په سمنګان کې د طالبانو د امنیې قوماندانۍ ویاند حشمتالله رحماني خبر ورکړی، چې د بلخ- کندوز پر لویه لار د یوې ټرافیکي پېښې له امله یو کس مړ او ۷ نور ټپیان شوي دي. د هغه په وینا؛ دغه پېښه د سمنګان ولایت خلم ولسوالۍ ته څېرمه د ګازو له ټانکر سره د یوه موټر د ټکر له امله رامنځته شوې.
د بلوچستان ایالت مرکزي ښار کویټې اړوند په فیضاباد سیمه کې د سریاب محکمې مخې ته پنځو ناپېژاندو وسلهوالو په یوه موټر ډزې کړې، چې له امله یې درې کسان وژل شوي دي. پوليسو ويلي، چې یاده پېښه د خپلمځۍ دښمنۍ له امله رامنځته شوې ده.
د خیبر پښتونخوا ځایي حکومت په افغانستان کې د بندپاتې زرو پاکستاني وګړو د بېرته ستنېدو لپاره په پېښور کې د طالبانو له کونسلګرۍ د همکارۍ غوښتنه کړې. د پېښور کمېشنر دفتر د یوې خبرپاڼې په خپرولو سره ویلي، چې په لومړي سر کې یې د ۶۰۰ کسانو نوملړ د طالبانو کونسل ته سپارلی و.
د ملګرو ملتونو د پراختیا پروګرام د دوشنبې په ورځ اعلان کړی، چې په منځني ختیځ کې د پوځي نښتو د زیاتېدو له امله تمه کېږي په ۱۶۲ هېوادونو کې تر ۳۲ مېلیونه ډېر خلک د بېوزلۍ له ګواښ سره مخ شي.
رویټرز خبري اژانس راپور ورکړی، چې د ایران د جګړې له امله په دوبۍ او ابوظبي کې د اروپایي لوکسو برانډونو پلور کم شوی او د یادو برانډونو بازار زیانمن شوی دی. په راپور کې راغلي، چې د منځني ختیځ ناورین د نړۍ د ۴۰۰ مېلیارد ډالرو په ارزښت د لوکسو توکو صنعت شاتګ ته اړ کړی دی.
په کندهار کې د منډیګک ماڼۍ شاوخوا سیمه د سختو امنیتي محدودیتونو تر سیوري لاندې داسې حالت ته رسېدلې، چې نه یوازې پهکې د خلکو تګراتګ محدود شوی؛ بلکې دوی له خپلو کورونو هم شړل شوي دي. سرچینو افغانستان انټرنشنل ته ویلي، چې طالبانو دغه اقدام د امنیتي ګواښونو د مخنیوي په موخه کړی.
په هرات کې زرګونه کسان سړکونو ته راوتلي او په دغه ولایت کې یې د لږترلږه ۱۱ شیعه ملکي وګړو د وژنې او د ۱۱ نورو د ټپي کېدو په غبرګون کې لاریون کړی. افغانستان انټرنشنل ته په رسېدلو ویډیوګانو کې لیدل کیږي، چې د جنازې ګډونوالو د قربانیانو انځورونه په لاس کې اخېستي او شعارونه ورکوي.
د افغانستان د ښځو د همت غورځنګ د طالبانو په بند کې د درېیو خبریالانو د وضعیت په اړه اندېښنه څرګنده کړې او د هغوی د ازادۍ لپاره یې د روان کمپاین ملاتړ کړی. دغه غورځنګ په یوې خبرپاڼه کې ویلي، راپورونه ښيي چې یاد خبریالان د خپلو رسنیز فعالیتونو او د خلکو غږ اوچتولو له امله نیول شوي.
په روزګان کې د طالبانو تر کنټرول لاندې د پېښو پر وړاندې د مبارزې او چمتووالي ریاست مرستیال سراجالدین سراج مل ویلي، چې په دغه ولایت کې د وروستیو ورښتونو له امله یو کس مړ، یو لاردرکه او څلور نور ټپیان شوي دي.
په هرات کې د طالبانو رسنیز دفتر خبر ورکړی، چې د ازبکستان د اندیجان والي شهرت رحمانوف د ۶۰ سوداګرو سره په هرات کې د یادې ډلې والي اسلام جار سره د رېل پټلۍ او سوداګرۍ خونې د جوړولو په اړه خبرې کړې دي.
په ختیځ کې د طالبانو د ۲۰۱ خالد بن ولید قول اردو رسنیز دفتر ویلي، د پاکستان د بریدونو په غبرګون کې یې د «ردالظلم» غچ اخیستونکو بریدونو پرمهال ۱۳ پاکستاني پوځیان وژلي او ۲ نور یې ټپیان کړي دي. یاد دفتر زیاته کړې، چې دغه بریدونه یې پر کونړ د پاکستان د بریدونو په غبرګون کې کړي.
د طالبانو عدلیې وزارت خبر ورکړی، چې د ۱۴۰۴کال په اوږدو کې یې د کابل په بېلابېلو ناحیو او ولسوالیو کې د معاملاتو لارښوونې ۲زره او ۲۴۴ دفترونه څارلي او له دې ډلې ۲۶۳ دفترونه تړل شوي دي.
په بلوچستان کې په بېلابېلو پېښو کې پنځه کسان وژل شوي او یو بل ټپي دی. د بلوچستان په ډېره بګټي ولسوالۍ کې د پولیسو په وینا؛ د یادې ولسوالۍ پیر کوه سیمه کې ناپېژاندو وسلهوالو د امن ځواک د یوه ځايي مشر په کور برید کړی، چې له امله یې یو قبايلي مشر وژل شوی دی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ ۸۶۸ کډوالې کورنۍ چې ټولټال ۳زره او ۹۶۵ کسان کېږي؛ له ایران او پاکستان نه افغانستان ته ستنې شوې دي.
د ملګرو ملتونو امنیت شورا د بندیزونو کمېټې اعلان کړی، چې د طالبانو د څلورو چارواکو په اړه یې د بندیزونو په نوملړ کې معلومات تازه کړي.
د طالبانو د صنعت او سوداګرۍ وزارت ویاند اخندزاده عبدالسلام جواد وایي، په ۲۰۲۵کال کې د سیمې او نړۍ هېوادونو ته تر ۱۰۴زره ټنه ډېره پنه صادره شوې ده. نوموړي زیاته کړې، یاد صادارت پاکستان، ایران، قزاقستان، ازبکستان، چین، هند، متحده عربي اماراتو، عراق، ترکیې او اسټرالیا ته شوي دي.
د پاکستان تحریک انصاف ګوند بنسټګر او د دغه هېواد د پخواني لومړي وزیر عمران خان په لارښوونه د خیبر پښتونخوا حکومت د راتلونکې یکشنبې په ورځ (د وري ۲۹مه) د مردان په ریلوې میدان کې یوه پراخه ولسي غونډه جوړوي.
د افغانستان د تکواندو فدراسیون اعلان کړی، چې د هېواد دوه ځوان ملي لوبغاړي به نن د ازبکستان په تاشکند ښار کې د ځوانانو د نړۍوالو تکواندو سیالیو ۱۵م پړاو کې خپلې سیالۍ پیل کړي. دغه سیالۍ (د وري له ۲۳مې تر ۲۸مې) نېټې پورې ترسره کېږي.
د شمالي زون د طالبانو تر واک لاندې د قره قل صادراتو د ودې انسټېټیوټ وايي، چې تېرکال یې د حیرتان بندر له لارې تر ۳۶زره ډېر د قره قل پوستکي بهر ته صادر کړي دي. یادې ادارې ویلي، چې دغه صادارت تر ډېره ازبکستان، ترکمنستان او روسیې ته شوي دي.
د افغانستان د مدني ټولنو او بشري حقونو بنسټونو (ICSHRA) د طالبانو په بند کې د درېیو افغان خبریالانو د وضعیت په اړه ژوره اندېښنه څرګنده کړې او ویلي یې دي، حمید فرهادي، احمد شکېب نظري او بشیر هاتف چې دا مهال د طالبانو په بند کې دي؛ له سختو روغتیايي، روحي او رواني ستونزو سره مخ دي.
هرات چې تر وروستیو دوو لسیزو مخکې د اسلامي مذهبونو ترمنځ د سولهییز ګډ ژوند یو څرګند سمبول ګڼل کېده، اوس د طالبانو له بیا واکمنېدو وروسته د یوه ځانګړي مذهب او قوم پر وړاندې د هدفي تاوتریخوالي په مهم مرکز بدل شوی دی.