وري په ۶مه، یو ځل بیا یوازې د بېرته ستنېدونکو افغان کډوالو لپاره پرانیستل شوه. دا چې دا دروازه به ترکله خلاصه وي په دې اړه نور جزییات نه دي خپاره شوي.

افغانستان کې نوی تعلیمي کال پیل او د ښوونځیو زنګونه ووهل شول، بیا لارې او کوڅې له هغو ماشومانو څخه ډکېږي چې مکتب ته ځي،خو د دوي په منځ کې د نجونو یوه لویه تش ښکاري چې له زده کړو محرومي دي. په همدې حال کې د پښتونخوا مېرمنې وېره لري چې د افغان مېرمنو تریخ برخلیک پر دوی تکرار نشي.

د طالبانو ستره محکمه وایي چې له کوچني اختر راوروسته یې په دریو ورځو کې د افغانستان په بېلابېلو ولایتونو کې پر شپږو کسانو د بند او پر دُرو د وهلو سزاوې عملي کړې دي.

د یونیسف د جنوبي اسیا د سیمه‌ییز دفتر مشر سنجې ویجسیکېرا وایي چې د ښوونیز کال پیل باید د هر ماشوم لپاره د هیلو زیری وي، خو په افغانستان کې نجونې له اوږدې مودې راهیسې د زده‌کړو له حق څخه بې برخې پاتې دي. هغه له طالبانو غوښتي چې د نجونو پر مخ د ښوونځیو دروازې پرانیزي.

د چمن ځایي چارواکو په دغه ښار کې د افغان کډوالو په نوم یوشمېر هټۍ او مارکېټونه وتړل. د چمن مرستیال کمېشنر عزیزالله کاکړ او د پولیسو ځايي مشر طاهر کیاني ویلي، هغه ټول کاروبارونه بند شول چې په ناقانونه توګه د مېشتو افغان کډوالو له لوري اداره کېدل.

له تورخم نه د افغانستان انټرنشنل ـ پښتو خبریال جواد شینواري‌ راپور ورکړی، چې نن د پاکستان له بېلابېلو زندانونو څخه افغانستان ته د ستنولو لپاره د افغان کډوالو لومړۍ ډله تورخم ته ولېږدول شوه. هغه وایي، دغه ۴۰ زندانیان د لنډي کوتل د کډوالو له مرکز څخه تورخم ته ولېږدول شول.

د طالبانو د پوهنې وزارت نن پنجشنبه (د وري ۶مه) د یو لړ مراسمو په ترڅ کې د ۱۴۰۵ ښوونیز کال پیل کړ او طالب چارواکو د ښوونځي زنګونه وکړنګول. د طالبانو د بندیز له مخې؛ د نجونو ښوونځي د پنځم پرله‌پسې کال لپاره تړلي دي او طالبانو د نوي ښوونیز کال په پیل کې د نجونو هیڅ یادونه ونه‌کړه.

د طالبانو د چارو ادارې رییس نورالحق انور د پنجشنبې په ورځ (د وري ۶مه) په خپلو خبرو کې ادعا وکړه، چې د پخواني حکومت ښوونیز نصاب له بهر څخه راوړل شوی و. هغه د ۱۴۰۵ ښوونیز کال د پیل په مراسمو کې وویل، چې هغه نصاب د خلکو اړتیاوې نه پوره کولې.

اروپايي ټولنې اعلان کړی، چې د جګړو له امله د بې‌ځایه شویو کورنیو سره یې د مرستې لپاره ۲۵۰زره یورو بشري مرسته ځانګړې کړې. یادې ټولنې ویلي، چې دغه مرسته به د تېر کال د زلزلې د زیانمنو ترڅنګ د جګړې له کبله بې‌ځایه شویو کورنیو ته ورسوي.

په لندن کې تر دوه ورځنۍ ناستې وروسته یوشمېر سیاست‌والو او د طالبانو مخالفو غورځنګونو استازو په یوه ګډه اعلامیه کې ټینګار وکړ، چې د افغانستان راتلونکی سیاسي نظام باید د خلکو د ارادې او رایو پر بنسټ او د عصري اساسي قانون په چوکاټ کې وي.

د طالبانو د ټولګټو چارو وزارت خبر ورکړی، چې په تېره یوه اونۍ کې (د کب له ۲۲مې تر ۲۸مې) د اوسپنې پټلۍ له لارې ۱۶۹زره او ۵۶۵ مټریک ټنه انتقالات شوي دي. په دغه انتقالاتو کې صادرات هم شامل دي.