د طالبانو د لوړو زده کړو وزیر ندا محمد ندیم د بلخ پوهنتون استادانو ته په وینا کې د ځوانانو پر روزنې ټینګار کړی او ویلي یې دي: «موږ مکلف یو چې ټولنې ته ژمن، متخصص، دینداره او په اسلامي اخلاقو سنبال کادرونه وړاندې کړو.»
د طالبانو د صنعت او سوداګرۍ مرستیال وزیر د چین له یوه چارواکي سره په لیدنه کې غوښتنه کړې، چې د افغان توکو لپاره په چينايي بازارونو کې مالیات کم کړي. احمدالله زاهد د چین د ګمرکونو د ادارې له مرستیال څخه وغوښتل، چې د افغان صادراتي توکو لپاره سخت معیارونه لرې کړي.
ډېپلوماټ ویب پاڼې د طالبانو د حکومت په اړه په یوې مقاله کې ویلي، د افغانستان طالبان چې څه کم څلور کاله وړاندې په نړۍواله کچه منزوي وو، اوس د درېیو اسیایي اټومي قدرتونو هند، پاکستان او چین له خوا د پخوانیو وسله والو سره د خپلو ډیپلوماټیکو اړیکو د لوړولو لپاره سیالي کوي.
واشنګټن پوسټ د لوړپوړو امریکایي او اروپایي چارواکو په حوالې راپور ورکړی، چې له اوکراین سره په جګړه کې د روسیې پوځي توان د کمېدو په حال کې دی.
هندي رسنیو د دې هېواد د چارواکو له قوله راپور ورکړی، چې نويډیلي له څلور کلن ځنډ وروسته افغانانو ته د ویزو ورکړې لړۍ بیا پيل کړې ده. د هندي چارواکو په خبره، افغانان په ځانګړې توګه پانګه وال، هنرمندان او لوبغاړي کولی شي د هند ويزې لپاره غوښتنه وکړي.
د سوریې د حکومت یوه پلاوي د کُردانو تر واک لاندې شمال ختیځ کې له هغه بدنام کمپ څخه لیدنه وکړه، چې پکې د داعش ډلې د شکمنو افراطیانو کورنۍ اوسېږي.
پاکستانۍ رسنۍ جیو نیوز د یوه حکومتي ویاند له قوله راپور ورکړی، چې په پنجاب کې د سختو بادونو او طوفانونو له امله پراخې ویجاړۍ رامنځته شوې دي، چې په ترڅ کې یې ۸ کسان وژل شوي او ۴۵ نور ټپیان دي. د راپور له مخې، زياته مرګژوبله د زوړو ودانیو د نړېدو له امله رامنځته شوې ده.
د اوکراین ولسمشر ولادیمیر زېلېنسکي د مې په ۲۴مه اعلان وکړ، چې د روسیې سره د بندیانو د تبادلې په دویم پړاو کې یې ۳۰۷ اوکرایني سرتېري له روسیې څخه بېرته هېواد ته راوستي دي.
د منظور احمد پښتین په مشرۍ د پښتون ژغورنې غورځنګ وایي، چې د ظلم او جبر په وړاندې به هېڅ وخت خپل خلک د وخت ظالمانو ته یوازې پرېنږدي.
د روسیې د بهرنیو چارو وزیر سرګي لاوروف د مې په ۲۳مه اعلان وکړ، چې مسکو به د روسیې او اوکراین ترمنځ د بندیانو د تبادلې له بشپړېدو وروسته سمدلاسه کییف ته د سولې خپل شرایط وړاندې کړي، کوم چې اوس مهال روان دی.
طالبانو په کندهار ولایت کې خلکو ته خبرداری ورکړی، چې ښځې دې د ویالو او سیندونو پر غاړه د کاليو او د کور د نورو توکو مینځلو لپاره نه پرېږدي. طالبانو د ښځو دا کار «د شریعت خلاف» بللی او زیاته کړې یې ده، چې د کالیو مینځلو پر مهال مېرمني خپل «حجاب مراعات کولی نه شي»
د بوینګ د الوتکو جوړوونکی شرکت د جمعې په ورځ د امریکا د عدلیې وزارت سره هوکړې ته ورسېد، چې له مخې به یې شرکت د ۱.۱ مېلیارده ډالرو تاوان ورکوي او له دې لارې به له جزایي تعقیب څخه ځان خلاص کړي.
د غزې د ملکي دفاع ادارې د شنبې په ورځ وویل، چې د سوېلي ښار په خان یونس کې د اسراییل په برید کې د ډاکټرانو د یوې واده شوې جوړې نهه ماشومان ووژل شول. د اسراییل پوځ ویلي، چې دوی د راپورونو بیا کتنه کوي.
په افغانستان کې د پرځېدلي جمهوري نظام د ولسمشر مرستیال عبدالرشید دوستم وايي، چې طالبان په شمالي ولایتونو کې په پراخ ډول د ځمکو غصب کړی او خلک يې په قومونو وېشلي دي. نوموړي په خپل اېکس کې لیکلي: «طالبان فتنه ګر دي او باید له منځه یوړل شي.»
د سوریې د لنډمهالي حکومت مشر احمد الشرع ترکیې ته په یوه ناڅاپي سفر کې د دغه هېواد له ولسمشر رجب طیب اردوغان سره وکتل. په دې لیدنه کې رجب طیب اردوغان د سوریې د بندیزونو د لرې کولو هرکلی وکړ.
د متحده ایالاتو په ټکزاس کې دوه پاکستاني الاصله کسان د درغلیو په تور نیول شوي دي. فډرالي ادارې ویلي، چې دغه دواړه پاکستانيان اوس تر پوښتنو لاندې دي.
د اسراییل زرګونو اوسېدونکو په تل ابیب او څو نورو ښارونو کې د دې هېواد د لومړي وزیر بنیامین نتنیاهو د استعفا غوښتنه وکړه. دوی په دغو لاریونونو کې له اسراییلي چارواکو دغه راز وغوښتل، چې د یرغمل شویو کسانو د خوشې کېدو په برخه کې هوکړه وکړي.
طالبانو په کابل او لغمان ولایتونو کې ۲۱ کسان د «نامشروع اړیکو، غلا، نشه یي توکو د پیر، پلور او قاچاق» په جرمونو په عام محضر کې په دُرو وهلي دي.
د ملګرو ملتونو سرمنشي انټونیو ګوترېش، د ملکي وګړو د مرګ ژوبلې په اړه یې اندېښنه ښودلې او وایي، ملکي خلک چې ماشومان هم پکې شامل دي لا هم د وسلوالو شخړو دروند بار تحملوي. هغه زیاته وي: «په ۲۰۲۴ کال کې، د ۱۴ شخړو په ترڅ کې له ۳۶ زرو زیات ملکي وګړي وژل شوي دي.
د برېتانیا یوې محکمې څلور کسان په سایبر سپیس کې د اعلانونو خپرولو او داعش ته د مالي ملاتړ په تور په بند محکوم کړل. محمد حماد په څلور کاله، ازاد ولي سعید په دولس کاله، احمد محمد په اووه کاله او عمر حسین احمدي په پنځه کاله او اووه میاشتې بند محکوم شول.
د ملګرو ملتونو سرمنشي، انټونیو ګوترېش ویلي چې د اسراییلي بریدونو د زیاتوالي او اوږدمهاله محاصرې له امله د غزې اوسېدونکي د قحطۍ تر څنډې رسېدلي او دا سیمه اوس د دې «ظالمې جګړې تر ټولو بد پړاو» ته داخله شوې ده.