د ایران د بهرنیو چارو وزارت د افغانستان د بغلان ولایت د پلخمري ښار په امام زمان جومات کې چاودنه وغندله. دا چاودنه د جمعې لمانځه پر مهال شوې. طالب چارواکو لا هم د دې پېښې د مرګ ژوبلې په هکله څه نه دي ویلي، خو جومات کې ریکارډ شوې ویډیوګانې ښيي چې خلکو ته مرګ ژوبله اوښتې ده.
ناصر کنعاني د دې چاودنې په غندلو سره وايي: «په جوماتونو کې لمونځغاړي او مومنان په نښه کول تر ټولو رزیل ترهګریز جنایت دی او دا ښيي چې عاملان یې د اسلام مبین دین له ریښتینو او رحماني لارښوونو لرې دي.»
د بغلان لپاره د طالبانو د اطلاعات او فرهنګ رییس مصطفا هاشمي رویټرز ته ویلي چې دا ډله د چاودنې د دول په هکله څېړنې کوي.
لا هم د دې برید مسوولیت کومې ډلې نه دی منلی. خو په تېر کې داعش د ورته بریدونو ټټر وهلی دی.
