آرشیف

د ناټو سرمنشي مارک روټه ویلي، چې روسیې د اوکراین په جګړه کې «ډېر درانه او بې‌ساري زیانونه» لیدلي او یوازې په تېرو دوو میاشتو کې یې شاوخوا ۶۵زره سرتېري له لاسه ورکړي دي.

د طالبانو له خوا د ښځو پر وړاندې له شته محدودیتونو سره د دغه ډلې د امر بالمعروف او نهې عن المنکر وزارت، نن شنبه د سلواغې ۲۵مه، پر اېکس خواله رسنۍ ادعا کړې، چې په میدان‌وردګ، بلخ، جوزجان، تخار او پروان ولایتونو کې یې ۸ مېرمنې له کورني تاوتریخوالي ژغورلې دي.

د طالبانو د سوداګرۍ وزارت وايي، چې کندز ولایت کې د کورنیو تولیداتو او محصولاتو یو نندارتون د کورنیو تولیداتو د ملاتړ، د اقتصاد د ودې، د پانګونې د راجلبولو او د نندارتون د کلتور د ودې په موخه د سوداګرو، صنعتکارانو او عامو مشرانو په شتون سره پرانستل شو.

د طالبانو د پېښو سره د مبارزې چمتوالي اداره وایي چې د ماین پاکۍ موسسې ( ایم سي پي ای) سره په همغږۍ یې د کندز په خان‌اباد ولسوالۍ کې او د دغه ولايت د مرکز په اړوندو سيمو کې ناچاوده توکي کشف او په خوندي توګه یې خنثی او له منځه وړي دي.

د طالبانو د امربالمعروف وزارت وایي، چې د دوی محتسبینو په کابل او تخار ولایتونو کې د جادوګرۍ په تور څلور کسان نیولي دي. دوی په یوه خپره کړې خبرپاڼه کې یاد کسان په «درغلۍ » تورن کړي او زیاته کړې یې ده، چې د «باطني واکونو» په ښودلو سره د « اسلامي قانون خلاف» کړنې ترسره کوي.

د طالبانو د اوبو او انرژۍ وزارت خبرداری ورکړی چې په راتلونکو دوو ورځو کې د سختو ورښتونو له امله د افغانستان په ۱۲ولایتونو کې د سېلابونو د راوتلو او د سیندونو د اوبو د کچې د لوړېدو احتمال شته.

د طالبانو د ننګرهار د والي مرستیال غلام الرحمن حیدري دا تاییدوي، چې ددې ولایت په یو شمیر سیمو کې د کانونو ناقانونه کېندنې روانې دي. هغه سپارښتنه کړې، چې د کانونو اړوند سيمو کې د علماوو او قومي مخورو په همکارۍ عامه پوهاوی وکړي او په نښه شويو سيمو کې غير قانوني فعالیت ودروي.

د طالبانو د کار او ټولنیزو چارو وزارت اعلان کړی چې د راروانې روژې مبارکې میاشتې لپاره یې د مرکز او ولایتونو په کچه د دولتي ادارو د کارکوونکو د کار د پیل او پای وختونه مشخص کړي دي.

د طالبانو د هرات ولایت رسنیو دفتر اعلان کړی چې په دې ولایت کې د سمنټو د یوې سترې فابریکې عملي چارې په رسمي ډول پیل شوي دي او ټاکل شوې ده چې د راتلونکو ۱۴میاشتو په موده کې به بشپړې شي.

رویټرز د دوو امریکایي چارواکو په حواله راپور ورکړی، چې د امریکا پوځ د ایران پر وړاندې د د څو اونیو احتمالي عملیاتو لپاره چمتووالی نیسي. راپور کې ویل شوي چې دا عملیات کولی شي د دواړو هیوادونو ترمنځ د تیرو په پرتله ډیرې جدي شخړې رامینځته کړي.

د طالبانو ستره محکمه وایي چې په تېره یوه اوونۍ کې یې د افغانستان په بېلابېلو ولایتونو کې پر ۳۴ کسانو د بند تر څنګ په دُرو د وهلو سزاوې عملي کړې دي.

د چین د بهرنیو چارو وزیر، وانګ یي، ویلي چې دا مهال په ټوله نړۍ کې شاوخوا ۶۰جګړې روانې دي او ټینګار یې کړی چې دغه شخړې باید د خبرو اترو او سیاسي حل‌لارو له لارې پای ته ورسېږي.

د طالبانو د کورنیو چارو وزارت وايي، چې د کابل په بېلابېلو حوزو کې یې د عملیاتو په ترڅ کې څلور تنه د نشه يي توکو د پلور په تور نیولي دي. دوی په یوې جلا خبرپاڼه کې زیاتوي، چې د بلخ ولایت د حیرتان بندر په ښارګوټي کې یې دوه تنه د موبایل پلورنځي څخه د غلا په تور هم نیولي دي.

د امریکا بهرنیو چارو وزیر، مارکو روبیو، نن د شنبې په ورځ د مونیخ امنیتي کنفرانس په غونډه کې ټینګار وکړ چې نړیوال نظم باید د هېوادونو پر ملي ګټو لومړیتوب ونه لري. هغه وویل، واشنګټن غواړي له اروپا سره خپل اتحاد ته دوام ورکړي، خو تمه لري چې متحدان یې د خپل ځان د دفاع وړتیا هم ولري.

د ایران د نفت وزارت د سوداګریزو چارو مرستیال سید علي محمد موسوي د طالبانو د ټرانسپورټ او هوايي چلند وزارت د ځمکني ټرانسپورټ مرستیال عبدالسلام حیدري سره لیدنه کړې. په کابل کې د ایران سفارت وایي، په ناسته کې د ایران او افغانستان ترمنځ د ټرانسپورټی ستونزو په حل خبرې اترې شوي دي.

د طالبانو عدلیې وزارت اعلان کړی چې د ځمکو د بېرته ترلاسه کولو عالي کمېسیوند غزني ولایت په سلطان محمود غزنوي ښارګوټي کې شاوخوا ۱۷۳۰ جریبه ځمکه دولتي پېژندلې ده. دغه وزارت ادعا کړې چې له دې ځمکو څخه ۹۱۵ جریبه د غزني ښار په پنځمه ناحیه کې د اشخاصو په تصرف کې وه.

د خیبر پښتونخوا د لنډي کوتل له سیمې سرچینې وایي چې په دغه سیمه کې د افغان کډوالو پر ضد روان عملیات نور هم چټک شوي دي.

د طالبانو د عامې روغتیا وزارت وایي، د رادیولوژي ملي انستیتیوت هره ورځ شاوخوا ۵۵۰ تر ۶۰۰ ناروغانو ته د طبي معایناتو او تشخیص خدمتونه وړاندې کوي. دا معاینات هغه ازموینې دي چې د ایکس‌رې، الټراساونډ او نورو تصویري وسایلو له لارې د ناروغیو د پېژندلو لپاره ترسره کېږي.

د اوکراین په سویلي ښار اوډیسا کې د روسیې د شپې ناوخته ډرون برید له امله د استوګنې یوې ودانۍ اور واخیست او یوه ښځه پکې ووژل شوه. د سیمې والي اولیګ کیپر ویلي، اور ژر مړ شو، خو یاده ښځه د برید قرباني شوه.

د افغانستان د سوداګرۍ او پانګونې خونې (ACCI) اعلان کړی چې د افغان سوداګرو او د روسیې فدراسیون د داغستان سوداګریز پلاوي ترمنځ د سوداګریزې ناستې په پایله کې د ترانسپورټ او خوراکي توکو په برخه کې د څه باندې ۱،۵ میلیونه ډالرو په ارزښت پنځه هوکړه‌لیکونه لاسلیک شوي دي.

د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ ۶۹۲ کډوالې کورنۍ چې ټول ۳۷۰۴ کسان کېږي، له ایران او پاکستان نه افغانستان ته جبري ستنې شوې دي.