آرشیف

د پاکستان پوځ وايي په تېرو ۲۴ ساعتونو کې یې د خیبر پښتونخوا د خیبر ولسوالۍ او د بلوچستان د نوشکي ولسوالۍ په بېلابېلو سیمو کې د عملیاتو پر مهال ۳۲ وسله وال وژلي دي.

د بښنې نړیوال سازمان د امریکا څانګې له امریکايي چارواکو غوښتي چې واشنګټن ته د نتنیاهو د سفر پر مهال هغه ونیسي. دغه سازمان ټینګار کړی چې نتنیاهو باید د بشري حقونو او د قانون حاکمیت ته د درناوي لپاره نړیوالې جزایي محکمې ته وسپارل شي.

د تهران پولیسو ویلي، د لواسان په سیمه کې یې د یوه ۲۲ کلن افغان کډوال د وژنې په تړاو دوه افغان وروڼه نیولي. د پولیسو په وینا، قرباني د چړې په ګوزارونو ټپي شوی و او په روغتون کې یې ساه ورکړه. نیول شویو کسانو اعتراف کړی او ادعا یې کړې چې مقتول یې خور ته مزاحمت کاوه.

د طالبانو تر واک لاندې د افغانستان برېښنا شرکت رییس د ازبکستان د برېښنا ملي شرکت له مسولینو سره په افغانستان کې د برېښنا د اړتیا په تړاو خبرې کړې دي. طالبانو ویلي، افغانستان برېښنا ته جدي اړتیا لري او د دې اړتیا د پوره کولو لپاره د ازبکستان لا ډېره همکاري اړینه ده.

د طالبانو د ارشاد حج او اوقافو وزیر نور محمد ثاقب وایي، د سږني حج له لګښتونو پاتې ۹۴ میلیونه او ۶۵ زره او ۶۱۶ افغانۍ به حاجیانو ته بېرته ورکړل شي. د نوموړي په وینا، د هر حاجي برخه ۳ زره او ۲۲۳ افغانۍ ده ځکه د حج لګښت د ټاکل شوې اندازې څخه کم شوی دی.

د بلوچستان په چاغۍ ولسوالۍ کې د افغان کډوالو مشهوره پنډغالی «ګردي ځنګل» چې په افغانستان کې د شوروي اتحاد له یرغل وروسته جوړ شوی و، د افغان کډوالو تر ستنېدو وروسته نږدې په بشپړه توګه تش شوی دی.

په سرپل کې سرچینې وایي، د طالبانو د استخباراتو کارکوونکی امرالله او د یادې ډلې د ۲۰۹ قول اردو غړی بازمحمد د سرپل ښار په بازار کې په یوه وسله‌وال برید کې وژل شوي دي. طالبانو د برید او د یوه کس د وژل کېدو پخلی کړی؛ خو د وژل شوي کس هویت او له طالبانو سره یې تړاو نه‌دی څرګند کړی.

د کندهار یوشمېر هټۍوال او سوداګر وایي، د طالبانو د امربالمعروف ریاست تازه لارښوونه کړې چې ټول هغه توکي باید له هټیو ټول او یا یې هم تصویرونه پاک کړي چې د ښځو انځورونه پرې چاپ شوي وي.

د خیبر پښتونخوا د خېبر ولسوالۍ په لنډي کوتل سیمه کې افغانستان ته د ستنېدونکې کډوالې کورنۍ موټر د برېکونو خرابېدو له امله له یو غر سره ټکر شوی، چې له امله یې درې کسان ټپیان شوي دي.

د طالبانو د زندانونو د چارو سمون ادارې ویاند محمدنسیم لالهاند ویلي، چې دامهال د کابل د ښځو په زندان کې شاوخوا ۳۴۵ ښځینه بندیانې ساتل کېږي. د هغه په وینا؛ له دې ډلې ۱۰۵ ښځینه بندیانې په بېلابېلو روزنیزو پروګرامونو کې لکه پر دیني زده‌کړو، سواد زده‌کړې او حرفوي زده‌کړو بوختې دي.

نن (د زمري ۷مه) د افغانستان د ملي بېرغ ورځ ده. دغه ورځ وړاندې هرکال د افغانانو له‌خوا په ځانګړو مراسمو نمانځل کېده؛ خو په افغانستان کې د طالبانو له بیا واکمنېدو وروسته تر ډېره د دغه ورځې نمانځنه په بېلابېلو هېوادونو کې د مېشتو افغانانو او د خواله رسنیو کاروونکو پورې محدوده شوې.

د بلوچستان په کیچ ولسوالۍ کې د ناپېژاندو وسله‌والو په ډزو کې درې کسان وژل شوي دي. د پولیسو په وینا؛ دغه پېښه د تربت ښار څخه شاوخوا ۳۰ کیلومتره لرې د درمکول پیدراک په سیمه کې شوې ده.

د روغتیا نړۍوال سازمان په خپل تازه راپور کې ویلي، چې د چنګاښ له ۲۹مې د زمري تر ۳مې پورې ناڅاپي سېلابونو پراخ بشري زیانونه اړولي دي. د راپور له مخې؛ سېلابونو کورونو، عامه تاسیساتو او د خلکو د ژوند او عاید سرچینو ته سخت زیان رسولی او د بېړنیو بشري مرستو اړتیا یې زیاته کړې ده.

د تهران پولیسو ویلي، چې د دغه ښار په سویل کې د یوه ۳۸ کلن افغان مړی موندل شوی دی. د پولیسو په وینا؛ د دغه افغان کډوال لاسونه، پښې او غاړه د رسۍ پرمټ پر یوې اوسپنې تړل شوي وو.

د ملګرو ملتونو د بشري چارو د همغږۍ دفتر (اوچا) ویلي، چې په مرکزي، ختیځ او سویل خیتځو سیمو کې سېلابونو او طبیعي پېښو په پراخه کچه کورنۍ اغېزمنې کړې دي. یادې ادارې زیاته کړې، چې مرستندویه ادارې د ارزونو ترڅنګ سېلاب ځپلو سیمو ته خپلې مرستې زیاتوي.

د پاکستان د پنجاب ایالت پولیسو ویلي، چې تراوسه یې له دغه ایالت څخه د ۳۷زره افغانانو په ګډون زرګونه بې‌اسناده بهرني وګړي بېرته ستانه کړي دي. د پنجاب پولیسو ویاند ویلي، د لاهور په ګډون د دغه ایالت له بېلابېلو سیمو د بې‌اسناده بهرنیانو د اېستلو بهیر روان دی.

د تایباد د دوغارون سرحدي ټرمینل مدیر محسن رکني وايي، د روان کال په تېرو څلورو میاشتو کې د بار وړونکو موټرو د تګ‌راتګ شمېر د تېرکال د ورته مودې پرتله ۱۲۶ سلنه زیات شوی دی. نوموړي‌ ویلي، په دې موده کې ۲زره او ۱۹۴ بار وړونکي موټرونه له افغانستان نه ایران ته داخل شوي‌ دي.

د خیبر پښتونخوا سر وزیر محمدسهیل اپریدي ویلي، د پاکستان تحریک انصاف ګوند د خپلو حقونو د ترلاسه کولو لپاره ټولې اساسي او قانوني لارې کارولې دي؛ خو له ګوند او د خیبر پښتونخوا له حکومت سره توپیري چلند کېږي.

رویټرز خبري اژانس د یوه لوړپوړي ایراني چارواکي په حواله راپور ورکړی، چې تهران د هرمز تنګي ګډ مدیریت لپاره د عمان وړاندیز رد کړی دی. دغه ایراني چارواکي ویلي: «د هرمز تنګي په اړه له عمان سره د ګډ مدیریت پلان د ایران په ګټه نه‌دی».

په هرات کې د طالبانو رسنیز دفتر خبر ورکړی، چې د ۱۰۰زره ډالرو په ارزښت د دغه ولایت د صادراتي ډبرو لومړۍ جوپه د امریکا بازار ته ولېږدول شوه. یاد فتر زیاتوي، چې په دغه جوپه کې د هرات د زنده‌جان ولسوالۍ د کانونو تورې ډبرې شاملې دي.

۱۳۵ پاکستاني محصلان چې ډېری یې د خیبر پښتونخوا د بر او کوز دېر اوسېدونکي دي؛ له شاوخوا نهو میاشتو بند پاتې کېدو وروسته د تورخم له لارې پاکستان ته ستانه شول.