د طالبانو او پاکستان ترمنځ پر ډیورنډ کرښه د وروستیو نښتو له امله زرګونه افغانان بېځایه شوي او ګڼې کورنۍ له سخت بشري وضعیت سره مخ دي. د ملګرو ملتونو د معلوماتو له مخې؛ په تېرو میاشتو کې نږدې ۱۰۰زره کسان د جګړو له امله د خپلو کورونو پرېښودو ته اړ شوي دي.
د بلوچستان ایالت عبدالله کلا ولسوالۍ په ګلستان سیمه کې د اختر په ورځ د ځمکې د ملکیت پر سر د دوو کورنیو ترمنځ خونړۍ نښته شوې، چې له امله یې دوه کسان وژل شوي او څلور نور ټپیان دي.
د افغانستان کرېکټ بورډ اعلان کړی، چې د هېواد د کرېکټ ملي لوبډلې لوبغاړي د هند په وړاندې د ټېسټ او یو ورځنیو نړۍوالو لوبو لپاره هند ته تللي دي. ټاکل شوې ده، چې افغان لوبډله به د هند پر وړاندې یوه ټېسټ او درې یو ورځنۍ لوبې وکړي.
یو امریکایي چارواکی وايي، امریکایي پوځ په ایران کې پر یوه پوځي سایټ تازه بریدونه کړي دي. دا بریدونه څو ساعته وروسته له هغې وشول چې ټرمپ د دغې ستراتیژیکې اوبولارې له لارې د بېړیو د تګ راتګ د بېرته پیلولو په اړه د ایران له لوري د یوې هوکړې په تړاو راپور رد کړ.
د افغانستان پخواني لوی څارنوال محمد فرید حمیدي خبرداری ورکړی، چې د طالبانو تر واکمنۍ لاندې د قضایي سیسټم په له منځه وړلو سره د ښځو غږ په بشپړ ډول بند شوی دی. نوموړي ویلي، چې د تېر نظام تر سقوط وروسته لږ تر لږه ۵۷ څارنوالان او د هغوی د کورنۍ غړي په نښه شوي او وژل شوي دي.
د طالبانو د کډوالو او راستنېدونکو چارو وزیر عبدالکبیر له ارګ څخه جلا په سپیدار ماڼۍ کې د اختر لمونځ په مراسمو کې له ټولو هېوادونو او په ځانګړې توګه له ګاونډیو او د سیمې له هېوادونو سره پر مثبتو اړیکو له ټينګار سربېره وویل، له ټولو هېوادونو سره د مداخلې نهکولو سیاست مخې ته وړي.
د هېواد په لویدیځ کې د طالبانو د ۲۰۷ الفاروق قول اردو وايي، په غور ولایت کې یې په دوو بېلابېلو عملیاتو کې ۱۰۰ کیلوګرامه نشهيي توکي او یوه وسله یې ترلاسه کړي دي. خو دغې قول اردو په دې اړه چې په تړاو یې څوک نیول شوي که نه، څه نهدي ویلي.
د پاکستان لومړي وزیر شهباز شریف د دغه هېواد د اټومي ځواک د ورځې په مناسبت ویلي، د طالبانو «رژیم» د پاکستان پر ضد له هند سره مرسته کوي. نوموړي ټینګار کړی، چې اسلاماباد به د افغانستان په خاوره کې د ګواښونو د لهمنځه وړلو لپاره د افغان طالبانو پر ضد خپلو پوځي عملیاتو ته دوام ورکړي.
د سعودي عربستان د احصایې عمومي ادارې ویلي، چې د روان کال د حج په مراسمو کې د ګډون کوونکو شمېر له یو میلیون او ۷۰۷ زرو کسانو اوښتی دی. له دې ډلې څه باندې یو میلیون او ۵۴۶ زره حاجیان د نړۍ له بېلابېلو هېوادونو څخه ورغلي دي. په دې کې ۳۰ زره افغان حاجیان هم شامل دي.
په مالیزیا کې د طالبانو د سفارت سرپرست په دغه هېواد کې له یو شمېر افغان سوداګرو، محصلینو او یو شمېر نورو افغانانو سره د اختر په مناسبت لیدنه کې د هېواد بیارغونې او پرمختګ لپاره د مرستې غوښتنه وکړه.
د جرمني زرغون ګوند د خپل هېواد له حکومته غوښتي، دا وضاحت ورکړي، چې ولې د کډوالۍ ادارې یې له طالبانو سره د افغان کډوالو د اېستلو په اړه خبرې کړې دي. دغه ګوند د افغان کډوالو د اېستلو د همغږۍ لپاره د طالبانو له بهرنیو چارو وزارت سره د جرمني اړیکې د پوښتنې وړ بللې دي.
د پاکستان د پوځ مشر عاصم منیر د بلوچستان صوبې ژوب ولسوالۍ ته سفر کړی او هلته یې پر ډیورند کرښه له مېشتو عسکرو سره د لوی اختر لمونځ کړی دی. نوموړي په دې سفر کې ویلي، چې پاکستاني پوځیان د ترهګرۍ د مخنیوي او وسلهوالو د ځپلو لپاره عالي مورال لري.
د ایران د زاهدان د اهل سنت امام جمعه، مولانا عبدالحمید د «لوی اختر» په مراسمو کې هیله وښوده، چې د ایران او امریکا ترمنځ هغه خبرې اترې چې «ټاکل شوې ده د جګړې مخنیوی وکړي»، پایلې او دواړه لوري یوې هوکړې ته سره ورسیږي.
د امریکا د جګړې وزیر پیټ هېګسېت خبرداری ورکړی، که روانې خبرې اترې د ایران اسلامي جمهوریت د اټومي وسلو د ترلاسه کولو مخه ونهنیسي، هېواد به یې یو ځل بیا پوځي اقدام وکړي.
د روسیې د ملي امنیت شورا منشي ویلي، چې «په افغانستان یا د هغه په ګاونډیو هېوادونو کې د امریکا او ناټو غړو هېوادونو د پوځي تاسیساتو جوړول» یو نه منونکی اقدام دی.
د ترکیې سرې میاشتې او «دیانت» خیریه بنسټ په مالي ملاتړ په کابل کې پر ۲ زره اړمنو کورنیو ۱۰ ټُنه د قربانۍ غوښه ووېشل شوه. د طالبانو تر کنټرول لاندې د افغاني سرې میاشتې ټولنې په وینا، هرې کورنۍ ته ۵ کیلوګرامه غوښه ورکړل شوې ده.
د تحریک انصاف د خیبر پښتونخوا مشر جنید اکبر ویلي، د دغه ګوند بندي بنسټګر او د پاکستان پخواني لومړي وزیر عمران خان ته اډیاله زندان کې د اختر د لمانځه د ادا کولو اجازه نهده ورکړل شوې. راپورونه وایي، نوموړي ته د امنیتي اندېښنو له امله د اختر لمانځه کې د ګډون اجازه نهده ورکړل شوې.
د بښنې نړیوال سازمان د پاکستان له حکومت څخه غوښتي چې د پښتون ژغورنې غورځنګ د فعال فریدالله اپریدي د تښتول کېدو په اړه سملاسي خپلواکې او رڼې پلټنې وکړي. فریدالله اپریدی د روانې مې میاشتې پر ۱۸مه (د غويي ۲۸مه) ماښام مهال د خیبر پښتونخوا له پېښور ښار څخه لادرکه شوی دی.
د افغانستان د ملي جنبش ګوند مشر عبدالرشید دوستم د لوی اختر په مناسبت په خپل پیغام کې د هېواد پر روان وضعیت سخته اندېښنه ښودلې او خبرداری یې ورکړی، که طالبان خپل سیاستونه بدل نهکړي، نو هېواد به یو ځل بیا د کورنۍ جګړې په اور کې وسوځي.
د امریکا ولسمشر ډونالډ ټرمپ ویلي چې ایران له امریکا سره د یوې هوکړې د ترلاسه کولو لپاره جدي هڅه کوي، خو واشنګټن تر اوسه له وړاندیز شوې طرحې راضي نه دي او کېدای شي وروسته راضي شي او که نه پاتې کار به بشپړ کړي.
د طالبانو دفاع وزیر ملا یعقوب د ایران د امنیت شورا له پلاوي سره په ناسته کې ویلي، چې د افغانستان خاوره، پولې او هوا هېڅکله د ایران پر ضد د ګواښ سرچینه نه ده پاتې شوې. یعقوب ټینګار کړی، چې کابل دا موضوع په وروستۍ جګړه کې ثابته کړې ده.