د طالبانو سترې محکمې د رویت هلال کمېټې له خلکو غوښتي، چې نن چهارشنبه له غرمې وروسته په خپلو سیمو کې د میاشتې د لیدو هڅه وکړي. یادې محکمې ویلي، چې د میاشتې د لیدو په صورت کې دې هر کس د خپلې سیمې محکمې او رویت هلال کمېټې ته شاهدي وړاندې کړي.
د پاکستان پخوانی سناتور مصطفی نواز خوخار پر اېکس پاڼه لیکلي، چې افغانان د طالبانو له سخت دريځۍ نه یرغمل دي او په پاکستان کې هم زرګونه کسان د طالبانو د «ترهګرۍ» قرباني دي. هغه زیاته کړې، چې پاکستان واک ته د افغان طالبانو په رسېدو کې رول لاره.
د ګډ امنیتي تړون سازمان ویلي، چې د پاکستان او طالبانو ترمنځ د شخړو د زیاتېدو اړوند پرمختګونه له نږدې څاري. دغه سازمان خبرداری ورکړی، چې په سیمه کې د وضعیت لا کړکېچنېدل امنیتي ګواښ رامنځته کوي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې د سېشنبې په ورځ (د کب ۲۶مه) ۸۷ کورنۍ له ایران او پاکستان نه افغانستان ته ستنې شوې دي. یاد کمېسیون زیاته کړې، چې د کډوالو سره یې لومړنۍ مرستې هم کړې دي.
د اوکراین ولسمشر ولادیمیر زېلېنسکي په منځني ختیځ کې د دغه هېواد تر ۲۰۰ څخه زیاتو متخصصینو د حضور او په راتلونکو ورځو کې سیمې ته د ۳۴نورو د لېږد یادونه کړې او ویلي یې دي، چې دغه کسان له متحده عربي اماراتو، سعودي عربستان، قطر او کوېټ سره د بېپیلوټه الوتکو په نسکورولو کې مرسته کوي.
صور ښار او په سیمه کې د فلسطیني کډوالو پنډغالو اوسېدونکو ته تر خبرداري څو ساعته وروسته اسراییلي پوځ اعلان وکړ، چې دوی په سویلي لبنان کې «د بریدونو نوې څپه» پیل کړې ده.
د افغانستان لپاره د روسیې د ولسمشر ځانګړی استازی ضمیر کابلوف وايي، مسکو د پاکستان او طالبانو ترمنځ د تاوتریخوالي د زیاتوالي په اړه اندېښمن دی. نوموړي ویلي، چې روسیه د همدې شخړې د حل لپاره منځګړیتوب ته چمتو ده.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ ټینګار کړی، چې د پاکستان لهخوا په کابل کې د روږدو کسانو د درملنې پر مرکز شوی برید باید په چټک او خپلواک ډول وڅېړل شي. نوموړي غوښتنه کړې، چې د برید عاملین باید حساب ورکولو ته اړ اېستل شي.
په پنجشېر کې د طالبانو د کانونو او پټروليم رییس مولوي محمدقاسم امیري خبر ورکړی، چې د دغه ولايت له کانونو تازه کېندل شوي ۴زره او ۱۲۶ قيراطه زمرد د یوې داوطلبۍ له لارې د ۶ مېلیونه ۳۷۲زره او ۵۱۷ افغانیو په ارزښت پر افغان سوداګرو وپلورل شول.
افغانه فعاله هوسۍ ظریف اندړ د فرانکفورټ ښاروالۍ شورا ته بریالۍ شوه. هغې په یوه ویډيويي پيغام کې ویلي، چې د ۵۳زره رایو په ترلاسه کولو یې د جرمني فرانفکورټ ښاروالۍ شورا ته لاره موندلې. هغې هیله ښودلې، چې له دې لارې به وکولای شې خپلو هېوادوالو ته خدمت وکړي.
د افغانستان د جمهوري نظام د کورنیو چارو پخوانی وزیر حیاتالله حیات پر افغانستان د پاکستان وروستي بریدونه انساني ناورین بللی او زیاته کړې یې ده، چې اوسني واکداران باید ژر تر ژره د پاکستان سفیر وشړي.
د افغانستان د وزلوبې ملي لوبډلې په قزاقستان کې د ۲۰۲۶ کال د وزلوبې نړۍوال جام په خپلې لومړۍ لوبه کې هنګري لوبډلې ته ۱۴-۰ په توپیر ماتې ورکړه. د یادې لوبې لومړۍ پاڼۍ د افغانستان په ګټه د ۰-۷ په توپیر پای ته ورسېده.
د ملګرو ملتونو سرمنشي انتونیو ګوترېش یو ځل بیا په افغانستان کې د ښځو او نجونو پر زدهکړو بندیز ته په اشارې سره وویل، چې هغوی په سیستماتیک ډول له عامه ژوند څخه اېستل شوې دي. ګوترېش خبرداری ورکړ، چې د جنسیتي برابرۍ په برخه کې شاتګ مخ په زیاتېدو دی.
د ملګرو ملتونو د خوړو نړۍوال پروګرام اعلان کړی، چې په منځني ختیځ کې د روانې جګړې دوام او د سوداګرۍ او اقتصاد ګډوډېدل ښايي په نړۍ کې ۴۵ میلیونه نور کسان هم له سختې لوږې سره مخ کړي.
د پاکستان خراسان ډایري د سیمهییزو سرچینو له قوله راپور ورکړی، چې د خېبر پښتونخوا د شمالي وزیرستان ولسوالۍ کې ډیورنډ کرښې ته څېرمه په غلامخان بندر کې د وسلهوالو په برید کې پنځه پاکستاني سرتېري وژل شوي او درې نور ټپیان شوي دي.
د امریکا ولسمشر ډونالډ ټرمپ په سپینه ماڼۍ کې د یو لړ مراسمو پر مهال وویل، چې امریکا د ایران اسلامي جمهوري دولت «بشپړ ګنګس او متزلزل» کړی او دغه رژیم اوس درک کړې، چې اټومي وسلو ته لاسرسی نه شي موندلی.
د افغانستان پخواني ولسمشر حامد کرزي له سکاینیوز سره په یوې تازه مرکه کې ویلي، چې هغه د ښو اړیکو د جوړېدو لپاره شل ځله اسلاماباد ته د خپلې واکمنۍ پر مهال سفرونه کړي وو. هغه زیاته کړې، که په کابل هر څوک واکمن وي، نو پاکستان بیا هم ورسره ستونزې جوړوي.
په کابل کې د پاکستان د هوايي برید له امله د روږدو کسانو د درملنې په یوه مرکز کې د اور لګېدنې په پایله کې ځینې کورنۍ وايي، چې له یوې شپې او ورځې تېرېدو وروسته لا هم د خپلو خپلوانو له برخلیک څخه بېخبره دي.
د امریکا د استازو جرګې غړی کوري مېلز وايي، چې په افغانستان کې د سړک جوړونې پر پروژو سلګونه میلیونه ډالره لګول شوي، خو دغه پروژې هېڅ پایلې ته نه دي رسېدلي.
د پاکستان پوځ د دوشنبې شپې له خونړي برید وروسته یو ځل بیا د کابل ځینې برخې بمبار کړې دي. د کابل اوسېدونکو افغانستان انټرنشنل ته ویلي، چې پوځي جنګي الوتکو د چهارشنبې په ورځ د سهار شاوخوا ۲ بجې ځینې سیمې بمبار کړې دي. تر اوسه د دغو بمباریو دقیق ځایونه روښانه نه دي.
په افغانستان کې د ملګرو ملتونو د ښځو څانګې مشرې سوزن فرګوسن ویلي، چې په ایران کې د روانو جګړو او کړکېچ له امله افغان ښځې اړې شوې دي، چې له خپلو کورنیو سره بېرته افغانستان ته ستنې شي. هغې زیاته کړې، دا مېرمنې داسې مهال هېواد ته راستنېږي چې طالبانو پر ښځو سخت محدودیتونه لګولي دي.