د تېرې جمعې په ورځ د ماشومانو او وسله والو شخړو په برخه کې د ملګرو ملتونو ځانګړي دفتر راپور خپور کړی و، چې په لیکو کې د ماشومانو ګمارل، لومړنیو خدمتونو ته نه لاسرسی، فقر، د نجونو پر زدهکړو بندیز، جنسي تاوتریخوالی او کډوالۍ په افغانستان کې د ماشومانو وضعیت خورا زیانمن کړی.
خو د طالبانو ویاند ذبیح الله مجاهد د ماشومانو او وسله والو شخړو په برخه کې د ملګرو ملتونو ځانګړي دفتر یاد راپور رد کړی او وايي له افغانستان څخه بهر خپرېدونکي راپورونه کره نه دي.
د ملګرو ملتونو راپور ته په غبرګون کې د یک شنبې په ورځ د (مرغومي ۳مه) د طالبانو تر واک لاندې د افغانستان ملي راډیو پر خپله اېکس پاڼه د طالبانو ویاند ذبیح الله مجاهد غږیز کلیپ خپور کړی او نوموړی د ماشومانو او وسله والو شخړو په برخه کې د ملګرو ملتونو د ځانګړي دفتر راپور ردوي.
ذبیح الله مجاهد ویلي: «هغه راپورونه چې له افغانستانه بهر خپریږي دقیق نه دي دوی کوښښ کوي چې د دا ډول راپورونو له لارې د نظام او د افغانستان د خلکو په اړه پروپاګند کوي. د دوی هدف ماشومان او د هغوی ستونزو ته رسېدنه نه ده. که د ماشومانو مسله وی، دوی به په فلسطین کې د هغه ماشومانو دفاع کړې وی چې هره ورځ د اسراییل له لوري وژل کیږي.»
نوموړی همدا راز وايي د تېر شلو کلونو په پرتله د ماشومانو وضعیت ښه دی او ټول ماشومان زده کړو ته لاس رسۍ لري.
« په تېرو شلو کلو کې ماشومان له خطر سره مخ وو، هغوی وژل کیدل، یتیمان کېدل، کورنۍ یې له لاسه ورکولې، د ماینونو او نورو چاودونو قرباني کېدل.»
ذبیح الله مجاهد د ملګرو ملتونو د ماشومانو او وسله والو شخړو د ځانګړي دفتر د راپور په غبرګون کې ویلي چې اوس په افغانستان کې ماشومان په امن کې ژوند کوي او زدهکړو ته لاسرسی لري.
د ماشومانو او وسله والو شخړو په برخه کې د ملګرو ملتونو ځانکړي دفتر په خپل راپور کې ویلي و، واک ته د طالبانو تر رسېدو وروسته په افغانستان کې د ماشومانو په وړاندې د جدي سرغړونو ۴۵۱۹ پیښو تر څنګ د طالبانو په لیکو کې د۲۵۷ تنه ماشومانو د ګمارلو راپور تایید شوی.
دغه راپور زیاتوي چې ۳۲۴۸ تنه وژل شوي او معلول شوي، په ۲۱ تنو جنسي تیري شوي او ۳۳ تنه تښتول شوي دي.
