د ملګرو ملتونو د ماشومانو ملاتړ صندوق (یونېسف) د خپل ۲۰۲۵کال په راپور کې ویلي، چې له ۲۰ مېلیونه زیاتو خلکو او ۵.۶ مېلیونه ماشومانو د یونېسف د ملاتړو روغتيايي مرکزونو له لارې لومړني روغتيايي خدمتونه ترلاسه کړي دي.
د طالبانو د کورنیو چارو وزارت ویلي، د دوی د عامه امن پولیسو ریاست ځواکونو کابل ښار ته د ۴۱۸بېاسناده موټرو د ننوتلو مخه نیولې ده. د یاد ریاست په وینا؛ دغه موټر د پولیسو د لومړي او دویم کنډک له لوري د ارغندي او سنګنوشته په دروازو کې درول شوي او بېرته خپلو اصلي سیمو ته لېږل شوي.
د کوټې په قادرياباد سیمه کې د افغان کډوالو له پرېښېدو وروسته دغه پنډغالی اوس په کنډواله اوښتی او دامهال لږ شمېر کورنۍ پهکې مېشتې دي. له دغه پنډغالي تر ۶زره ډېرې کورنۍ وتلې او افغانستان ته ستنې شوې دي. ځایي اوسېدونکي وايي، ژوند تر پخوا ناکراره شوی دی.
د افغانستان پخواني ولسمشر حامد کرزي د «ګندهارا تمدن او ځینو کلتوري میراثونو» په اړه د پاکستان د ولسمشر وروستیو څرګندونو په غبرګون کې ویلي، چې دغه میراثونه د افغانستان له تاریخ او کلتور سره تړاو لري.
په ننګرهار کې د طالبانو د عامې روغتیا ریاست خبر ورکړی، چې د دغه ریاست د څار ډلو د څارنې په پایله کې درې د اېکسرې مرکزونه، یو لابراتوار او یو کتنځی د قوانینو د نه مراعت له امله تړل شوي دي.
د طالبانو د صنعت او سوداګرۍ وزیر نورالدین عزیزي په ازبکستان کې د انوپرم مرکزي اسیا نړۍوال صنعتي نندارتون په څنډه کې له خپل ازبک سیال او د قرغزستان د سوداګرۍ وزارت له مرستیال سره په یادو هېوادونو کې د افغان صادراتي توکو لپاره د اسانتیاوو پر برابرولو خبرې کړې دي.
د سره صلیب نړۍوالې کمیټې خبر ورکړی، د نورستان ولایت یوشمېر لرو پرتو سیمو ته چې د طالبانو او پاکستاني ځواکونو ترمنځ د جګړو له امله تر دې وړاندې ورته لاسرسی محدود و؛ د بېړنیو مرستو رسولو لړۍ پیل شوې ده.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېرې وري میاشت کې د افغانستان په بېلابېلو ولایتونو کې ۵۸ کوډګر نیولي دي. د یاد وزارت په خبرپاڼه کې راغلي، چې نیول شوي کوډګر عدلي او قضایي ارګانونو ته ور پېژندل شوي دي.
د ازادۍ جبهې په نوم د طالبانو وسلهوالې مخالفې ډلې د یوې خبرپاڼې په خپرولو ادعا کړې، چې په لوګر کې یې په یوه هدفي برید کې ۲ طالبان وژلي او دوه نور یې ټپيان کړي دي. خبرپاڼه زیاتوي، برید یې د پل علم په ښار کې د طالبانو پر یوې امنیتي پوستې کړی.
د بېځایه شویو نړۍوال سازمان له پاکستان نه د افغان کډوالو د جبري اېستلو د دوام په اړه ژوره اندېښنه ښودلې او له اسلاماباد یې غوښتي، چې دغه بهیر سملاسي ودروي. یاد سازمان د یوې خبرپاڼې په خپرولو سره ویلي، چې د افغان کډوالو د اېستلو لړۍ په چټکۍ روانه ده.
په بادغیس کې د طالبانو د امنیې قوماندانۍ ویاند صدیق الله صدیقي ویلي، چې په دغه ولایت کې یې د «شنې قطعې» ځواکونو نن سهار د یو لړ عملیاتو پرمهال د سنګ اتش ولسوالۍ په ځنګلي سيمه کې درې کسان د ځنګلي ونو د پرې کولو په تور نیولي دي.
په خیبر پښتونخوا کې ځایي پولیسو خبر ورکړی، چې د دغه ایالت په لکي مروت ولسوالۍ کې بېګوخېل سیمې ته نږدې د ناپېژاندو وسلهوالو په ډزو کې دوه کسه وژل شوي دي. پولیسو ویلي، چې دغه دوه کسان صفيالله او افنان نومېدل او د بېګوخېل سیمې اوسېدونکي وو.
د طالبانو د کډوالو او بېرته راستنېدونکو چارو وزارت خبر ورکړی، چې په تېرې وري میاشت کې ۱۱۱زره او ۳۲۴ کډوال له پاکستان، ایران او ترکیې په خپله خوښه او جبري توګه افغانستان ته ستانه کړای شوي دي.
د افغانستان پخواني ولسمشر حامد کرزی ویلي، خلک نه غواړي د طالبانو پر ضد د مقاومت له لارې افغانستان یو ځل بیا جګړې ته ولاړ شي. هغه د جرمني له «شپېګل» مجلې سره په مرکه کې ویلي، چې افغانان له څه باندې څلوېښتو کلونو جګړو ستړي شوي دي.
د شریفالله په نوم د هغه تورن کس محاکمه چې ویل کېږي د ۱۴۰۰کال په وږي میاشت کې د کابل هوايي ډګر په خونړي برید کې یې له داعش سره مرسته کړې، د دوشنبې په ورځ د امریکا په ویرجېنیا ایالت کې پیل شوه. د هغه مدافع وکیل وایي، چې امریکا «ناسم کس» نیولی دی.
د امریکا د فدرالي څېړنې ادارې مشر کېش پټېل د یوه راپور د خپرېدو له امله پر امریکايي مجلې «اتلانټیک» دعوه کړې او د ۲۵۰ مېلیون ډالرو تاوان غوښتنه یې کړې ده. هغه د راپور معلومات ناسم بللي او دغه رسنۍ یې د بدنامۍ په خپرولو تورنه کړې ده.
اسلاماباد کې یو ځل بیا د امریکا او ایران ترمنځ د اوربند د غځولو او د شته شخړو د سولهییز حل لپاره خبرې اترې پیلېدونکی وې، چې د هرمز تنګي په شاوخوا سیمه کې د امریکا او ایران د وسلهوالو قوتونو ترمنځ د تاوتریخوالي له امله تراوسه نهدي پیل شوې.
د طالبانو د لوړو زدهکړو وزیر ندا محمد ندیم په خوست کې د شیخ زاید پوهنتون له محصلینو سره په لیدنه کې خبرداری ورکړی، چې له سیاسي او ګوندي فعالیتونو څخه ډډه وکړي، او ټینګار یې کړی چې د طالبانو د نظام ملاتړ «الزامي» دی.
اروپايي ټولنې تایید کړې، چې د طالبانو له ادارې سره یې د تخنیکي کچې خبرې پیل کړې دي، څو هغه افغان کډوال بېرته خپل هېواد ته واستول شي چې په اروپا کې د پاتې کېدو قانوني حق نه لري. دا په داسې حال کې ده چې د اروپايي ټولنې یو شمېر غړي هېوادونه د دې بهیر د چټکولو غوښتنه کوي.
په جنیوا کې د افغانستان دایمي استازی نصیر احمد اندېشه وایي، چې افغانستان د یو «زوال موندونکي سیاسي نظم» په پای کې ولاړ دی او ټینګار کوي چې د طالبانو واکمني نه ملي حکومت دی او نه هم اسلامي خلافت، بلکې د هغه په وینا د تېر شوي روایت وروستی تاوتریخجن انځور دی.
یوې باخبره سرچینې ویلي، چې د امریکا مرستیال ولسمشر جي ډي وینس لا تر اوسه پاکستان ته له ایران سره د احتمالي دویم پړاو خبرو لپاره نه دی تللی، په داسې حال کې چې د دغو خبرو د ترسره کېدو راتلونکی پړاو لا هم ناڅرګند پاتې دی او ډیپلوماټیکې هڅې روانې دي.