آرشیف

د طالبانو د کورنیو چارو وزارت وايي چې د نشه‌يي توکو سره د مبارزې ځواکونو یې په ۷ ولایتونو کې نږدې سل تنه روږدي کسان راټول کړي او د درملنې لپاره یې روغتونونو ته لېږدولي دي.

د ملګرو ملتونو د ښځو ادارې (UN Women)وايي، له تېرو ۳میاشتو راهیسې د طالبانو له لوري د دوی د سازمان اړوند ښځینه کارکوونکې خپلو دفترونو ته نه دې پرېښودل شوي. وایي، دا بندیزونه د ژغورونکو مرستو د فلج کېدو خطر زیاتوي او هغو ښځو او نجونو ته چې تر ټولو ډېره اړتیا لري مرستې نه‌شي رسېدی.

د تېر جمهوري نظام پر مهال د چارو ادارې مشر فضل محمود فضلي وایي، د پاکستان پوځ له بریدونو سره د ځینو افغان سیاستوالو ملاتړ او د طالبانو له‌‌خوا د ملت‌پالنې دعوې، دواړه «فریب‌کارانه روایتونه» دي. هغه وایي، د افغانستان د ستونزو ریښتینی حل یوازې د ولس ارادې کې دی، نه د پردیو په ټوپک.

په پاکستان کې د روسیې سفیر البرت خورف او د طالبانو سفیر احمد شکیب په اسلام‌اباد کې یو له بل سره لیدلي دي. البرت خورف د شنبې په ورځ د لیندۍ په ۱۵مه په اېکس کې ویلي چې په دغه لیدنه کې د امنیتي چارو او په سیمه کې د سولې او ټیکاو د پیاوړتیا پر اړینو ګامونو ځانګړی بحث شوی دی.

د طالبانو حکومت د کډوالو ستونزو ته د رسېدنې عالي کمېسیون ویلي چې تېره ورځ د هېواد له بېلابېلو لارو ۳۱۳۴ افغان کډوال لارو له پاکستان او ایران نه په جبري افغانستان ور ستانه کړای شوي دي. کمېسیون ویلي، دغه کډوالو سره مالي او خدماتي مرستې شوي او خپلو ولایتونو ته لېږدول شوي دي.

د ډیورنډ پر کرښه د دروازو تړل کېدو په دوام د ايران د خراسان رضوي ولايت والي غلام‌حسين مظفري ويلي چې له ايران څخه افغانستان ته د توکو صادرات بايد دوه برابره شي. نوموړی وايي، د ايران او افغانستان تر منځ د سوداګرۍ د پياوړتيا لپاره هغه په روانه مياشت کې هرات او کابل ته سفر هم کړی.

په تاجکستان کې د افغانستان د مخکېني جمهوریت فعال سفارت پر طالبانو د اسټرالیا له تازه لګول شویو بندیزونو نه هرکلی کړی دی. یاد سفارت له نورو هېوادونو هم غوښتي چې پر کابل واکمنو باندې ورته اقدامات عملي کړي، څو د افغانانو د بشري حقونو سرغړونې پای ته ورسېږي.

یوناما وایي، د ملګرو ملتونو امنیت شورا راتلونکې چهارشنبه د ډسمبر په ۱۰مه نېټه د افغانستان د روان وضعیت او بشري ستونزو د ارزونې لپاره ځانګړې غونډه ترسره کوي، څو د نړۍوالې ټولنې د همغږۍ او احتمالي اقداماتو لارې چارې وڅېړي.

د طالبانو تر واک لاندې د افغاني سرې میاشتې ټولنې رییس شهاب الدین دلاور د ارويايي ټولنې د ملکي ساتنې او بشري مرستو عمومي رییس سره په لېدنه کې د راستانه شویو کډوالو او طبیعي پېښو له امله اغېزمن شویو کسانو لپاره د بېړنو مرستو په برخه کې د همکارۍ غوښتنه کړې ده.

د تېر جمهوري نظام پر مهال د ولسمشر لومړي مرستیال امرالله صالح ادعا کوي چې یوازې د افغانستان انټرنشنل بانک (AIB) له لارې امریکا طالبانو ته شپږ میلیارده ډالر لېږلي. هغه یکشنبه د (لیندۍ ۱۶مه) پر اېکس لیکلي، له دې ټولو سره سره افغانستان د واشنګټن په ۲۰۲۵ ستراتېژیک سند کې ځای نه لري.

په بلخ ولایت کې د پلاستیکي بوجیو او تارونو نوې فابریکه فعاله شوې، چې طالب چارواکي یې د اقتصادي ځان‌بساینې او کارموندنې لپاره مهم ګام بولي. په دې فابریکه کې په ورځنۍ کچه د ۲۰ټنه تولید ظرفیت شته او ۲۰۰ کسانو ته په‌کې د کار زمینه برابره شوې ده.

په سرېلنکا کې د افغانستان پخواني سفیر محمد اشرف حیدري د طالبانو پر ضد د اسټرالیا تازه بندیزونو ته په غبرګونه کې ویلي چې دغه هېواد داسې مهال د نړیوالو سیاستونو په مرحله کې زړور او اخلاقي ګام پورته کړی چې ډېری حکومتونه د لنډمهالو سیاسي ګټو لپاره د بشري حقونو موضوع څنډې ته کوي.

د افغانستان د مخکېني اسلامي جمهوریت د ډېپلوماټیکو او قونسلګریو ماموریتونو همغږۍ شورا د اسټرالیا له لوري د طالبانو پر مشرتابه د هدفمندو بندیزونو او سفري محدودیتونو اعلان ستایلی او دا یې د بشري حقونو او عدالت لپاره یو تاریخي او الهام‌بښونکی ګام بللی دی.

رویټرز خبري اژانس راپور ورکړی چې د یونان سویلي ټاپو تر څنګ د کډوالو یوه کښتۍ ډوبه شوې او ۱۸ کسان په‌کې مړه شوې دي. د ساحلي ژغورنې یوه چارواکي ویلي چې له دې کښتۍ څخه یې ایله دوه تنه ژغورلي او پاتې نور مړه شوي دي.

د سوریې لنډ مهالي ولسمشر احمد الشرع د دوحې فورم په ۲۳مه غونډه کې وویل، د سوریې په اوسني دولت کې ټولې ډلې حضور لری او د مذهب او قومیت پر بنسټ د واک وېشنه «لویه تېروتنه» ده. هغه په ډاګه کړه، چې تر راتلونکو څلورو کلونو به ولسمشریزې ټاکنې وشي.

د امریکا د سرحدي ګزمې مشر مایکل بنکس اعلان کړی، چې ټول هغه پناه‌غوښتونکي چې له ناقانونه ننوتلو وروسته نیول شوي، باید پنځه زره ډالره جریمه ورکړي. د بنکس په وینا، دا لګښت پر ټولو هغو کسانو تطبیق کېږي، چې عمر یې له ۱۴ کلونو پورته وي او پرته له قانوني معاینې امریکا ته داخل شوي وي.

د افغانستان د ښځو د والیبال ملي لوبډله به د مرکزي اسیا د زون په والیبال سیالیو کې ګډون وکړي. په دې سیالیو کې د افغانستان، قرغزستان، مالدیف، ترکمنستان او بنګله‌دېش لوبډلې ګډون لري. مالدیف د دې سیالیو کوربتوب کوي.

په لوګر کې د ۶۵ جوړو د ډله‌ییز واده مراسم د یوه خیریه بنسټ په مالي ملاتړ او همکارۍ د شنبې په ورځ (د لیندۍ ۱۵مه) د پل علم ښار په سپورټي لوبغالي کې ترسره شول. د دغو ځوانانو ودونه له کلونو راهیسې د اقتصادي ستونزو له امله ځنډېدلي و.

د ګوا په سوېل لوېدیځ کې په یوه کلي کې د اور لګېدو له امله د درېیو ښځو په ګډون لږ تر لږه ۲۳ کسان مړه شوي دي. پولیسو ویلي، چې د قربانیانو ډېری برخه د کلپ کارکوونکي دي او اورلګېدنه ښايي د شنبې په شپه ناوخته د پخلنځي دننه د ګاز د ډبې د چاودنې له امله رامنځته شوې وي.

امریکا پاکستان ته د ناقانونه کډوالۍ او نشه‌یي توکو د مخنیوي په برخه کې د تخنیکي مرستو وړاندیز کړی دی. دغه څرګندونې د پاکستان د کورنیو چارو وزیر محسن نقوي او د امریکا د سرپرستې سفیرې نټلي بېکر ترمنځ د لیدنې پر مهال شوې دي.

د اروپايي ټولنې له خوا د غېرقانوني محتوا ضد قوانینو د سرغړونې له امله په اېکس شرکت باندې د ۱۴۰ میلیون ډالرو جریمې له لګولو وروسته، امریکایي میلیارډر اېلان ماسک د اروپايي ټولنې د منحل کېدو غوښتنه کړې ده.