د پاکستان د څېړنې فدرالي ادارې خبر ورکړی، چې د یو لړ عملیاتو پرمهال یې په بلوچستان کې د ښځو او ماشومانو په ګډون ۳۴ افغانان نیولي دي. د یادې ادارې په وینا؛ دغه افغان وګړو غوښتل چې د ګوادر سمندر له لارې ایران ته په ناقانونه ډول واوړي.
په روسیه کې د پاکستان سفیر فیصل نیاز ترمذي ویلي، چې د اسلاماباد او طالبانو ترمنځ کړکېچونه د پام وړ کم شوي او اړیکې اوس «باثباته» شوي دي. د هغه په وینا، پاکستان هېڅکله نه غوښتل د افغانستان پر وړاندې پوځي ځواک وکاروي؛ خو د طالبانو کړنو اسلاماباد دې ته اړ کړ، چې بریدونه ترسره کړي.
د ماشومانو د ژغورنې سازمان وایي، چې (د وري له ۲۷مې) راهیسې د اسراییل او حزبالله ترمنځ تر اوربند وروسته هره ورځ په لبنان کې د اسراییل په بریدونو کې څلور ماشومان وژل شوي او یاهم ټپیان شوي دي. دغه سازمان ویلي، چې په یاده موده کې لږترلږه ۲۲ ماشومان وژل شوي او ۸۹ نور ټپیان شوي دي.
د اسیا لپاره د خبریالانو د خوندیتوب کمېټې څانګې په خپل خپور شوي راپور کې د طلوعنیوز د دوو خبریالانو پر نیونې د اندېښنې په څرګندولو ويلي، طالبانو په افغانستان کې رسنۍ سختې محدودې کړې او د یادې ډلې کړنو د رسنیو او خبریالانو پر وړاندې د وېرې او فشار فضا نوره هم پراخه کړې ده.
د افغانستان د پاراتکوانډو لوبغاړې ذکیه خدادادي د جرمني په مونیخ کې د ۲۰۲۶کال د اروپا په پاراتکوانډو سیالیو کې د خپلو ټولو سیالانو په ماتې سره د یادو سیالیو د سرو زرو مډال وګاټه او د اروپا اتله شوه.
د اروپایي ټولنې د شورا رييس الن برسټ د سېشنبې په ورځ وویل، چې د اروپایي هېوادونو وزیران به په روانه اونۍ کې په مولداوي کې درېیمو هېوادونو کې ځانګړو مرکزونو ته د «غیرقانوني» پناه غوښتونکو د لېږد په اړه، خبرې وکړي.
اروپایي کمېسیون د افغان کډوالو د بېرته ستنولو په تړاو د خبرو په موخه بروکسل ته د طالب چارواکو له بللو وروسته په خپل وضاحت کې ټینګار وکړ، چې دا چاره د طالبانو د په رسمیت پېژندلو په معنا نهده.
امریکايي رسنیو ویلي، د امریکا ولسمشر ډونالډ ټرمپ به د مې په ۱۳مه چین ته لاړ شي. راپورونه وایي، هغه به د دغه ۳ ورځني سفر پر مهال د چین او امریکا د اقتصادي او سوداګریزو اړیکو په تړاو له ولسمشر شي جین پینګ سره خبرې وکړي. ټرمپ ویلي، له خپل چینایي سیال سره د ایران پر جګړې هم بحث کوي.
د امريکا ولسمشر ډونالډ ټرمپ د ځينو امريکايي رسنيو پر راپورونو نيوکه کړي او په خپلې ټولنيزې شبکې تروث سوشل کې لیکلي: «کله چې جعلي خبرونه وايي ايراني دښمن زموږ پر ضد په پوځي برخه کې ښه عمل کوي، دا يو ډول مجازي خيانت دی، ځکه دا ډول څرګندونې دروغجنې او ان مسخره کوونکې دي».
په خيبرپښتونخوا کې د ناامنۍ پېښو ته په خپرونو کې د ځای نه ورکولو له امله پر پاکستانيو رسنیو نیوکې ډېرې شوې دي. یو شمېر پښتانه خبریالانو، سياستوالو او فعالانو ویلي، پاکستانۍ رسنۍ د نشهيي توکو پلورونکې تورنې ښځې ته ځای ورکوي، خو پښتونخوا کې د ناامنیو پېښو ته پوښښ نهورکوي.
د اروپا پارلمان کې د زرغون ګوند استازې هانا نیومن خبرداری ورکړی، چې له جرمني او نورو اروپايي هېوادونو څخه د افغان کډوالو د اېستلو تګلاره به د طالبانو د پیاوړتیا او د امنیتي ګواښونو د زیاتېدو لامل شي.
د ملي ډيموکراټیک غورځنګ مشر مُحسن دواړ ويلي، خيبرپښتونخوا د جګړې پر ډګر بدله کړل شوې ده. د نوموړي په وینا، حکومت او رسنۍ یې په تړاو چوپتیا غوره کړې ده. د هغه په باور، د اړوندو ادارو له لوري د غبرګون نشتوالی د دولت «رښتینې موخې» بربنډوي.
د طالبانو د کورنیو چارو وزارت ویلي، چې د جنايي جرمونو پر ضد د مبارزې پولیسو یې د تېرو ۲۴ ساعتونو پر مهال په شپږو ولایتونو کې ۲۲ کسان نیولي دي. یاد وزارت په یوې خبرپاڼه کې زیاته کړې، چې دغه کسان په بېلابېلو عملیاتو کې نیول شوي دی.
د پاکستان د لومړي وزیر سیاسي سلاکار رانا ثناالله د دغه هېواد په سنا کې ادعا کړې، چې له ۷ تر ۸ زرو «بېلارې» شوي کسان په افغانستان کې له ترهګریزې روزنې ترلاسه کولو وروسته په پاکستان کې بریدونه کوي. هغه همداراز ادعا کړې، په افغانستان کې دغه چاره د هند او اسراییل په ملاتړ کېږي.
د افغانستان کرېکټ بورډ ویلي، چې د کابل نړیوال کرېکټ کمپلکس د رغونې چارې نن (سېشنبه) د کابل ښار د ۱۶مې ناحیې په الوخېل سیمه کې په رسمي ډول پیل شوې. د کرېکټ بورډ د معلوماتو لهمخې، دغه کمپلکس پر ۸۶ جریبه ځمکه جوړېږي او په یوه وخت کې به د شاوخوا ۴۰ زره نندارچیانو د ځای ظرفیت ولري.
د خيبرپښتونخوا اعلی وزير سهيل اپريدي او د تحریک انصاف ګوند د بنسټګر عمران خان خويندو په سمدستي ډول روغتون ته د درملنې لپاره د عمران خان او د هغه د میرمنې د لېږدولو غوښتنه وکړه. اپریدي ګواښ وکړ، که تر یوې اونۍ روغتون ته ونهلېږدول شي، نو «بیا به له سخت چلند سره راشو».
د پاکستان د سند د کراچۍ ښار پولیسو د سېشنبې په ورځ وويل، هغه ښځه یې نیولې، چې د ښار له تر ټولو منظمه د نشهيي توکو شبکې مشري یې کوله. دغه تورنه ښځه «انمول» نوميږي، خو په «پنکي» مشهوره ده.
د پښتونخوا نشنل عوامي ګوند مشر او د پاکستان د پارلمان غړی خوشحال خان کاکړ له افغانستان انټرنشنل- پښتو سره په یوې مرکه کې ویلي، چې د ډیورند کرښې اړوند پرېکړه د حکومتونو نه، بلکې د افغان ولسونو کار دی. هغه زیاته کړې، چې پر افغانستان بریدونه د یاد هېواد پر ځمکنۍ بشپړتیا تېری دی.
د تېر نظام د بهرنیو چارو پخواني وزیر حنیف اتمر د جرمونو له نړیوالې محکمې او د بشري حقونو له نړیوالو بنسټونو وغوښتل، چې د هغه څه په اړه چې ده «په افغانستان کې د پاکستان د پوځ جنګي جنایتونه» بللي، سمدستي او خپلواکې څېړنې وکړي.
د پاکستان په سنا کې د اپوزيسيون او حکومتي استازو ترمنځ د خیبرپښتونخوا د امنیتي وضعیت پر سر جنجال رامنځته شو. دغه جنجال هغه مهال پیل شو، چې د اپوزيسيون غړي مولانا عطاالرحمان د پوښتنې په توګه مطرح کړه، چې ایا خيبرپښتونخوا «ترهګرو ته سپارل شوی»؟
د سپاه پاسداران اړوند فارس خبري اژانس د یوې باخبره سرچینې له قوله راپور ورکړی، چې د ایران اسلامي جمهوریت به له امریکا سره د مذاکراتو دویم پړاو ته د «پنځو باور جوړونکو شرطونو» له پوره کېدو پرته داخل نهشي.