په کندوز کې د طالبانو د امنیه قوماندانۍ ویاند جمعه الدین خاکسار وایي، د جمعې په سهار د (لړم ۱۶مه) شاوخوا ۷:۳۰ بجې د کندوز ښار د اتمې حوزې اړوند چاودنه کې یو کس وژل شوی. هغه وایي، وژل شوي کس د برید د پلان په موخه چاودېدونکي توکي لېږدول چې خپله پرې چاودېدلي دي.
د طالبانو د کورنیو چارو وزارت د نشهيي توکو پر وړاندې د مبارزې مدیریت خبر ورکړی، چې په کابل کې یې د یو لړ ځانګړو عملیاتو په ترڅ کې ۱۳۳زره نشهيي ګولۍ نیولې دي. دغه وزارت وایي، یاد عملیات یې د کابل په څلورمې، پنځمې او ۱۲مې امنیتي حوزې کې ترسره کړي دي.
د ملګرو ملتونو د کډوالو عالي کمېشنر فیلیپو ګرانډي د ملګرو ملتونو د عمومي اسمبلۍ درېیمې کمیټې ته په خپلې وروستۍ وینا کې د ایران او پاکستان له لوري د زرګونه افغان کډوالو د جبري ستنولو په اړه سخت خبرداری ورکړی او دا یې د بشري حقونو څخه ښکاره سرغړونه بللې ده.
د ویتنام دولتي رسنیو خبر ورکړی، د کلمایګي توپان په ویتنام کې لږترلږه پنځه کسان مړه کړي دي. د راپورونو له مخې؛ کلمایګي توپان چې د پنجشنبې په ماښام مرکزي ویتنام ته ورسېده، تر ۳زرو ډېر کورونه یې ونړول او د برېښنا مزي یې هم پرې کړل.
د طالبانو مرستیال ویاند حمدالله فطرت ویلي، چې په افغانستان کې د نشهيي توکو د تولید، قاچاق او کښت کچه صفر ته نږدې شوې او ۹۹سلنه یې په دې برخه کې پرمختګ کړی. نوموړي د ملګرو ملتونو هغه راپور رد کړی، چې ګوندې افغانستان کې د شیشې تولید ډېر شوی او لا هم د کوکنارو کرکیله شته.
د افغانستان د فوټسال ملي لوبډله د اسلامي هېوادونو ترمنځ د یووالي سیالیو په لړ کې سبا د مراکش ير وړاندې د لوبو ډګر ته ښکته کېږي. دغه لوبه د کابل په وخت د غرمې په ۱۱:۳۰ بجو د ریاض په کوربهتوب پیلېږي.
د خیبر پښتونخوا ایالتي حکومت اعلان کړی، چې د نومبر پر ۱۲مه نېټه به د دغه ایالت د خرابېدونکي امنیتي وضعیت د ارزونې لپاره د سولې جرګه راوبولي. د دغه جرګې موخه په یاد ایالت کې د پوځي عملیاتو مخالفت بلل شوی او مرکزي حکومت هم پهکې د ګډون بلنه منلې.
د طالبانو او پاکستان تر منځ د درېیم پړاو خبرو اترو لړۍ د پنجشنبې په ورځ د (لړم ۱۵مه) په استانبول کې پيل شوه؛ خو له دې سره هممهاله يو لوړپوړی پاکستانی چارواکی وايي، د اسلاماباد غوښتنې «نهبدلېدونکې» دي او هېواد به یې له خپل دریځه شاتګ ونهکړي.
د لبنان پر سوېل د اسراییل په بریدونو کې یو کس وژل شوی او نهه نور ټپیان دي. د لبنان دولتي خبري اژانس (NNA) ویلي، چې اسراییلي جنګي الوتکو د استوګنې سیمې بمبار کړې دي.
د افغانستان ۱۹ کلنو کرېکټ ملي لوبډلې نن د بنګلهدېش د ۱۹ کلنو لوبډلې پر وړاندې د پنځو یو ورځنیو لوبو لړۍ څلورمه لوبه پیل کړه. افغان لوبډلې د یادې لوبې پچه وګټله او لومړی یې د توپوهنې پرېکړه وکړه.
د طالبانو او پاکستان ترمنځ پر ډیورنډ د نښتو له امله کابو میاشت وشوه، چې د تورخم په ګډون پر یاده کرښه یو شمېر نورې لارې هم د سوداګریرې راکړې ورکړې پر مخ تړلې دي. دواړه غاړې زرګونه بار وړونکي موټرونه د خلاصون په تمه ولاړ دي او سوداګرو ته مېلیونونه ډالر زیانونه هم اوښتي دي.
«کلمایګي» توپان د فلیپین مرکزي سیمې ویجاړې کړې دي او د یاد هېواد په بېلابېلو برخو کې یې ۱۴۰ کسان مړه او لسګونه نور تري تم کړي دي. د دغه توپان او سېلابونو له امله د فلیپین په سیبو ښار کې کورونه په بشپړ ډول تر اوبو لاندې شوي دي.
کمال الدین د خپل نړېدلي خټین کور ته نږدې ناست و، تر څنګ یې له کوره ځینې راېستل شوي توکي هم پراته وو او سترګې یې په خپلو هغو دېوالونو ګنډلې وې، چې نیم نړېدلي وو او ځینې برخې یې لا پر ځای پاتې وې. د سمنګان په خلم ولسوالۍ کې د ده په څېر د سلګونه کسانو کورونه نړېدلي دي.
تحریک انصاف ګوند د پښتونخوا په امن جرګې کې د ګډون لپاره فدرالي حکومت ته بلنه ورکړه. د پاکستان د سرحدونو او قبایلو چارو فدرالي وزیر امیر مقام ویلي، چې «ټول باید سره کېني او د سولې لپاره کار وکړي. تر دې وړاندې هم موږ خپل اختلافات هېر کړي وو او د سولې په جرګه کې مو ګډون کړی و.»
د امریکا ولسمشر ډونالډ ټرمپ اعلان وکړ، چې قزاقستان په رسمي ډول د ابراهیم تړون سره یوځای کېږي. ټرمپ دغه څرګندونې په سپینه ماڼۍ کې د منځنۍ اسیا هېوادونو له مشرانو سره تر لیدنې وروسته له رسنیو سره په خبرو کې کړې دي.
رویټرز امریکا او سپینې ماڼۍ ته د سوریې د لنډ مهاله مشر احمد شرع د سفر په درشل کې راپور ورکړی، چې امریکا د سوریې او اسراییل ترمنځ د امنیتي تړون د پلي کولو لپاره د دمشق په یوې هوايي اډه کې د سرتیرو د ځای پر ځای کولو لپاره چمتووالی نیسي.
د ملګرو ملتونو امنیت شورا د سوریې پر ولسمشر احمد الشرع لګېدلي بندیزونه لرې کړي دي. ټاکل شوې چې نوموړی د راتلونکې دوشنبې په ورځ د امریکا له ولسمشر ډونالډ ټرمپ سره په سپینه ماڼۍ کې هم وګوري.
د امریکا د سنا مجلس په ۵۱ موافقو او ۴۹ مخالفو رایو هغه طرح رد کړه، چې د ټرمپ حکومت به یې له وېنزویلا سره د جګړې له پیلولو منع کاوه.
د طالبانود صنعت او سوداګرۍ وزارت وایي، چې د سوداګرو، پانګوالو او یو شمېر دولتي او خصوصي بنسټونو له خوا د (د تولیدي او خدماتي ظرفیتونو د پېژندلو) تر سرلیک لاندې ۱۷م نړۍوال نندارتون پرانیستل شو. د وزارت په وینا، یاد نندارتون کابل کې د لویې جرګې په تالار کې پرانېستل شوی دی.
نانسي پلوسي یوازنۍ ښځه ده، چې د امریکا د استازو جرګې د ځواکمنې مشرې په توګه یې دنده ترسره کړې ده. هغې د سیاست په ډګر کې له څلور لسیزو فعالیت وروسته خپله تقاعدي اعلان کړه. د کالیفورنیا ۸۵ کلنې استازې په یوه پیغام کې ویلي، هغه به راتلونکی کال د کانګرس په ټاکنو کې برخه وا نهخلي.
د پاکستان د جمعیت علمای اسلام مشر مولانا فضل الرحمان په یوې خبري غونډه کې د دې پوښتنې په ځواک کې چې ترکیه کې د استخباراتي پلاوي پر ځای باید د پاکستان د سیاسیونو یو پلاوی د خبرو میز ته ناست وای ویلي، چې سیاسیون د استخباراتي پلاوي په کچه ښه مذاکرات نهشي کولای.