هرات کې د طالبانو رسنیز دفتر وایي، په دغه ولایت کې د راستنو شویو کډوالو لپاره د یوه ښارګوټي د نومرو د وېش چارې پیل شوې دي. په هرات کې د طالبانو والي مولانا اسلام جار ویلي، د ښارګوټي د نومرو د وېش بهیر په عادلانه توګه مخته وړي او ورسره به د راستنو شویو کډوالو ستونزې هم اوارې شي.
د رزمي لوبو افغان لوبغاړی فرامرز محمد له خپل سیال رایان کمپبل سره لوبه کوي. فرامرز محمد له درې کلن ځنډ وروسته د راتلونکې لېندۍ میاشتې په ۱۵مه نېټه له خپل سکاټلنډي سیال سره د انګلستان په نیوکاسل ښار کې لوبه کوي.
د پاکستان د اطلاعاتو وزیر عطا تارړ ویلي، په ترکیه کې افغان طالبانو د مذاکراتو پرمهال منلې چې د افغانستان خاوره به نور د پاکستان پر ضد نه کاروي. هغه زیاته کړې، چې اسلاماباد ته اوس یو نوی فورم په لاس ورغلی؛ څو د ترهګرۍ په تړاو پهکې خپل شواهد وړاندې کړي.
د طالبانو د بهرنیو چارو وزارت درېیم سیاسي رییس ذاکر جلالي وايي، د افغانستان او پاکستان ترمنځ د استانبول د خبرو پایله د دواړو هېوادونو د دوه اړخیزو اړیکو راتلونکی ټاکي.
نړۍوالو مرستندویه ادارو د پنجشنبې په ورځ خبرداری ورکړی، چې د سوډان دارفور په الفاشر کې پراخ ظلمونه او جنايتونه شوي دي او خلک هڅه کوي چې خوندي ځایونو ته ولاړ شي. د ملګرو ملتونو امنیت شورا هم د پنجشنبې په ورځ پر یاد ښار وسلهوال برید وغانده.
نن (د اکټوبر ۳۱مه) د ښارونو نړۍواله ورځ ده. دغه ورځ له ۲۰۱۳ کال راهیسې نمانځل کېږي او موخه یې دا ده، چې د ښاري ژوند په اړه د مخ پر زیاتېدونکې لېوالتیا سربېره هغه ننګونو ته هم پام وشي چې په ښارونو کې د وګړو د ډېرېدو له امله رامنځته کېږي.
د جرمني لومړي وزیر فریدرېښ مېرڅ ویلي، چې ترکيه د اروپايي ټولنې نږدې شريک هېواد دی او غواړي له انقرې سره د ټرانسپورټ تر څنګ نورو برخو کې اقتصادي اړیکې لا پیاوړې کړي. هغه ترکیې ته د خپل لومړي سفر پر مهال دغه څرګندونې کړې دي.
د جرمني یوې محکمې پرېکړه کړې چې هغه افغان بریدګر، چې تېر کال یې په یوه برید کې یو ماشوم او یو منځني عمر سړی وژلي وو، باید د بند پر ځای د رواني درملنې مرکز ته واستول شي.
د ایران د بهرنیو چارو مرستیال وزیر کاظم غریب ابادي د پنجشنبه په ورځ ویلي، چې په افغانستان کې د بندونو جوړولو د کافي اوبو د ترلاسه کولو مخه نیولې ده. هغه د شهر ارا نیوز سره په یوه مرکه کې وویل، ایران د هلمند په تړون کې د ټاکل شوي مقدار په پرتله خورا ټیټ د اوبو حق ترلاسه کوي.
وال سټریټ ژورنال د امریکایي چارواکو له قوله راپور ورکوي چې د ټرمپ ادارې په وینزویلا کې د بریدونو لپاره د مخدره توکو د قاچاق لپاره کارول شوو نظامي تاسیسات په شمول نور اهداف په ګوته کړي دي.
د برتانیا پاچا چارلس له خپل کشر ورور شهزاده انډریو څخه ټول شاهي لقبونه واخیستل او هغه ته یې امر کړی چې د وینډسر ماڼۍ ته نږدې خپل شاهي استوګنځی خالي کړي. دا اقدام د انډریو د جنسي مجرم جیفري اپسټین سره د اړیکو له امله شوی.
د افغانستان د ۱۷ کلنو فوټسال ملي لوبډلې د ۲۰۲۵ کال د اسیایي ځوانانو د اتلولۍ په پایلوبه کې ایران لوبډلې ته ۲ پر ۱ ماتې ورکړه او د اسیا اتله لوبډله شوه. دا لوبه د بحرین په پلازمینه ماناما کې د خلیفه ورزشي لوبغالي کې ترسره شوه.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بینېټ، د ملګرو ملتونو عمومي اسمبلۍ ته په خپل تازه راپور کې ویلي، چې افغانستان دا مهال د نړۍ په کچه د جنسیتي برابرۍ پر وړاندې تر ټولو پراخ او منظم برید تجربه کوي.
د ترکیې او قطر په منځګړتوب د طالبانو او پاکستان د مزاکراتو په ګډه اعلامیه کې ویل شوي: «ټولو خواوو د اوربند د دوام پرېکړه وکړه» په اعلامیه کې راغلي، د سرغړونې پر مهال به د جریمې ټاکلو لپاره د څارنې او تصدیق یو ګډ میکانیزم جوړ شي.»
د قطر لومړي وزیر شیخ محمد بن عبدالرحمن ال ثاني په نیویارک کې د بهرنیو اړیکو د شورا په ناسته کې له نړیوالې ټولنې وغوښتل، چې د افغانستان د وضعیت د بدلون لپاره دې د بندیزونو پر ځای د تشویق تګلاره غوره کړي.
د طالبانو ویاند ذبیح الله مجاهد وايي، چې د استانبول په ناسته کې دوی د خپل دايمياصولي دريځ په رڼا کې د ديپلوماسۍ او تفاهم له لارې د ستونزو حل غوښتی. نوموړي ویلي، د نورو ګاونډيانو سره د ښو اړیکو په څېر د دوه اړخیز درناوي په چوکاټ کې له پاکستان سره هم مثبتي اړیکې غواړي.
د پاکستان د دفاع وزیر خواجه اصف ادعا کړې چې ګواکي په ترکیه کې طالب پلاوي ویلي، چې «ټي ټي پي» په اصل کې هغه پاکستاني کډوال دی چې اوس بېرته خپلو کورونو ته ستنېږي. نوموړي زیاته کړې، دا یو عجیبه منطق دی او دا توجیبه ښيې، چې افغانستان نیت سم نه دی.
د پښتون ژغورنې غورځنګ د مرکزې کمېټې غړی ذکیم خان وزیر وايي، چې نن مازدیګر علي وزیر د سند له سکهر زندان څخه نامعلوم ځای ته وړل شوی. هغه زیاته کړې، علي وزیر ته د زیان رسولو مسولین د سند حکومت او د پاکستان استخباراتي ادارې دي.
د اسراییل لومړي وزیر بنیامین نتنیاهو پر ایکس خواله رسنۍ په خپلو څرګندونو کې ویلي، چې د اسراییل دښمنانو زمونږ د ماتولو هڅه کوله خو پخپله له منځه لاړل.
د افغانستان لپاره د پاکستان پخواني ځانګړي استازي اصف دراني ویلي، چې طالبان دي د «ټي ټي پي» او پاکستان ترمنځ یو انتخاب کړي. هغه زياته کړې، دا ناممکنه ده، چې دوی دي هم له پاکستان سره ښه اړېکې وساتي او هم د پاکستاني طالبانو تحریک ملاتړ وکړي.
باخبره سرچینو ویلي، چې طالبانو په بدخشان کې د کانونو پخوانی رییس عبدالرحمان عمار په شهر بزرګ ولسوالۍ کې نیولی او کابل ته یې انتقال کړی دی. د یاد قوماندان کسانو په بدخشان کې د سرو زرو د یو کان پر سر په دغه ولایت کې د طالبانو له اوسني رییس سره وسله واله شخړه کړې وه.