چينايي شرکت په ګوادر کې د خرو قصاب خانه تړلې
د پاکستان د بلوچستان ایالت په ګوادر ولسوالۍ کې یوه چینايي شرکت د خرو قصاب خانه تړلې او وایي چې د تګلارو خنډونه، اداري بېباوري او دوامدارې کاري ستونزې یې د فعالیت د درولو اصلي لاملونه دي.
د شرکت په رسمي خبرپاڼه کې راغلي چې اوسني خنډونه یوازې تخنیکي نه دي، بلکې «د ادارې بېباوري او د سیستم دننه ستونزو» له امله کاروبار پر مخ وړل ستونزمن شوي دي.
یاد شرکت په ګوادر کې د خرو د قصابخانې فابریکه چلوله، چې په کې سلګونو کارګرانو کار کاوه. د فابریکې له تړل کېدو سره د دغو کارګرانو د دندو برخلیک هم له نامعلوم وضعیت سره مخ شوی دی.
شرکت ټینګار کړی چې د مقرراتو او د خوړو د خوندیتوب اصولو ته ژمن دی، خو اوسنی کاري چاپېریال د دوام وړ نه دی.
ګوادر د پاکستان او چین ترمنځ د اقتصادي دهلېز (CPEC) مهمه برخه بلل کېږي، چې چین هڅه کوي له همدې لارې خپلې سوداګریزې او ترانزیټي پروژې پراخې کړي.
