د پاکستان پوځ: شمالي وزیرستان کې ډیورنډ کرښې ته څېرمه مو اته وسله وال وژلي
د پاکستان امنیتي ځواکونو ویلي، چې د خیبر پښتونخوا په شمالي وزیرستان ولسوالۍ کې د ډيورنډ کرښې ته څېرمه یې د نفوذي برید په ترڅ کې اته وسله وال وژلي او څلور نور یې ټپیان کړي دي.
د پاکستان امنیتي ځواکونو ویلي، چې د خیبر پښتونخوا په شمالي وزیرستان ولسوالۍ کې د ډيورنډ کرښې ته څېرمه یې د نفوذي برید په ترڅ کې اته وسله وال وژلي او څلور نور یې ټپیان کړي دي.
د پاکستان د پوځ د عامه اړیکو ادارې (ISPR) په یوه خپره کړې خبرپاڼه کې ویلي، د یک شنبې په شپه یې د شمالي وزیرستان د حسن خېلو په سیمه کې هغه اته وسله وال وژلي چې غوښتل یې د ډيورنډ کرښې نه راواوړي او په پاکستان کې بریدونه وکړي.
په خبرپاڼه کې راغلي: " د دوی سرتېرو په اغېزمنه توګه د دوى د نفوذ هڅه شنډه کړه او له سختې نښتې وروسته اته وسله والو ووژل شول او څلور نور ټپيان شول."
خبرپاڼه وړاندې زیاتوي: "پاکستان بار بار د طالبانو له حکومته غوښتي چې د ډيونډ په کرښه موثره مدیریت ډاډمن کړي،"
خبر پاڼه زیاتوي، چې دوی تمه لري څو کابل به "خپل مکلفیتونه پوره کړي او د وسله والو له خوا د پاکستان پر وړاندې د ترهګریزو کړنو د دوام لپاره به د افغان خاورې کارولو ته به اجازه ورنکړي".
د پوځ په دغه خبرپاڼه کې راغلي، چې د دوی امنیتي ځواکونه په سیمه کې تصفیوي عملیات کوي تر څو سیمه له وسله والو پاکه کړي.
پاکستان له تېر کال راهیسې د نا امنۍ شاهد دی، تر ډېره ناامنه سیمي خېبر پښتونخوا او بلوچستان دي، چې د نا امنۍ پېښې پکې خورا ډېرې شوي.
د پاکستان د شخړو او امنیتي مطالعاتو د انسټیټیوټ له خوا د خپرو شویو معلوماتو له مخې، د مارچ په میاشت کې په دغه هېواد کې د وسله والو بریدونه زیات شوي.
په دغه معلوماتو کې راغلي چې، په خیبرپښتونخوا کې لږ تر لږه ۲۰۶ کسان وژل شوي، چې ۴۹یې امنیتي غړي دي.
په دغه پېښو کې ۳۴ ملکيان، او ۱۲۳ وسله وال هم وژل شوي او ترڅنګ یې ۱۱۵ نور کسان ټپیان شوي چې په ژوبل شویو کې ۶۳ امنیتي کسان دي ۴۹ نور ملکي وګړي دي.
یاده دې وي، چې پاکستان په ۲۰۲۵ کال کې د نړۍوال تروریزم په نولړ کې په دویم ځای کې دی، چې د تېر کال په پرتله په ترهګریزو بریدونو کې د وژل شویو شمېر ۴۵ سلنه زیات شوی.
د فاطمه بيبي په سترګو کې چې د کلونو راهیسې د وطن درد پټ و؛ د هغې د زوی یوې ساده خو زړه بوږنوونکې پوښتنې راڅرګند کړ، هغه دا چې «مورې ستا وطن خو افغانستان و، ايا زموږ وطن به هم هغه وي؟»
دغه پوښتنه نه يوازې د دغه ماشوم اندېښنه بیانوي؛ بلکې د هغو مېليونونو افغان کډوالو د راتلونکې په اړه يوه لویه پوښتنه ده، چې له څو لسيزو راهيسې یې په پاکستان کې پناه اخيستې ده.
فاطمه بيبي د هغو افغان کورنيو له ډلې ده، چې د جګړې او بېثباتۍ له امله د خپل هېواد پرېښودو ته اړ شوي وو.
هغوی که څه هم په پاکستان کې پناه واخیسته؛ خو د دغه هېواد تابعيت او دايمي استوګنه یې نه ده ترلاسه کړې.
فاطمه بيبي په ژړغوني غږ وويل:« زما د ماشومانو په ذهن کې د وطن تصویر يوازې هغه کيسه ده، چې ما ورته کړې ده. زما زوی افغانستان نه دی ليدلی؛ خو اوس غواړي پوه شي، چې د هغه وطن کوم دی؟»
دغه کډوال د پاکستان حکومت د جبري اېستنې تر اعلان وروسته بېرته خپل هېواد ته روان دي.
په تورخم کې په دغه ډله کې نارينهوو د خپلو ښځو او ماشومانو د خونديتوب لپاره هغوی په څادرونو پوښلي؛ تر څو د ګڼې ګوڼې څخه خوندي شي.
د فاطمه بيبي لور اقصی چې توره بورقه يې اغوستې وه، له خپلو درېیو خوېندو سره اندېښمنه ناسته وه.
اته کلنه شفا چې نوي کالي یې اغوستي وو او لاسونه یې په نکریزو سره وو؛ له خپلې کورنۍ سره افغانستان ته د تګ لپاره چمتو وه.
کله چې د افغانستان انټرنشنل خبریال جواد شینواري ترې وپوښتل، ته ولې افغانستان ته ځې؟ نو هغې یې په ځواب کې وویل:« موږ هلته چکر ته ځو، هلته ډېرې زانګوګانې دي او ډېر خوندور خوراکونه هم پيدا کېږي. مور مې وایي، چې پلار به موږ هلته څو ورځې وساتي او بيا به موږ ته چکر راکړي او بیا به بېرته راشو.»
د فاطمه بيبي لور اقصی د افغانستان انټرنشنل خبریال جواد شینواري ته وويل:« ما مې له خورلڼو سره يو ځای د سینګار کولو کورس نېولی و؛ ترڅو چې په کورنۍ کې کوم واده وي، نو زه به د ناوې يا مېلمنو سینګار وکړم. زما خور اشپزۍ ته لېواله وه، هغې هغه زده کړل. اوس چې موږ بېرته روان يو هغې راته وويل، چې د سینګار کولو سامان هم له ځان سره واخله کېدای شي هلته په کار راشي؛ خو زما ورور راته وويل، چې د طالبانو حکومت هلته سینګارتونونه تړلي دي.»
سيد نواز د ننګرهار ولایت اوسېدونکی دی او شاوخوا ٤٧ کاله کېږي، چې په پاکستان کې مېشت دی.
د افغانستان انټرنشنل خبریال له نوموړي پوښتنه وکړه، ستا سره چې کومې ښځې دي لږې اندېښمنې ښکاري ايا کومه ستونزه لري؟ نو هغه په موسکا سره ځواب ورکړ:« اندېښمن خو ټول يو؛ خو اصلي اندېښنه خو به له دغه سفر وروسته پيل شي. زما لوڼې وايي، چې حالات موږ چېرته راوستلو، نه مو هلته ژوند ليدلی نه د داسې ځای له ژوند سره عادت یو.»
هغه وایي، سفر خو لا اوس پيل شوی او دوی له وړاندې ورته وار خطا شوی؛ د دوی په مخکې خو ټول ژوند پروت دی، چې بايد په نوي هېواد کې یې له سره پيل کړي.
نوموړي د افغانستان انټرنشنل خبریال هغې پوښتنې ته چې تاسو نه غواړئ افغانستان ته لاړ شئ؟ وویل:« زما ټول ژوند په پاکستان کې تېر شوی، زما واده دلته شوی، ماشومان مې دلته زېږېدلی او دلته يې زدهکړې کړې دي. هغوی ته نه پښتو ورځي او نه فارسي؛ يوازې په اردو پوهېږي.»
