د خیبر پښتونخوا اعلی وزیر وايي، چې که افغان خاوره د پاکستان خلاف کارول کیږي، پوځ یې باید ثبوتونه وړاندې کړي. هغه وویل، چې افغانستان له نورو هېوادونو سره هم پولې لري، خو هغوی کله هم شکایت نه دی کړی، نو اسلام اباد ولې شکایت کوي، چې له افغانستان نه ترهګري کیږي.
د پاکستان د کډوالو ادارې سرچینې وايي، د جنورۍ د ۱۲ او ۱۳مې نېټې په لړ کې هغو پاکستاني محصلانو ته پر تورخم د اوښتلو اجازه ورکړل شوې، چې په افغانستان کې بند پاتې وو. د سرچینو په وینا، عامو پاکستاني وګړو ته هم دوه ورځې وخت ورکړل شوی چې پاکستان ته لاړ شي.
د طالبانو تر واک لاندې د ارشاد، حج او اوقافو وزارت وايي، چې د ۱۴۰۵ کال د حج لپاره د نوې نوم ليکنې بهير پيلوي. د یاد وزارت په وینا، د حج د نوې نوم ليکنې بهیر د مرغومي پر ۲۴مه نېټه پیلیږي او د سلواغې میاشتې تر څلورمې نيټې پورې په مرکز کابل ښار او ولایتونو کې پیلیږي.
د طالبانو سترې محکمې اعلان کړی، چې د پکتیا ولایت د څمکنیو ولسوالۍ د ابتدایه محکمې د پرېکړې پر بنسټ شپږ کسان د اخلاقي فساد په تور په عام محضر کې په دُرو وهل شوي دي.
په دوحه کې د طالبانو سفیر سهیل شاهین د افغانستان لپاره د جرمني له شارژدافیر رولف ډیټر رینهارډ سره کتلي او د افغان کډوالو او دوه اړخیزو اړیکو د پیاوړتیا په تړاو د همکارۍ پر لارو چارو سره غږېدلي دي.
د روغتیا نړیوال سازمان (ډبلیو ایچ او) د افغانستان څانګې خبر ورکړی، چې جاپان د افغانستان د روغتیايي برخې د پیاوړتیا په موخه ۲۴۰ زره امریکایي ډالره مرسته کړې ده.
د ترکیې پولیسو په وروستیو څو ورځو کې ۱۳ افغان کډوال نیولي دي. د وان ښار پولیسو ویلي چې اووه افغان کډوال یې په یوه بار وړونکي موټر کې نیولي دي. په ورته وخت کې د ساکاریا پولیسو هم د شپږو «بې اسناده» افغان کډوالو د نیولو خبر ورکړی دی.
د طالبانو ولایتي چارواکو د دې ډلې د مشر په لارښوونه د ولایت او ولسوالیو په کچه مشورتي ناستې پیل کړې دي. په مزار شریف کې د ورته ناستې پرمهال د طالبانو د بلخ والي یوسف وفا ویلي، چې دیني عالمان دې خپلې هڅې د طالبانو د ادارې د پرمختګ او پایښت لپاره وکاروي.
د خیبر پښتونخوا ایالت په ټانک ولسوالۍ کې د پولیسو پر موټر د سړک غاړې ماین د چاودېدو له امله شپږ پولیس وژل شوي، چې د پولیسو محلي مشر، مرستیال، موټر چلوونکی او د پولیسو د ځانګړې قطعې درې غړي پکې شامل دي.
د طالبانو د کورنیو چارو وزارت وایي، د جنایي جرمونو پر وړاندې د مبارزې پولیسو یې د هېواد په څلورو بېلابېلو ولایتونو کې د جنایي جرمونو په تړاو ۱۳ کسان نیولي دي.
د طالبانو د کار او ټولنیزو چارو وزارت وایي، د دغه وزارت اړوند د کار تفتیش او لارښوونې ریاست د روان کال په درېیمه ربع کې ۲۷۳دولتي او نادولتي ادارې پلټلې دي. د یاد وزارت په وینا، په پلټنو کې ۸ زره او ۲۲۴ تنه کورني وګړي او ۲۷۶ بهرني وګړي په ګوته شوي چې د کار جواز یې نه درلود.
د طالبانو تر کنټرول لاندې مالیې وزارت وایي، د ګمرکونو عمومي ریاست ګرځند څارونکي ټیم په تېرو درېو اونیو کې شاوخوا ۱۳۰ ټنه قاچاقي توکي نیولي. د وزارت د معلوماتو له مخې، دغه توکي په ناقانونه ډول هېواد ته واردېدل او د کندهار، نیمروز، فراه او هلمند په بېلابېلو سیمو کې نیول شوي دي.
په ایران کې له ولسي لاریونونو سره هممهاله، د طالبانو د کډوالو او بېرته راستنېدونکو چارو وزیر مولوي عبدالکبیر، د خوست، پکتیا او پکتیکا ولایتونو له قومي مشرانو سره په غونډه کې ویلي چې دوی به هیچاته اجازه ورنه کړي چې د طالبانو د ادارې خلاف خبرې وکړي.
افغانستان انټرنشنل ته په رسېدلو غږیزو پیغامونو کې د طالبانو د پروان ولایت د امربالمعروف ریاست په غونډو کې د انځور او ویډیو اخیستلو د مخنیوي امر د امربالمعروف له وزیر خالد حنفي اخېستل کیږي. د طالبانو د پروان امربالمعروف ریاست تېره ورځ له ځینو ځايي خبریالانو کمرې هم ضبط کړې دي.
د طالبانو مشر دولتي، عامه مرعي او وقفي غصب شويو ځمکو ته د رسيدګۍ په اړه نوی حکم صادر کړی، چې له مخې یې د دغو قضيو د څېړنې او حل یوازینۍ واک لرونکې مرجع د غصب شويو ځمکو اختصاصي محکمه بلل شوې ده. له دې وروسته څوک نه شي کولای د ځمکو د استرداد کمیسیون خلاف نورو ادارو کې شکایت وکړي.
د طالبانو د کورنیو چار وزارت خبر ورکړی، چې د کابل ښار په بېلابېلو سیمو کې یې د نشهيي توکو د قاچاق او پلور په تړاو ۴۰ کسان نیولي دي. د یاد وزارت په وینا؛ دغه کسان به تر څېړنو وروسته عدلي او قضایي بنسټونو ته وسپارل شي.
په اندونیزیا کې د طالبانو سفیر مولوي سعدالله بلوڅ د دغه هېواد د بهرنیو چارو وزارت له لوړپوړو چارواکو سره په لیدنه کې د افغان بندیانو وضعیت، د کډوالو او سوداګرو ستونزو او د کونسلي همکاریو د پیاوړتیا پر لارو چارو خبرې کړې دي.
د بلخ ولایت تاریخي جومات خواجه ابو نصر پارسا چې د وروستۍ زلزلې له امله زیانمن شوی و، د طالبانو د اطلاعاتو او کلتور ریاست لهخوا بیارغول کېږي. ځایي طالب چارواکي وایي، چې د جومات نږدې ۶۰سلنه د بیارغونې چارې بشپړې شوې او پاتې چارې به هم په نږدې راتلونکې کې بشپړې شي.
په کندوز کې د طالبانو امنیې قوماندانۍ ویلي، چې په دغه ولایت کې ښځینه خبریاله ناظره رشیدي یې د څلورو نورو ښځو سره یوځای د جنایي پېښې په تور نیولې ده. یادې قوماندانۍ ویلي، د نوموړې نیول د هغې له رسنیز فعالیت سره تړاو نهلري او رشیدي دا مهال له هېڅ یوې رسنۍ سره همکاري نهلرله.
په بلخ کې د طالبانو امنیې قوماندانۍ خبر ورکړی، چې په دغه ولایت کې یې د دوشنبې په ورځ (د مرغومي ۲۲مه) ۲۰۶ کیلو ګرامه وېښتان سوځولي دي. یادې قوماندانۍ د یوې خبرپاڼې په خپرولو سره ویلي، چې دغه انساني وېښتان یې د طالبانو د مشر د حکم پر بنسټ سوځولي دي.
د ملګرو ملتونو د ماشومانو ملاتړ صندوق (یونېسف) ویلي، چې د جاپان حکومت په همکارۍ په افغانستان کې ۱۶۵ ښوونځي بیارغوي. یونېسف وايي، چې دغه ښوونځي په نهو ولایتونو کې بیارغول کېږي؛ ترڅو ماشومان زدهکړو ته دوام ورکړي.