په ننګرهار کې د طالبانو د امنیې قوماندانۍ ویاند سید طیب حماد خبر ورکړی، چې د دغه ولایت د پچيراګام ولسوالۍ په بامخېلو سیمه کې د دوو وروڼو ترمنځ د ځمکې پر سر د شخړې له امله درې کسه وژل شوي او دوه نور ټپیان دي.
د طالبانو د دولتي شرکتونو عمومي ریاست د دوشنبې په ورځ (د غبرګولي ۴مه) خبر ورکړی، چې په شمال کې د بغلان ولایت د تاله او برفک ولسوالۍ د انارک سیمې اړوند یې د ډبرو سکرو یو نوی کان پرانیستی دی.
نیویارک پوسټ ورځپاڼې د امریکا حکومت د یوه لوړ پوړي چارواکي په حواله راپور ورکړی، چې د هرمز تنګي د بیا پرانیستلو لپاره د ایران له حکومت سره د سولې هوکړې وروستي کېدل ښایي تر یوې اونۍ وخت ونیسي.
د فوټبال نړۍوال جام په درشل کې ملګرو ملتونو د نړۍ د فوټبال د ۱۶ مشهورو څېرو یو نوملړ خپور کړی. دغه نوملړ چې د «فوټبال د موخو اتلان» په نوم یاد شوی، د افغانستان د ښځینهو فوټبال ملي لوبډلې پخوانۍ لوبډلمشره خالده پوپل هم پهکې شامله ده.
په بغلان کې د طالبانو تر واک لاندې د طبیعي پېښو پر وړاندې د چمتوالي ادارې خبر ورکړی، چې په دغه ولایت کې د وروستیو سېلابونو له کبله تر ۱۰۰ زیات کورونه او په زرګونه جریبه کرنیزه ځمکه ویجاړه شوې ده.
هغه الوتکه چې د برېتانیا دفاع وزیر جان هیلي پهکې وو، د روسیې پولې ته نږدې د الوتنې پرمهال د سېګنال له ګډوډۍ سره مخ شوه. یاده پېښه هغه مهال وشوه، چې نوموړی د پنجشنبې په ورځ په استونیا کې له برېتانوي سرتېرو سره تر لیدنې وروسته بېرته برېتانیا ته روان و.
په پاکستان کې مېشت افغان زدهکړیالان د نیولو، شړلو او د ویزو له خنډونو سره مخ دي، چې له امله یې د هغوی د کلونو زدهکړې، قربانۍ او هیلې له ګواښ سره مخ کوي. د بېځایه شویو نړۍوال سازمان وایي، په وروستیو میاشتو کې د افغان زدهکړیالانو زدهکړې د همدغه ننګونو له امله ګډوډې شوې دي.
د جماعت اسلامي ګوند مشر حافظ نعیمالرحمان د پاکستان له حکومته غوښتي، چې له افغانستان سره دې ټولې تړلې لارې بېرته پرانیزي. نوموړي د دواړه خواوو د قومي مشرانو او سوداګرو د ګډې کمېټې د جوړېدو غوښتنه هم کړې او ویلي یې دي، چې دغه اقدام د خلکو د هوساینې او اقتصادي ټیکاو لپاره اړین دی.
د نړۍ له بېلابېلو هېوادونو تر ۱.۵ مېليونه ډېر حاجیان نن دوشنبه (د غبرګولي ۴مه) د مکې مکرمې په ښار کې د حج مراسم پيل کړل. حاجیان نن پلي او په موټرو کې د لارو، تونلونو او پلونو له لارې منا ته ورسېدل او سبا به د حج د ستر رکن د عرفاتو مراسم ترسره کړي.
د روسیې پوځ د اوکراین پر پلازمېنه کیف او شاوخوا سیمو کې یو لړ هوایي بریدونه کړي، چې لږترلږه څلور کسان یې وژلي او شاوخوا ۱۰۰ نور یې ټپیان کړي دي. دغه بریدونو د ښار په مرکز کې لسګونه استوګنیزې ودانۍ او څو ښوونځي هم زیانمن کړي دي.
په میدان وردګ کې د طالبانو امنیې قوماندانۍ خبر ورکړی، چې د دغه ولایت د سیداباد ولسوالۍ اړوند د کابل ـ کندهار پر لویه لاره د حیدرخېلو او تنګي دوه لارې په سیمو کې د دوو جلا ټرافیکي پېښو له امله دوه کسان مړه او څلور نور ټپیان شوي دي.
د افغانستان د ګډو رزمي هنرونو ملي لوبډلې د اسیا د اتلولۍ په څلورم پړاو (AMMA) سیالیو کې چې په ازبکستان کې ترسره شوې، یو د سپینو زرو او څلور د برونزو مډالونه وګټل. افغانستان په دغه سیالیو کې له ۱۳ لوبغاړو، څلورو روزونکو او یوه پلاوي سره ګډون کړی و.
د افریقا د ناروغیو د کنټرول او مخنیوي مرکز اعلان کړی، چې تر اوسه لږترلږه د اېبولا وبا له امله د ۱۷۷ کسانو د مړینې پېښې ثبت شوې؛ خو ښايي اصلي شمېر تر دې هم لوړ وي. د روغتیا نړۍوال سازمان ویلي، چې د کانګو دیموکراتیک جمهوریت کې تر ۹۰۰ ډېرې د اېبولا شکمنې پېښې پېژندل شوې دي.
د ایران د کرمان ولایت د جیرفټ د ناورينونو مديريت څانګې مشر جواد افشارمنش خبر ورکړی، چې په دغه ښار کې د یوې ټرافیکي پېښې له امله درې کسان مړه او لس نور ټپیان شوي دي. د هغه په وینا؛ په دغه موټر کې ټول سپاره کسان افغانان وو.
د افغانستان کرېکټ بورډ وايي، د ۱۹ کلنو ملي لوبډلې لپاره د ۱۹ کلنو لوبغاړو د غوراوي سیالیو لومړۍ برخه چې ۹ ورځې مخکې پیل شوې وه، نن (دوشنبه د غبرګولي ۴مه) پایته رسېږي. د بورډ په وینا، د دغو سیالیو دویمه برخه به ۷ ورځې وروسته پیل او ۱۴ ورځې به دوام وکړي.
د نړیوالو تېلو بیې د وروستیو دوو اوونیو تر ټولو ټیټې کچې ته راښکته شوې دي. د «اویل پرایس» وېبپاڼې د راپور له مخې، د خامو تېلو په نړیوال بازار کې د بیو کمېدو بهیر دوام لري.
د خوست ولایت لپاره د طالبانو د رسنیو دفتر وايي، د دغه ولایت لپاره د دوی د مرافعه محکمې رييس عینالله خلیل په غزني کې په یوې ټرافیکي پېښه کې ومړ، خو د پېښې د څرنګوالي په تړاو څه نهدي ویل شوي. یاد دفتر د هغه مړینه د «ټولنې» لپاره ستره ضایعه بللې ده.
د افغانستان لپاره د پاکستان پخواني ځانګړي استازي اصف دراني د بلوچستان په کویټې ښار کې د وروستي ځانمرګي برید په تړاو د طالبانو د غبرګون په اړه نیوکه کړې او ویلي یې دي چې طالبان د ورته بریدونو پر وړاندې انتخابي او دوهګونی چلند کوي.
د طالبانو د ۲۰۳ منصوري قول اردو قومندان ملا محمد خان دعوت د خوست ولایت اړوند ډیورند کرښې په اوږدو کې د طالبانو له پوستو لیدنه او د وضعیت ارزونه یې کړې ده. دغه قومندانۍ وايي، په هېڅ صورت به یوه لوېشت خاوره هم چاته پرېنږدي.
د بامیانو د بودا مجسمو د نړولو ۲۴مې کلیزې په مناسبت «له بودا سره شپه» په نوم څوارلسم کلتوري پروګرام د سويډن په پلازمېنه سټاکهولم کې ترسره شو. دغه پروګرام د طالبانو له لوري د بامیانو د بودا مجسمو د ویجاړلو د یاد ساتلو او د فرهنګي میراثونو د ارزښت په اړه د پوهاوي لپاره جوړ شوی و.
د طالبانو او پاکستان ترمنځ د کړکېچ او د سوداګریزو لارو د پرلهپسې تړل کېدو له امله د پښتونخوا په بازارونو کې د وچو مېوو بیې په بې ساري ډول لوړې شوې دي. سوداګر وايي، د عرضې کمښت او د اختر له رانږدې کېدو سره د تقاضا زیاتوالي نرخونو لا لوړ کړي دي.