د ملګرو ملتونو د بشري چارو د همغږۍ دفتر (اوچا) خبرداری ورکړی چې د بودجې ستر کسر د افغانستان د بشري مرستو بهیر له جدي ګواښ سره مخ کړی دی. د دې ادارې په وینا، د ۲۰۲۶ کال د بشري اړتیاوو او غبرګون پلان لپاره له اړینو ۱،۷۱ میلیارد ډالرو څخه یوازې ۲۶۹ میلیون ډالر ترلاسه شوي.
د انګلستان د ارون ولسوالۍ شورا د افغان کډوالو د ځای پر ځای کولو پروګرام په اړه د خپرو شویو نیوکو او څرګندونو په غبرګون کې ویلي، هغه افغانان چې د دې پروګرام له لارې مېشتېږي، هغه کسان دي چې پخوا یې د برېتانیا له پوځ او حکومت سره همکاري کړې او د خپل ژوند له جدي ګواښ سره مخ شوي وو.
هند اعلان کړی چې کابل ته یې پنځه ټنه نور اړین درمل لېږلي دي. د هند د بهرنیو چارو وزارت وايي، دغه مرسته له افغانانو سره د بشري همکاریو د دوام برخه ده او د افغانستان د خلکو د هوساینې او روغتیا په برخه کې د نوي ډیلي د ژمنې څرګندونه کوي.
د افغانستان او پاکستان د روانو سیاسي او امنیتي ترینګلتیاوو له امله له نوو ننګونو سره مخ شوی دی. راپورونه ښيي چې دغه وضعیت د سیمې پر سوداګریزو لارو او اقتصادي اړیکو مستقیم اغېز کړی دی.
د طالبانو د امربالمعروف وزارت وايي، چې د خلکو شکایتونو ته د رسېدنې په موخه یې په تخار، غزني، پروان او نیمروز ولایتونو کې پنځو ښځو ته د «مهر او نفقې شرعي» حقونه ورکړي. دغه وزارت ویلي، چې به تېرو ۳ میاشتو کې یې شاوخو ۱۰۰۰ ښځو ته د «میراث، مهر او نفقې» حقونه ورکړې دي.
د ملګرو ملتونو د بشري مېشتځایونو اداره (یو این هبیتات) وایي چې د افغانستان په شمال ختیځ کونړ او بغلان ولایتونو کې د راستنېدونکو کورنیو لپاره د ۸۰۰ استوګنیزو کورونو د ترمیم او ښهوالي چارې روانې دي، څو دغو کورنیو ته خوندي او مناسب سرپناه برابره شي.
د طالبانو امربالمعروف وزیر خالد خنفي د افغانستان له یو شمېر قومي مشرانو سره په غونډه کې د افغانستان پر تېرو نظامونو سختې نیوکې کړي. نوموړي زیاته کړې: « تېر شل کن فاسد جمهوریت چې ټوله نړۍ یې ملاتړې وه ځکه له منځه ولاړ چې د اسلام نظریه او مفکوره یې نه لرل»
د روغتیا نړیوال سازمان (ډبلیو اېچ او) وایي چې د افغانستان د بدخشان ولایت په لېرې پراته سیمه پېنګاني کې د روغتیايي خدماتو پراختیا د زرګونو خلکو د ژوند ژغورلو سبب شوې، په ځانګړي ډول د میندو او ماشومانو لپاره د خوندیتوب او بېړنیو خدماتو په برابرولو په برخه کې.
د طالبانو کورنیو چارو وزارت د سرحدي پولیسو نظامي مرستیال مولوي عبدالمنان حسان د افغانستان لپاره د قزاقستان له سفیر غازیز اکباسوف او د دغه هېواد د امنیتي بنسټونو له استازو سره په لیدنه کې د دواړو هېوادونو ترمنځ د امنیتي همکاریو پر پراختیا خبرې کړي.
د طالبانو کډوالو او راستنېدونکو چارو وزارت د بشري مرستو د همغږۍ له یوې مرستندویه موسسې سره د یو میلیون، ۶۳۱ زره او ۱۸۰ ډالرو په ارزښت د همکارۍ هوکړه لیک لاسلیک کړې ده.
د «هوملینډ سیکورټي ټوډی» په یوه راپور کې ویل شوي چې په افغانستان کې د روغتیايي نظام وضعیت د سقوط له جدي خطر سره مخ دی او د جګړې او واکمنۍ دواړو پړاوونو کې پر روغتیايي سکټور منظم فشارونه وارد شوي دي.
د طالبانو د کرنې، اوبولګولو او مالدارۍ وزارت وايي، چې د افغانستان لپاره د اروپایي ټولنې سفیر، د ملګرو ملتونو د خوړو نړیوال سازمان مشر او د نړیوالو بنسټونو یو شمېر مسولینو د لبنیاتو د پروسس مرکز، د سمدرې سیمې د کرنیز کانال او د بهارک ولسوالۍ د کرنیزو پروژو ارزونه کړې.
د چین بهرنیو چارو وزیر وانګ يي په بیجینګ کې د شانګهای همکارۍ سازمان د جوړېدو ۲۵مې کلیزې نمانځنې په مراسمو کې وویل، چې یاد سازمان دې د افغانستان د بیارغونې او پراختیا په برخو کې ملاتړ پراخ کړې. نوموړي زیاته کړه، چې دغه ملاتړ په سیمه کې د سولې او ثبات لامل کېدلی شي.
د خېبر ټرانسپورټ اتحادیې د احتجاج په توګه افغانستان ته د کډوالو د لېږد لپاره د هر ډول موټرو تګ راتګ درولی دی. د اتحادیې مسولین وايي، دا پرېکړه یې په افغانستان کې د بندو موټرو په غبرګون کې کړې چې له نهو میاشتو درول شوي.
د افغانستان د کرېکټ الف لوبډلې «افغان ابدالیان» نن د هند الف لوبډلې پر وړاندې په سریلانکا کې د لوبې ډګر ته ښکته شوې، په داسې حال کې چې د افغانستان ملي کرېکټ لوبډله به نن د هند ملي لوبډلې پر وړاندې د دویمې یو ورځنۍ نړیوالې سیالۍ لپاره په هند کې لوبه ترسره کړي.
ملګري ملتونه وایي چې د نړۍ له نیمایي څخه زیاتې طبیعي څړځایونه (رېنجلینډونه) یا تخریب شوي او یا د له منځه تلو له ګواښ سره مخ دي، چې دا وضعیت د خوړو او اوبو خوندیتوب، د اقلیم بدلون پر وړاندې مقاومت او د میلیونونو خلکو ژوند له جدي خطر سره مخ کوي.
د ملګرو ملتونو د بشري چارو د همغږۍ دفتر (اوچا) د افغانستان استازې اولګا چیریفکو ویلي چې افغانستان د نړۍ له هغو هېوادونو څخه دی چې د میندو د مړینې تر ټولو لوړه کچه لري.د نوموړې په وینا، په دغه هېواد کې د هرو ۱۰۰ زرو زیږونونو پر مهال شاوخوا ۶۰۰ میندې خپل ژوند له لاسه ورکوي
د جمیکا هېواد د لومړي وزیر مرستیال او د امنیت وزیر هوریس چانګ د سه شنبې په ورځ وویل چې جمیکا له واشنګټن سره په دې اړه خبرې کوي چې د نورو هېوادونو هغه کډوال ومني چې له امریکا څخه ایستل کیږي. هغه وویل، دا تړون لا هم نهایی شوی نه دی.
په پاکستان کې مېشت افغان زده کوونکي وايي، د افغان کډوالو د ایستلو د روان بهیر له پراخېدو سره یې د زدکړو راتلونکی له جدي ګواښ سره مخ شوی او ګڼ شمېر زده کوونکي د نیول کېدو او ایستلو له وېرې له ستونزو سره مخ دي.
د امریکا د نیویارک ښاروال زهران ممداني، د محرم میاشتې په مناسبت ویلي چې دا میاشت مسلمانانو ته د عدالت، خواخوږۍ او اخلاقي زړورتیا هغه ارزښتونه ور په یادوي چې د خلکو او ټولنو د ژوند لارښوونه کوي.
د ملګرو ملتونو د کډوالو عالي کمېشنرۍ وایي، چې په ۲۰۲۷ کال کې به شاوخوا ۲،۴ میلیونه کډوال د بیا مېشتېدو اړتیا ولري، خو فرصتونه ډېر کم دي. د ادارې په وینا، افغان کډوال لا هم د هغو کډوالو تر ټولو لویه ډله جوړوي چې د خوندي او دایمي حل لپاره د درېیم هېواد بیا مېشتېدو ته اړتیا لري.