دطالبانو د اطلاعاتو او کلتور وزارت د ګرځندوی، مالي او اداري چارو معین قدرتالله جمال په کابل کې د کویټ السایر شرکتونو له رییس محمد ناصر محمد السایر سره لیدلي دی. طاللبانو ویلي، چې د کویټ پانګهوال په افغانستان کې د ګرځندوی په برخه کې پانګونې ته لېوالتیا ښودلې ده.
د ملګرو ملتونو د بشري چارو د همغږۍ دفتر (اوچا) وايي، په افغانستان کې د سرپناه، ځمکې او مېشت ځایونو د همغږۍ بشري غبرګون له جدي مالي کمښت سره مخ دی. اوچا وايي، د ۲۰۲۶کال لپاره د دغه اړتیاوو پوره کولو په موخه ۱۶۰ مېلیون ډالرو ته اړتیا ده؛ خو تراوسه یوازې ۴.۷سلنه بودجه برابره شوې ده.
د طالبانو د چارو ادارې یو مکتوب افغانستان انټرنشنل ته رسېدلی، چې د عامې روغتیا وزارت ته لارښوونه شوې، چې د یادې ډلې د وزارتونو او امارتي ادارو د لرې کړل شویو کارکوونکو شکایتونو ته دې رسېدنه نه کېږي. د سند لهمخې، دا پرېکړه د طالبانو د وزیرانو شورا ناسته کې په شفاهي ډول شوې ده.
د طالبانو د عامې روغتیا وزارت ویلي چې په تېره یوه میاشت کې یې د کابل ښار په بېلابېلو ناحیو کې له ۷۲۱ درملتونونو څارنه کړې او د بېلابېلو سرغړونو له امله یې د ۸۰ درملتونونو د تړلو تر څنګ یې ۷۰۸ ډوله نېټه تیر او قاچاقي درمل هم راټول کړي دي.
سرچینو افغانستان انټرنشنل ته ویلي، چې د طالبانو د ۲۱۵ عزم قول اردو رییس ارکان ملا بسمالله فرهادي د هلمند په ګرشک ولسوالۍ کې پر دولتي ځمکه د میلیونونو افغانیو په ارزښت د تېلو پمپ او د موټرو اړوند تجارتي تاسیسات جوړ کړي دي.
د طالبانو د عامې روغتیا وزارت وایي، په ننګرهار کې د څارنې او پلټنې مسولینو یې د تېر یوه کال په لړ کې د یاد ولایت له بیلا بیلو سیمو د روغتیايي مرکزونو او خوراکي توکو پلورنځیو ۴۴ ټنه نېټه تېر او بې کیفیته درمل او خوراکي توکي راټول کړې او سوځولي دي.
د طالبانو دښاري اوبو رسولو او فاضلابو دولتي شرکت وايي، د پلازمېنې کابل په ګډون ځینې نور ولایتونه د اوبو د سخت کمښت له سخت ګواښ سره مخ دي. په ورته مهال طالبانو ویلي چې یوې ځانګړي کمېټي د اوبو د کمښت ستونزې مخنیوي او حل لارې لپاره طرحه جوړه کړې او هبت الله هم تایید کړې ده.
د ازادۍ جبهې ادعا کړې، چې د بدخشان ولایت د زیباک ولسوالۍ اړوند یې له طالبانو سره په تازه نښته کې لس طالبان وژلي او شپږ نور ټپیان دي. یادې جبهې ویلي، دغه نښته چې د سېشنبې په ورځ (د وږي ۳مه) د دوی د ځواکونو او طالبانو ترمنځ پیل شوې وه د شپې تر ناوخته یې دوام وکړ.
سرچینو افغانستان انټرنشنل ته ویلي، ښوونکی او پر طالبانو نیوکه کوونکی نویدالله فطرت د چهارشنبې په ورځ په هرات کې د طالبانو لهخوا نیول شوی دی. نوموړي په دې وروستیو کې د طالبانو پر کړنو او سیاستونو نیوکې کړې وې.
په بامیان کې د طالبانو د امنیې قوماندانۍ ویاند محمداسماعیل ثاقب وایي، چې په تېرو شپږو میاشتو کې په دغه ولایت کې ۳۷ ترافیکي پېښې ثبت شوې دي. نوموړي ویلي، چې د همدې پېښو له امله ۵ کسان مړه او ۳۵ نور ټپیان شوي دي.
د خيبر پښتونخوا او مري ترمنځ د ګلياتو په لاره د یوه مساپر وړونکي بس اوښتو له امله لږ تر لږه پنځه کسان مړه او ۱۳ نور ټپیان شوي دي. د راپورونو له مخې، پېښه د مري او ګلياتو د وصل په سیمه «کوز باریان، ليران ټېن» کې شوې.
د امریکا د بهرنیو چارو وزیر مارکو روبیو ویلي، امریکا اوسمهال پر ایران د تازه بریدونو پلان نهلري. د هغه په وینا، امریکا دامهال د اقتصادي فشارونو پر زیاتوالي، د سمندري محاصرې د دوام او له هرمز تنګي نه د تېلو د لېږد پر زیاتوالي تمرکز کوي.
په بلخ کې د طالبانو د زندانونو چارو د سمون ادارې خبر ورکړی، چې د یادې ډلې د مشر ملاهبت الله اخوندزاده د فرمان له مخې یې د دغه ولایت له مرکزي زندانه ۱۲۶ بندیان خوشې کړي دي. په هرات کې هم طالبانو ویلي، چې له مرکزي زندانه د ۳۵ ښځو په ګډون ۲۸۶ بندیان خوشې شوي دي.
د پاکستان لومړي وزیر شهباز شریف ویلي، اسلاماباد غواړي له سعودي عربستان سره خپلې اقتصادي اړیکې د متقابلو ګټو پر بنسټ ستراتېژیک اقتصادي مشارکت ته لوړې کړي.
د ملګرو ملتونو د کډوالو عالي کمېشنرۍ په خپل تازه راپور کې ویلي، په افغانستان کې د وسلهوالو مخالفو ډلو فعالیت، په بدخشان او ځینو نورو سیمو کې نښتو د داخلي بېځایه کېدو اندېښنې زیاتې کړې دي.
د پيبياېس نیوز په راپور کې راغلي، د امریکا د بهرنیو مرستو د کمښت له امله افغانستان تر ټولو زیات اغېزمن شوی او د روغتیايي خدمتونو د کمښت له امله د افغان مېندو او ماشومانو وضعیت لا کړکېچن شوی دی. د راپور له مخې، د مرستو د کمښت له امله په افغانستان کې تر ۱۶۰ ډېر کسان مړه شوي دي.
د روغتیا نړۍوال سازمان د ګوزڼ ناروغۍ د بېړني وضعیت کمېټې په خپل تازه راپور کې ویلي، چې افغانستان لاهم د ګوزڼ ویروس د انتقال له اصلي مرکزونو شمېرل کېږي او کور په کور د واکسیناسیون نشتوالي د ګوزڼ د لهمنځه وړلو هڅې له جدي ننګونو سره مخ کړې دي.
د بلخ یو اوسېدونکي افغانستان انترنشنل ته په لېږلي پیغام کې ویلي، چې د حیرتان بندر په ګمرک کې بېنظمي او فساد زیات شوی او هېڅوک خپل غږ نهشي پورته کولی. نوموړي ویلي، د معیار او کیفیت په نوم جوړه شوې اداره هم «بېنظمه او بېکفایته» ده.
سرچینو افغانستان انټرنشنل پښتو ته خبر ورکړی، چې ناپېژاندو وسلهوالو د بلوچستان په کوټې ښار کې د شیخ زاید روغتون ته څېرمه د افغانستان دوه پخواني پوځیان په ډزو وژلي دي. ځایي پولیسو هم د پېښې پخلی کړی؛ خو د وژل شویو کسانو د هویت په اړه یې معلومات نهدي خپاره کړي.
د بشري مرستو نړۍوال سازمان «انټرسوس» په خپل تازه راپور کې ویلي، افغانستان لاهم د نړۍ تر ټولو سختو او اوږدمهاله بشري ناورینونو سره مخ دی. د یاد سازمان په وینا؛ دامهال په افغانستان کې ۲۱.۹ مېلیونه کسان د خپلو لومړنیو اړتیاوو پوره کولو لپاره بشري مرستو ته اړتیا لري.
د پاکستان د طبي علومو په انسټېټیوټ (پمز) روغتون کې د نسایي څانګې د ماشومانو په ځانګړې خونه کې د اورلګېدنې له امله لږترلږه ۱۵ نوي زېږېدلي ماشومان مړه شوي دي. د ژغورنې ادارې ویلي، د پېښې پرمهال د ماشومانو په ځانګړې خونه کې د ۱۶ تازه زېږېدلو ماشومانو له ډلې یوازې یو ماشوم ژغورل شوی.