آرشیف

د امریکا مرستیال ولسمشر جې ډي وېنس او مېرمن یې اوشا وېنس په یوه رسمي سفر اسراییل ته تللي دي. د راپورونو پربنسټ؛ وېنس په غزه کې د اوربند تړون عملي کولو ته د ښکېلو خواوو د هڅونې لپاره اسراییل ته تللی دی.

د امریکا ولسمشر ډونالډ ټرمپ او د اسټرالیا لومړي وزیر انتوني البانیزي د منرالونو په برخه کې د ګډې پانګونې تړون لاسلیک کړ. د تړون له مخې؛ دواړه هېوادونه به په راتلونکو شپږو میاشتو کې یو، یو میلیارد ډالره د دغه نادره منرالونو د کان‌کېندنې او پروسس پروژو ته ځانګړي کړي.

د غزې د روغتیا وزارت د دوشنبې په ورځ (د تلې ۲۸مه) وویل، په تېرو ۲۴ ساعتونو کې د اسراییلي ځواکونو په مخامخ ډزو کې لږ تر لږه ۴۵ فلسطینیان وژل شوي دي. د اسراییل پوځ بیا ویلي، په شجاعیه سیمه کې يې څو «ترهګر» چې له «زېړې» کرښې تېر شول او «جدي ګواښ» و، په نښه کړي دي.

ملګري ملتونه وايي، د غزې د اوربند د ژمنو تازه تایید یې د تشویشونو ترڅنګ هیلې هم راپارولي دي، خو خبرداری یې ورکړی چې وروستي تاوتریخوالي د سولې نازک بهیر ته زیان رسولی شي. دغه ادارې زیاته کړې، د ویجاړیو د پاکولو پراخ عملیات یې پیل کړي، چې موخه یې د بنسټیزو خدمتونو بېرته فعالول دي.

د ایران د خراسان رضوي والي غلام حسین مظفري وایي، دمګړی ۲ زره او ۲۰۰ ټانکره تېل د افغانستان په خاوره کې درول شوي، خو د لامل په اړه یې څه نه دي ویلي. طالبان بیا هر کله د ایران په ګډون له نورو هېوادونو واردېدونکي کم کیفیته تېل بېرته مستردوي.

د جرمني لومړی وزیر فریدرېښ مېرڅ د کډوالۍ په تړاو د خپلو وروستیو څرګندونو له امله له پراخ سیاسي او ټولنیز غبرګون سره مخ شوی. نوموړي په یوه غونډه کې د خپلې ادارې د کډوالۍضد تګلارې ستاینه وکړه، خو وروسته یې وویل چې «د جرمني د ښارونو په بڼه کې یوه ستونزه شته.»

د افغانستان د جمهوري نظام د ملي امنیت پخوانی مشر معصوم ستانکزی وايي، په افغانستان کې د ناورین رامنځته کول د پاکستان د سیاست یوه برخه ده. د ستانکزي په وینا، تر هغې چې په دغه سیاست کې په حقیقي توګه بدلون رانه‌شي، نو له افغانستان سربېره به پاکستان هم له لویو ستونزو سره مخ وي.

هندي رسنیو خبر ورکړی، چې د دغه هېواد وتلی فلمي لوبغاړی او فلم جوړوونکی ګووردهن اسراني چې په «شعلې» فلم کې د بندیخانې د چارواکي په کومېډي رول سره مشهور شوی و، د اوږدې ناروغۍ له امله په ۸۴ کلنۍ کې مړ شوی دی. دغه هندي کومیډین په افغانستان کې هم ځانګړي او ډیر مینوال لرل.

د پښتون ژغورنې غورځنګ د امریکا د ټېکساس ایالت په سان انتونیو ښار کې د تېرې خېبر ولسي جرګې د پرېکړو د دوام په توګه د «پښتون ولسي جرګې» په نوم غونډه وکړه. د غونډې ګډونوالو په پښتونخوا کې د پاکستان د پوځ له لوري ترسره شوې بمبارۍ غندلې او هغه یې جنګي جرمونه بللي دي.

د پاکستان دفاع وزیر خواجه اصف وايي، په قطر کې له افغان طالبانو سره خبرې شوي او په وینا یې هېڅکله به هم له تحریک طالبان پاکستان «ټي‌ټي‌پي» سره خبرې ونه‌کړي.

بلوچستان پوسټ ویلي، چې د بلوچستان په مند ولسوالۍ کې د بلوچ بېلتون‌پالو «بي اېل اېف» ډلې وسله‌والو د پاکستان د نیمه‌پوځي ځواکونو پنځه سرتېري وژلي او دوه نور یې ټپيان کړي دي.

طالبانو له یوې بهرنۍ سیلانې سره د غېراخلاقي خبرو له امله د یوه کس د نیولو خبر ورکړ. نیول شوی کس محمدجان نومېږي او د کابل په ختیځه دروازه څرخي پله سیمه کې یې د واکسیناتور په توګه کار کاوه.

د ملګرو ملتونو د ماشومانو د ملاتړ صندوق (یونېسف) استازي ډاکټر تاج‌الدین اویوواله ویلي، چې په لوېدیځ افغانستان کې دې ادارې له هغو کورنیو سره مرسته کړې ده، چې تازه له ایران څخه راستانه شوې دي.

د طالبانو اړوند «المرصاد» رسنۍ د دوشنبې په ورځ (د تلې ۲۸مه) په یوه مقاله کې د پاکستان د اوسني ژور سیاسي، امنیتي او اقتصادي بحران پړه د دغه هېواد د پوځ پر مشر عاصم منیر ور واچوله. د یادې رسنۍ په وینا، پوځ له خپل اصلي ماموریت څخه منحرف شوی او شخصي ګټې پالي.

د روسیې د بهرنیو چارو وزارت ویلي، چې سرګي لاوروف له خپل امریکایي سیال مارکو روبیو سره د ټلیفوني اړیکې له لارې خبرې کړې دي. یاد وزارت زیاتوي، د لاوروف او روبیو خبرې د پوتین او ټرمپ د موافقې پر عملي کېدو متمرکزې وې.

څو ورځې وړاندې د افغانستان او پاکستان ترمنځ پر ډیورنډ کرښه د دواړو لوریو ترمنځ نښتې رامنځته شوې، چې د دواړو هېوادونو لسګونو سرتېرو ته یې مرګ‌ژوبله واړوله. دا له ۲۰۲۱ کال راهیسې کله چې طالبان یو ځل بیا واک ته ورسېدل، د دواړو ګاونډیو ترمنځ تر ټولو جدي نښتې بلل کېږي.

د طالبانو د رييس الوزرا اقتصادي مرستيال ملا عبدالغني برادر د دوشنبې په ورځ (د تلې ۲۸مه) د ترکمنستان له ملي رهبر قربانقلي بردي محمدوف سره په کتنه کې له هغه وغوښتل چې په ټاپي پروژه کې افغانانو ته هم کاري فرصتونه برابر کړي.

د خوړو نړیوال پروګرام په افغانستان کې د لوږې د ډېرېدو خبرداری ورکړی دی. یاد سازمان وايي، چې په افغانستان کې خوارځواکي هم په چټکۍ سره مخ په زیاتیدو ده. دوی زیاتوي،چې دوی د تمویل محدودیتونو له امله یوازې د اړمنو خلکو یوه کوچنۍ برخه حمایه کولی شي.

د طالبانو د رییس‌الوزرا ملا محمد حسن اخوند په مشرۍ د ددې ډلې د کابینې په غونډه کې پرېکړه شوې، چې د هېواد د ریل پټلۍ د جوړولو لپاره به نوی تخنیکي معیار وټاکل شي، او همدارنګه کډوالو ته د ځمکو د وېش پروسه به چټکه شي.

د اروپايي اتحادیې کمیسیون تایید کړې چې له طالبانو سره یې د هغو افغان وګړو د احتمالي بېرته ستنولو په اړه خبرې کړې دي چې په اروپايي هېوادونو کې د پاتې کېدو قانوني حق نه لري. ددغه کمیسیون یوه ویاند ویلي، «د روان کال په لومړیو کې مو له افغان چارواکو سره د تخنیکي کچې خبرې پیل کړې دي».

د پاکستان حکومت په بلوچستان ایالت کې د افغان کډوالو لس پنډغالي وتړل. پاکستانی رسنیو رپوټ ورکړی، چې دغه لس پنډغالي د بلوچستان په کویټه، قلعه سیف الله، پشین، لورلايي او چاغي کې تړل شوي او په دې پنډغالو کې شاوخوا ۸۵ زره افغان کډوال اوسېدل.