ملګري ملتونه: په ۲۰۲۵ کال کې له ۸۴۰ زرو ډېرو افغانانو پاکو اوبو ته لاسرسی موندلی
ملګرو ملتونو ویلي، چې په ۲۰۲۵کال کې له ۸۴۰زره او ۸۲۶ څخه ډېرو کسانو په افغانستان کې د څښاک پاکو اوبو ته لاسرسی پیدا کړی دی.
ملګرو ملتونو ویلي، چې په ۲۰۲۵کال کې له ۸۴۰زره او ۸۲۶ څخه ډېرو کسانو په افغانستان کې د څښاک پاکو اوبو ته لاسرسی پیدا کړی دی.
دغه سازمان د چهارشنبې په ورځ، د غویي په ۲مه، په یوه پیغام کې ویلي چې یاد شمېر کسان د ملګرو ملتونو د اړوندو ادارو په ملاتړ د صحي اوبو له اسانتیاوو برخمن شوي دي.
ملګري ملتونه ټینګار کوي، چې په افغانستان کې د پاکو څښاکي اوبو نشتوالی لا هم له جدي ستونزو څخه شمېرل کېږي.
د یونېسف د تېر کال د راپور له مخې، په افغانستان کې له هرو لسو کسانو څخه اته تنه ککړې اوبه څښي، چې دا چاره د روغتیايي ستونزو ګواښ زیاتوي.
په همدې حال کې، اغا خان خېریه بنسټ دوه ورځې مخکې اعلان کړی و چې د پنجشېر په رُخه ولسوالۍ کې یې د اوبو رسولو درې شبکې جوړې کړې دي، چې له لارې یې له ۷۰۰څخه ډېرې کورنۍ د پاکو اوبو له اسانتیاوو برخمنې شوې دي.
سره له دې پرمختګونو، د پاکو اوبو کمښت لا هم په افغانستان کې د میلیونونو خلکو لپاره یوه جدي ننګونه بلل کېږي.
