وروسته له هغې چې یو شمېر بلوڅ مېرمنو او ماشومانو د دوی د ورکو شویو عزیزانو په لټه پسې سوله ییز لاریون وکړ او تر اسلام اباد ورسېدې، د اسلام اباد د پولیسو له خشن برخورد سره مخ شوې. د دوی له نیولو او بیا ازادولو وروسته د دغه تحریک غړي وايي، چې لا هم ورسره پولیس خشن برخورد کوي.
د اسلام اباد پولیسو درې ورځې وړاندې د بلوڅو ۲۵۰ تنه لاریون کوونکې نیولې وې او د هغوی د خورېدو په موخه یې پر هغوی اوښلن ګاز او اوبه پاشلې چې تازه له بلوچستانه پلازمېنې اسلام اباد ته راغلې وې.
د پاکستاني رسنیو د راپورونو له مخې؛ د پلازمېنې پولیسو د لاریون کوونکو د مشرې ماه رنګ بلوڅ په ګډون تر ۲۵۰ تنه د لاریون مخکښ کسان او سمبالوونکي نیولې وې.
ماه رنګ بلوڅ په خپلو تازه خبرو کې ویلي، چې تر اوسه د دوی غوښتنو ته مثبت ځواب نه دی ویل شوی او پولیس لا هم ورسره خشن برخورد کوي.
نوموړې له رسنیو سره په خبرو کې ویلي، چې دوی له خپل حق څخه نه تېریږي او تر هغې به پرلت ته ادامه ورکوي؛ تر څو یې چې د خپلو بلوڅو عزیزانو درک نه وي معلوم کړی.
بلوڅو لاریونوالو د اسلام اباد په ۲۶ نمبر چوک کې د پرلت خیمې وهلې دي او همدارنګه د اسلام اباد پرېس کلب مخې ته هم راغونډ شوي و.
د بلوڅانو پرلت په تېره نومبر میاشت کې د پاکستان بلوچستان ایالت په تربت کې وروسته له هغه پیل شو، چې د دغې سیمې خلکو د صوبې د ترهګرۍ ضد څانګې «سي ټي ډي» په چارواکو تور ولګاوه، چې د ۲۴ کلن بلاڅ بلوڅ تر وژنې وروسته یې په هغه د پنځه کیلوګرامه چاودېدونکو توکو د درلودلو تور لګولی و.
د بلوچستان ایالت اوسېدونکي له کلونو راهیسې ادعا کوي، چې د پاکستان حکومت یې د حق غوښتلو پر مهال مخکښ کسان نیسي او له هغه وروسته يې مړي ژوندي ورک دي.
د پاکستان حکومت بیا دا تورونه رد کړي دي او په ورته وخت کې د پاکستان د موقت حکومت د اطلاعاتو وزیر ویلي؛هېڅوک حق نه لري، چې له بلوڅو لاریونوالو سره ناوړه چلند وکړي.
