په ملګرو ملتونو کې د ایران استازی وايي، طالبان مسوولیت لري چې د ګاونډیو هېوادونو پر ضد د ترهګریزو بریدونو د پلانولو او ترسره کولو لپاره د افغان خاورې د کارېدو مخه ونیسي. نوموړي زیاته کړه، چې د ثبات د ټینګښت لپاره له طالبانو سره د نړیوالې ټولنې د تعامل دوام اړین دی.
په ملګرو ملتونو کې د افغانستان د استازولۍ سرپرست نصیر احمد فایق د دغه سازمان له امنیت شورا غوښتي چې د ملګرو ملتونو په منځګړیتوب د افغانانو په مشرۍ او مالکیت یو «رښتینی بینالافغاني سیاسي بهیر» پیل کړي.
د فرانسې استازي د ملګرو ملتونو د امنیت شورا په غونډه کې ویلي، چې نړیوالې ټولنې طالبانو ته د دوحې په خبرو کې د ګډون فرصت ورکړی او غوښتنو ته یې غوږ نیولی، خو اوس د طالبانو وار دی چې د نړیوالې ټولنې غوښتنې ومني او نړیوالې ټولنې ته د بېرته ستنېدو په مخ کې پراته خنډونه لرې کړي.
د ملګرو ملتونو په امنیت شورا کې د بحرین استازې ویلي، چې په نړیواله ټولنه کې د افغانستان د بیا ادغام لپاره باید طالبان د نړیوالې ټولنې مشروع اندېښنو ته ځواب ووايي او د افغانستان د نړیوالو ژمنو په پلیتابه کې څرګند پرمختګ وښيي.
د طالبانو د دفاع وزارت وايي، چې محمد یعقوب مجاهد د ترکیې د ملي استخباراتو ادارې له مشر ابراهیم کالن او ورسره مل پلاوي سره په کابل کې لیدلي دي.
د ملګرو ملتونو د امنیت شورا په ناسته کې د برېتانیا استازې ویلي چې لندن پر افغان ښځو د طالبانو محدودیتونه او سیستماتیک تبعیض په کلکه غندي. نوموړې له طالبانو غوښتي چې د نړیوالو قوانینو لهمخې دې د ښځو په ګډون د ټولو افغانانو حقونو او ازادیو ته درناوی وکړي.
په ملګرو ملتونو کې د ډنمارک استازي ویلي،چې په افغانستان کې د وسله والو ډلو حضور او فعالیت لا هم د افغانستان، ګاونډیو هېوادونو او د نړیوالې سولې او امنیت لپاره جدي ګواښ دی. هغه له طالبانو غوښتي د ټولو ترهګرو ډلو پر وړاندې عملي اقدامات وکړي.
په ملګرو ملتونو کې د امریکا استازي ویلي، چې طالبان ترهګرو ډلو ته پناه ورکوي او په افغانستان کې روان وضعیت له دغه هېواد څخه بهر هم اغېزې لري. هغه د ملګرو ملتونو له امنیت شورا وغوښتل چې له طالبانو د «خبرو نه، بلکې د اقداماتو» غوښتنه وکړي.
په ملګرو ملتونو کې د پاکستان استازي ادعا کړې، چې تحریک طالبان پاکستان، د بلوچستان د ازادۍ پوځ او نورې وسله والې ډلې په افغانستان کې په «خوندي ډول» فعالیت کوي. نوموړي ویلي، چې د دغو ډلو حضور او له هغوی سره د طالبانو اړیکې د پاکستان او د سیمې د نورو هېوادونو لپاره ګواښ دی.
د ملګرو ملتونو په امنیت شورا کې د روسیې استازي ویلي، چې مسکو غواړي له طالبانو سره په ټولو برخو، په ځانګړې توګه د امنیت په برخه کې، خپلې همکارۍ پراخې کړي. نوموړي ویلي، چې وسله والې ترهګرې ډلې لا هم په افغانستان کې شته.
د ملګرو ملتونو د امنیت شورا په غونډه کې د چین استازي وویل چې پر ښځو د طالبانو محدودیتونه د افغانستان ټولنیز او اقتصادي پرمختګ ته زیان رسوي او له طالبانو یې وغوښتل چې د ښځو په ګډون د ټولو وګړو بنسټیز حقوق رعایت کړي.
د طالبانو د کورنیو چارو وزیر سراجالدین حقاني په کابل کې د ترکیې د ملي استخباراتو ادارې له رییس ابراهیم کالن او مل پلاوي سره لیدلي دي. د طالبانو د کورنیو چارو وزارت وايي، په لیدنه کې دواړو لوریو پر امنیتي او یو شمېر سیمهییزو مسایلو بحث کړی.
د ښځو د حقونو فعاله او د کانونو پخوانۍ وزیره نرګس نهان وايي، د افغانستان اوسنی وضعیت جدي بشري او د بشري حقونو کړکېچ دی. نوموړې وايي، د دې وضعیت د حل لپاره د افغانانو په مشرۍ داسې سیاسي بهیر ته اړتیا ده چې ښځې هم پکې ګډون ولري او د هېواد د راتلونکي په اړه خپل نظر وړاندې کړي.
په افغانستان کې د ملګرو ملتونو د مرستندویه ماموریت (یوناما) سرپرستې جورجېټ ګانیون د افغانستان په اړه د امنیت شورا په ناسته کې ویلي، چې په افغانستان کې نسبي امنیت شته، خو د طالبانو تګلارو د ټولنې بېلابېلې برخې څنډې ته کړې او اقتصادي وضعیت هم نازک دی.
د پاکستان د کورنیو چارو وزارت ادعا کړې چې د افغان طالبانو اداره نه یوازې په پاکستان، بلکې په ټوله سیمه کې وسله والو ته خوندي پټنځایونه برابروي او د وسله والو فعاليتونو او جرمونو ترمنځ اړیکې پیاوړې کوي.
د اوکراین د بې پیلوټه سیستمونو قوماندان وايي، ځواکونو یې د روسیې تورن جنرال انتون ګرونیس د سپټمبر په ۱۲مه د روسيې تر کنټرول لاندې دونېڅک سیمه کې وژلی دی. ګرونیس څه باندې دوه اونۍ وړاندې د «روسیې د اتل» جایزه ترلاسه کړې وه.
د طالبانو د کانونو او پټرولیم وزارت ویلي چې د ارشاد او دعوت ریاست د یاد وزارت له ټولو کارکوونکو څخه د دیني زده کړو ازموینه اخیستې ده. په دې ازموینه کې د سیرت النبي، د اهل سنت او جماعت د عقایدو په اړه پوښتنې شوې دي.
په کابل کې د ترکیې د تحصیلي ویزو یو شمېر افغان غوښتونکي وایي، په وروستیو ورځو کې د «سلګونو» کسانو د ویزې غوښتنلیکونه رد شوي او ډېرو ته د رد مشخص دلیل نه دی ورکړل شوی. دوی د «سیفا ویزې» مرکز پر کاري بهیر نیوکه کوي او ادعا کوي چې ځینې غوښتنلیکونه سفارت ته له رسېدو مخکې رد کېږي.
د ننګرهار د طالبانو د رسنیو دفتر وايي، د دغه ولایت په سره رود ولسوالۍ کې د اوبو یوه ډنډ ته پنځه ماشومان لوېدلي، دوه یې مړه شوي او درې نور ژغورل شوي دي.
د پاکستان د جمعیت علمای اسلام ګوند مشر مولانا فضل الرحمان پر مکه د یمني وسله والوبرید پر ټولې اسلامي نړۍ برید ګڼلی او له پاکستان څخه یې غوښتي، چې د حرمین شریفین د ساتنې په اړه دې خپله روښانه تګلاره ژر اعلان کړي.
ځايي سرچینې وايي، د بدخشان په مرکز فیض اباد کې د یوه ساعت په واټن دوه چاودنې شوې دي. لومړۍ د طالبانو یوې دیني مدرسې ته څېرمه او دویمه د یفتل بالا په چاهوشدره کې د یوې مدرسې دننه په یوه جنراتور کې د ځای پر ځای شوي ماین له امله شوې.