ناسا: د «کریو-۱۳» ماموریت به د سپټمبر په منځ کې نړیوال فضایي تمځای ته ولېږدول شي
د امریکا فضایي ادارې ناسا اعلان کړی، چې د سپېساېکس «کریو-۱۳» ماموریت به د سپټمبر له منځنۍ مودې وروسته نړیوال فضایي تمځای ته ولېږدول شي، څو د علمي څېړنو او ټکنالوژۍ ازموینو له لارې د انسانانو راتلونکي سفرونه سپوږمۍ او مریخ ته چمتو کړي.
ناسا ویلي چې د «کریو-۱۳» ماموریت به د سپېساېکس په مرسته ترسره شي او په کې به د درې بېلابېلو فضایي ادارو څلور ستورمزلي ګډون ولري.
د دې ماموریت مشري به د ناسا ستورمزله جسیکا واټکینز کوي او لوک ډېلني به د ماموریت د پيلوټ په توګه ورسره مل وي. همدارنګه د کاناډا د فضایي ادارې ستورمزلې جوشوا کټریک او د روسیې ستورمزلی سرګي تېتریاتنیکوف به د ماموریت د متخصصینو په توګه برخه واخلي.
د ناسا د معلوماتو له مخې، دا ماموریت د سوداګریزې عملې د پروګرام په چوکاټ کې نړیوال فضایي تمځای ته د سپېساېکس دیارلسم منظم بدلون (روټېشن) دی. ټاکل شوې وه چې دا ماموریت په نومبر کې ترسره شي، خو اوس د ماموریتونو د چټکتیا لپاره مخکې راوړل شوی دی.
ناسا وایي، د دې ماموریت اصلي موخه علمي څېړنې او د نوو ټکنالوژیو ازموینه ده، څو انسانان د سپوږمۍ او مریخ راتلونکو ماموریتونو ته چمتو کړي او د ځمکې پر ژوند هم ګټور اغېز ولري.
د راپور له مخې، دا د جسیکا واټکینز دویم فضایي سفر دی، چې تر دې وړاندې یې په ۲۰۲۲ کال کې ۱۷۰ ورځې په فضا کې تېرې کړې وې. خو د لوک ډېلني، جوشوا کټریک او سرګي تېتریاتنیکوف لپاره دا لومړنی فضایي ماموریت دی.
ناسا زیاتوي چې نړیوال فضایي تمځای له تېرو ۲۵ کلونو راهیسې د انسانانو د دوامدار حضور شاهد دی، چې د علمي پرمختګونو او هغو څېړنو لپاره زمینه برابروي چې پر ځمکه ترسره کول یې ممکن نه دي.
