د طالبانو د مشر ملا هبتالله د فرمان له مخې د فاریاب او کاپیسا ولایتونو له زندانونو ۱۲۸ بندیان خوشې شوي او د ۹۷ نورو د بند موده کمه شوې ده. فاریاب کې د طالبانو مرستیال والي نصرتالله فیضاني ویلي، د دغه ولایت له مرکزي زندانه ۹۳ بندیان خوشې شوي او د ۸۳ نورو د بند موده کمه شوې ده.
د غزني د مالستان او جاغوري ولسوالیو یوشمېر اوسېدونکو د طالبانو عامې روغتیا وزیر ته په یوه لیک کې د روغتیايي خدمتونو له ټیټ کیفیت او په دغه دوو ولسوالیو کې په روغتیايي مرکزونو کې د نامسلکي کسانو له ګومارنې شکایت کړی دی.
د کویت د تېلو صنعت د ایران او امریکا ترمنځ تر شپږ میاشتنۍ جګړې وروسته په لویه کچه فلج شوی او په صادراتو کې چټک کمښت دغه هېواد په ۱۹۹۰کال کې د عراق تر برید وروسته له ترټولو لوی اقتصادي ناورین سره مخ کړی دی.
د افغانستان د بیارغونې لپاره د امریکا پخوانی ځانګړی مفتش جان ساپکو وايي، د طالبانو تر واک لاندې د افغان ښځو ژوند په «دوزخ» بدل شوی دی. هغه د ټرمپ پر ادارې نیوکه وکړه، چې د وضعیت د بدلولو لپاره یې هیڅ اغېزمن اقدام نهدی کړی.
د پېښور عالي محکمې د یوه افغان سوداګر او د هغه د کورنۍ د ویزو غځولو په اړه د ثبت شوې دعوې لیکلې پرېکړه خپره کړې ده. محکمې اړوندو چارواکو ته امر کړی، چې د ویزو غځولو اړوند غوښتنې په اړه دې په ۱۵ ورځو کې د قانون له مخې پرېکړه وکړي.
د ملګرو ملتونو پراختیايي پروګرام (UNDP) د افغانستان د ټولنیز او اقتصادي وضعیت په اړه په یوه راپور کې ویلي، چې ۷۴ سلنه افغانان لاهم د خپلو بنسټیزو اړتیاوو برابرولو له ناامنۍ سره مخ دي. د ملګرو ملتونو پراختیايي پروګرام په وینا، دغه کچه نږدې ۲۸ مېلیونه کسان رانغاړي.
د کوټې ښار شمال پلو د کچلاغ په کوڅو کې د هبتالله اخوندزاده د تېر ژوند تر ټولو روښانه نښه له محرابه د هغه اورېدل شوی غږ دی. خو کلونه وروسته، همدا غږ د هغه د هویت په یوې سترې پوښتنې بدل شوی دی.
د اوکراین د بهرنیو چارو وزارت د پنجشنبې په ورځ (د زمري ۲۲مه) وویل، د روسیې له لوري هغه پارلماني ټاکنې چې ټاکل شوې راتلونکې میاشت د اوکراین په «اشغال» شویو سیمو کې ترسره شي، هېڅ قانوني اعتبار نهلري، ځکه چې د کیېف په باور دغه ټاکنې ناقانونه دي.
د طالبانو د واکمنۍ له بیا پیلېدو پنځه کاله وروسته، هغه ژمنې چې دغې ډلې کابل ته له ننوتلو مخکې د ښځو د کار او زدهکړو، عمومي عفوې، د رسنیو د ازادۍ او ټولشموله حکومت په اړه کړې وې، لا هم تر ډېره عملي شوې نهدي.
رویټرز خبري اژانس راپور ورکړی، چې په کولمبیا کې د زورورې زلزلې له رامنځته کېدو څو ورځې وروسته، د هغو کسانو د ژوندي موندلو هیلې لا کمزورې شوي چې تر اوسه ورک دي. د ژغورنې ډلو د پنجشنبې په ورځ اعلان وکړ، چې لا هم ۱۰۰ کسان لادرکه دي او د موندلو هیلې یې کمې شوې دي.
د طالبانو له پېښو سره د مبارزې چمتووالي ادارې د راتلونکې یوې اونۍ لپاره د افغانستان د هوايي او طبیعي خطرونو په اړه د وړاندوینې په خپرولو سره ویلي، چې د کونړ او نورستان په ختیځو برخو کې د ناڅاپي سېلابونو د راوتلو احتمالي خطر شته.
د پاکستان د جمعیت علمای اسلام مشر فضلالرحمان وايي،پاکستان د جوړېدو له هغو درېیو اساسي موخو د شریعت، اقتصاد او ولسواکۍ له ډلې په هېڅ یوه کې یې هم بریالی نهدی. د بلوچ یووالي کمېټې مشرې ماهرنګ بلوچ بیا بلوچستان کې پر روانو عملیاتو په نیوکو سره د پاکستان دولت پر «نسلوژنې» تورن کړی
د طالبانو د بهرنیو چارو وزیر امیرخان متقي وايي، له مخالفینو سره د خبرو لپاره د نوې پروسې پیلولو ته اړتیا نهشته او هغوی کولای شي افغانستان ته ستانه شي. نوموړي دا څرګندونې په داسې حال کې کړي، چې په بدخشان کې له ناراضي طالبانو او وسلهوالو مخالفینو سره په وقفهيي ډول نښتې روانې دي.
باوري سرچینې وايي، د بدخشان په نسي ولسوالۍ کې د طالبانو او د ناراضه طالب قومندان جمعهخان فاتح د پلویانو ترمنځ روانه جګړه درې ورځې وړاندې د طالبانو د استخباراتو د مرستیال تاجمیر جواد په امر پیل شوې ده.
ځوان کیسه لیکوال نصرت ارمان په کابل کې د کتاب رسونې د کاروبار د پیل لپاره د خپلې مېرمنې سرهزر پلورلي دي. هغه وایي، خلک ورته د کتابونو نومونه ورکوي او دی یې بیا له کورونو سربېره د هغوی کار ځایونو ته رسوي.
د سولې نوبل جایزې ګټونکې ملاله یوسفزۍ وايي، د ښځو او ماشومانو له حقونو دفاع جرم نهدی او له طالبانو یې غوښتي، چې د کابل د «ښځو او ماشومانو د حقوقي څېړنو بنسټ» شپږ نیول شوي کارکوونکي دې سمدستي او بېقیدوشرطه خوشې کړي.
د پاکستان او ناروې د بهرنیو چارو وزیرانو د ترهګرۍ له ټولو بڼو سره پر مبارزې ټینګار کړی او افغانستان کې یې د ترهګرو ډلو د موجودیت په اړه اندېښنه څرګنده کړې ده. طالبانو په دې تړاو لا تراوسه څه غبرګون نهدی ښودلی، خو تر دې مخکې یې ویلي، چې افغان خاوره د بل هېواد پر ضد نه کارول کېږي.
ملګرو ملتونو په افغانستان کې د نجونو د زدهکړو پر دوامدار بندیز یو ځل بیا اندېښنه ښودلې او ویلي یې دي، چې له زدهکړو د افغان نجونو محرومول د افغانستان د اوسني وضعیت «تر ټولو سخته برخه» ده.
د افغان ښځو څو اعتراضي خوځښتونو د اګست ۱۵مه «د مقاومت او مبارزې ورځ» بللې او له نړیوالې ټولنې یې غوښتي، چې د طالبانو له لوري د ښځو د حقونو محدودول دې د «جنسیتي اپارتاید» په توګه په رسمیت وپېژني او د پای ته رسولو لپاره یې عملي او بېړني اقدامات وکړي.
تحریک طالبان پاکستان (ټيټيپي) وایي، د دې ډلې مشر مفتي نور ولي محسود د خیبر پښتونخوا په کُرمه کې د پاکستان پر ضد د یو لړ وسلهوالو عملیاتو مشري کړې ده. دا په داسې حال کې ده، چې تر دې مخکې پاکستاني چارواکو تل ادعا کړې، چې د یادې ډلې مشر او غړي یې په افغانستان کې دي.
په ملګرو ملتونو کې د افغانستان پخواني دایمي استازي محمود صیقل وايي، په بدخشان کې وروستیو تحولاتو ښودلې چې طالبان «له دننه د ړنګېدو» له بهیر سره مخ دي او د دوی جنګي ماشین زیانمنېدونکی شوی دی.