په افغانستان کې اروپايي ټولنه وايي، چې له افغان ایډ موسسې سره د اقلیم انعطاف او کلیوالي معیشت د پیاوړتیا لپاره ۷ میلیونه یورو مرسته کوي. دوی زیاتوي، چې د افغان ایډ موسسې په مشرۍ د اقلیم انعطاف هڅو ته وده ورکوي.
اروپايي ټولنې نن سې شنبه، د لیندۍ ۲۵مه ویلي چې اروپايي ټولنه د افغان ایډ او د هغې شریکانو، کنسرن ورلډ وایډ او ویلت هنګرهیلف ته ۷ میلیونه یورو ورکوي.
دوی همدراز وايي، چې دا نوی ملاتړ او ددې پروژې موخه دا ده چې ډاډ ترلاسه شي لرې پرتې افغان ټولنې د اقلیم له بدلون سره وسایل لري او خپل ژوند پیاوړی او اوږدمهاله انعطاف رامینځته کړي.
ددې لویې پروژې دوهم پړاو به په شپږو ولایتونو کې پلی شي او د کلیوالي ټولنو پر وړاندې ننګونو سره د مبارزې لپاره ډیزاین شوې دي.
په دې پروژه کې به افغان مېرمنو او معلولیت لرونکو خلکو پیاوړتیا ته هم پاملرنه وشي.
د یادې ټولنې په اعلامیه کې راغلي، چې اروپايي ټولنه له لسو کلونو راهیسې په افغانستان کې د معیشت او کلیوالي پراختیا لپاره اوږدمهاله ملاتړ کوي او افغان ایډ له ۱۹۸۳ کال راهیسې په افغانستان کې فعالیت لري.
