پر افغانستان د طالبانو له واکمنېدو راهیسې دغې ډلې په پراخه کچه د خپلې اېډیالوژۍ او تعریف شوي اسلامي تفسیر خپراوي ته پام کړی. دغې ډلې زندانونه، د نشهیي توکو د رغېدو مرکزونه او نورې دولتي ادارې کټ مټ پر مدرسو بدلې کړې دي او دا یې د رسمي پروګرامونو یوه برخه ګرځولې ده.
په وروستي مورد کې د هرات ولایت د روږدو کسانو د درملنې په یوه مرکز کې د شاوخوا ۱۰۰ کسانو د فراغت مراسمو انځورونه د طالبانو اړوند رسنیو کې خپاره شوي. دې کسانو د درملنې سربېره، د قران د تلاوت او تلفظ کورس هم بشپړ کړی. په مراسمو کې سپینې جامې، دودیزې خولۍ او د طالبانو بېرغونه لیدل کېدل.
اېنډیپنډنټ ورځپانې په یوې مقاله کې لیکلي، چې د دې کورسونو د زدهکړې په بهیر کې ناروغانو ته د قران د تدریس سربېره داسې سندرې هم اورېدل شوي چې د تېر جمهوري نظام او بهرنیو ځواکونو پر وړاندې د طالبانو د جګړې ستاینه کوي. کارپوهان وايي، چې دا سندرې د طالبانو د جګړې روایت هڅوي او افراطیت ته لاره هواروي.
په هرات کې د طالبانو سیمهییزو چارواکو ویلي، چې د دې پروګرامونو له لارې یې موخه د مذهبي عقایدو پیاوړتیا او د خلکو د روږدي کېدو د مخنیوي لپاره مرسته کول دي؛ خو اېنډیپنډنټ ورځپاڼې د کارپوهانو په حواله خبرداری ورکړی، چې طالبانو چمتو شوي روزنیر پروګرامونه او د نصاب ډول د اسلامي زدهکړو له اصلي لارښوونو سره توپیر لري او ښایي د ځوان نسل په منځ کې د افراطیت ته هواره کړي.
پر افغانستان د طالبانو له واکمنېدو راهیسې په ټول هېواد کې د جوماتونو او دیني مدرسو شمېر ډېر شوی دی. د دغۍ ډلې لوړپوړي غړي په منظم ډول د دیني کورسونو زدهکوونکو د فراغت په مراسمو کې ګډون کوي. دوی خلکو ته د خپلې اېډیالوژۍ لهمخې، د دیني زدهکړو بلنه ورکوي؛ خو دا هرڅه د نورو اسلامي هېوادونو د علماوو له نظرونو سره خورا توپیر لري.
څارونکي وايي، چې د دې ډول د مذهبي زدهکړو پراختیا د افغانستان د فکري او ټولنیز راتلونکي لپاره جدي اغېزې لرلای شي؛ ځکه چې طالبان هڅه کوي داسې ټولنه جوړه کړي، چې نه یوازې په سیاسي؛ بلکې په فکري او کلتوري توګه هم د دوی د نظرونو تابع وي.
