د روسیې د لومړي وزیر مرستیال الکسي اوچوک وايي، د دغه هېواد چارواکي او طالبان د افغان ـ ټرانس اورګاډي د پټلۍ جوړولو په اړه خبرې کوي. نوموړي د دغو خبرو د جزیاتو له ورکولو پرته وویل مسکو په دې پروژه کې د ګډون لپاره چمتو دی.
د ریانووستي خبري اژانس د راپور له مخې، د روسیې د لومړي وزیر مرستیال په کازان کې د روسیې ـ اسلامي نړېوال اقتصادي فورم په څنډه کې وویل، چې د افغان ـ ټرانس د اورګاډي پټلۍ پروژه په ډير تفصیل سره څېړل کیږي.
الیکسي اورچوک ټینګار وکړ چې روسیه اړین ظرفیتونه لري او له همدې امله چمتو دی چې د افغان ـ ټرانس اورګاډي په پروژه کې برخه واخلي.
د طالبانو د بهرنیو چارو وزارت شاوخوا یوه اونۍ وړاندې ویلي و، چې د ازبکستان د ترانسپورټ وزیر الهام محکموف د دې ډلې د بهرنیو چارو له وزیر امیرخان متقي سره په لیدنه کې ویلي چې د افغان ـ ټرانس اورګاډي پټلۍ د پروژې د سنجولو په موخه یې یو تخنیکي ډله کابل ته راوستلې ده چې عملي چارېیې پیل شي.
د افغان – ټرانس پټلۍ پروژه د افغانستان – پاکستان او ازبکستان تر منځ یوه درې اړخیزه پروژه ده چې د ازبکستان د اورګاډي شبکه د افغانستان له لارې د پاکستان د اورګاډي له شبکې سره نښلوي.
