د چین په ملکیت کې د ټولنیزو رسنیو پلیټ فارم د ټیک ټاک مالک د شنبې په ورځ وویل، چې د متحده ایالاتو سره خبرې اترې دوام لري، خو د واشنګټن سره هر ډول تړون به د چینایي قانون سره سم وي.
د ټيک ټاک مالک بایټ ډینس په یوه بیان کې وویل، چې ددغه ټولنیز پلیټ فارم اړوند مهم مسایل شتون لري چې باید حل شي.
د نوموړي په وینا: «شرکت د متحده ایالاتو له حکومت سره د ټیک ټاک يو اېس لپاره د احتمالي حل په اړه بحث کوي. تر اوسه تړون نه دی عملي شوی. کلیدي مسلې باید حل شي. هر ډول تړون به د چینایي قانون له مخې تصویب شي.»
دا خبرې وروسته له هغې راپورته شوې، چې د متحده ایالاتو ولسمشر ډونالډ ټرمپ د جمعې په ورځ اعلان وکړ، چې هغه د ټیک ټاک جبري پلور لپاره نېټه ۷۵ ورځې وغځوله، چې د مشهورو ټولنیزو رسنیو پلیټ فارم ته اجازه ورکوي، چې په متحده ایالاتو کې فعالیت ته دوام ورکړي.
دا د جنوري راهیسې دویم ځل دی چې د دغه پلېټ فارم شرکت ته نېټې د غځولو تمدید صادر شوی.
د ټیک ټاک راتلونکی ناڅرګنده پاتې دی، ځکه چې د پخواني ولسمشر جو بایډن له خوا لاسلیک شوی قانون د بایټ ډینس اړ کوي، ترڅو پلیټ فارم وپلوري یا له بندیز سره مخ شي.
دغه قانون د متحده ایالاتو سترې محکمې له خوا د ټیک ټاک قانوني ننګونې سره سره تایید شوی.
دا پلیټ فارم، چې ۱۷۰ میلیون امریکایي کاروونکي لري، د جنوري په میاشت کې د ټرمپ د ولسمشرۍ له لوړې دمخه د لنډ وخت لپاره بند شو، خو وروسته د بندیز بیا کتنې د لېوالتیا په صورت کې دوباره پرانیستل شو.
د رسنیو د راپورونو له مخې ، د امازون په ګډون ډېری د متحده ایالاتو شرکتونو د ټیک ټاک ترلاسه کولو لپاره داوطلبي کړې.
پنځه کلن رونین په تاریخ کې د ماینموندونکي موږک په توګه د ګينېس نړۍوال ریکاډ ترلاسه کړی دی.
هغه ۱۰۹ وژونکي ځمکني ماینونه او ۱۵ نور چاودېدونکي شبکې موندلي دي.
رونین د «ماګاوا» په نوم د موږک ځای نیولی چې هغه بیا د خپل پنځه کلن خدمت په بهیر کې ۷۱ ځکمني ماینونه او ۳۸ چاودېدونکي توکي موندلي وو.
د یادونې ده چې ماګاوا په ۲۰۲۱ کال کې له تقاعد وروسته د ماینونو په موندلو کې د خپلو هڅو په پار د سرو زرو مډال ترلاسه کړی و او په همدې کال کې ومړ.
کمبوډیا لا هم د ۱۹۶۰ او ۱۹۹۸ کلونو ترمنځ د تېرو کورنیو جګړو د پاتې شونو چاودېدونکو توکو له امله د ګواښ تر کرښې لاندې هېواد بلل کېږي.
د معلوماتو پر بنسټ، له ۱۹۷۹ کال راپدېخوا شاوخوا ۲۰ زره کسان د ماینونو او پخوانیو پوځي تجهیزاتو د چاودنو له امله مړه شوي، خو د ټپیانو کچه بیا تر دې دوه برابر لوړه ده.
رونین ښايي د دوو کلونو یا تر دې ډېرې مودې لپاره د انسانونو د ژوند ژغورنې په موخه خپل کار ته دوام ورکړي.