د طالبانو تر واک لاندې د هواپوهنې ادارې خبر ورکړی، چې (د سلواغې تر ۵مې نېټې) د سالنګونو په ګډون د افغانستان په شمالختیځ، سوېلختیځ او مرکزي ولایتونو کې د تودوخې درجې د ټیټېدو اټکل شته. یادې ادارې د یخنۍ څپې پرمهال له خلکو د لازمو احتیاطي تدابیرو د نیولو غوښتنه کړې ده.
د امریکا ولسمشر ډونالډ ټرمپ ویلي، چې ولادیمیر پوتین د سولې بورډ سره د یو ځای کېدو لپاره خپله کنګل شوې شتمني کاروی. نوموړي ویلي:« که هغه خپلې پیسې کاروي دا ښه خبره ده. زما په اند ترټولو مهمه دا ده، چې په دغه بورډ کې ټول برخه واخلي».
د روزګان په مرکز ترینکوټ ښار کې د لومړي ځل لپاره د کورنیو تولیداتو درې ورځنی نندارتون پرانیستل شو. دغه نندارتون د کورنیو تولیداتو د ودې، ملاتړ او بازارموندنې په موخه جوړ شوی او صنعتکاران به په ۱۲۰ غرفو کې خپل توکي نندارې ته وړاندې کړي.
په نورستان کې د طالبانو د ټولګټو چارو ریاست خبر ورکړی، چې د درنې واورې له امله د نورستان-کونړ لویه لار د تګ راتګ لپاره تړل شوې ده. له تېرې ورځې راهیسې د سختې واورې له کبله له کابل څخه سویلي او شمالي ولایتونو ته تللې لارې هم تړل شوې دي.
په کاپیسا کې د طالبانو امنیه قوماندانۍ خبر ورکړی، چې د دغه ولایت په نجراب ولسوالۍ کې یې د یو لړ عملیاتو پر مهال وسلې، مهمات او نشهيي توکي کشف او ترلاسه کړي دي. یادې قوماندانۍ زیاته کړې، په دې تړاو یې هغه دوه کسان هم نیولي چې دغه توکي یې له پاکستان نه افغانستان ته راوړي وو.
د پاکستان په کراچۍ ښار کې د ګل پلازې په نوم په یوه سوداګریز مارکېټ کې د پراخې اورلګېدنې له امله د مړو شمېر ۶۷ ته رسېدلی، چې تر دې مهاله یوازې د ۱۷ کسانو جسدونه پېژندل شوي دي. که څه هم له یادې پېښې شاوخوا ۶ ورځې تېرېږي؛ خو لاهم ۷۷ کسان تري تم دي.
د ۲۰۲۶کال د ۱۹ کلنو کرېکټ نړۍوال جام ډلهییزو لوبو پړاو به په راتلونکو دوو ورځو کې پای ته ورسېږي او د څلورو ګروپونو د غوره لوبډلو برخلیک به وټاکل شي. تر دې دمه د افغانستان، هند او انګلستان لوبډلو د شپږو غوره لوبډلو پړاو ته لاره موندلې ده.
د سویډن د کډوالۍ وزیر ویلي، هغه افغانان چې د پناه غوښتنې قضیې یې رد شوي او یا جرمونو کې ښکېل دي، د پاسپورټونو د نشتوالي له امله یې اېستل «نږدې ناشوني» دي. نوموړي له اروپایي ټولنې غوښتي چې د دغو پناه غوښتونکو د هویتي او سفري اسنادو صادرولو په تړاو یوې هوکړې ته سره ورسېږي.
کرملېن ویلي، چې د ورسیې ولسمشر ولادیمیر پوتین له درېیو امریکايي استازو سره د اوکراین د جګړې د پای ته رسولو په اړه په لیدنه کې پر یوې نوې طرحې خبرې وکړې.کرملېن ویلي، چې دا خبرې د پنجشنبې په ورځ ناوخته (د سلواغې ۲مه) په مسکو کې شوې دي.
امریکا د پنجشنبې په ورځ (د سلواغې ۲مه) په رسمي ډول په روغتیا نړۍوال سازمان (WHO) کې خپل غړيتوب پای ته ورساوه. د ډونالډ ټرمپ حکومت د دې پرېکړې د توجیه لپاره ويلي، چې د ملګرو ملتونو اړوند دغه روغتيايي سازمان د کرونا وبا (کووېډ۱۹) د سم مديريت په برخه کې پاتې راغلی دی.
وال سټریټ ژورنال د امریکايي چارواکو له قوله راپور ورکړی، چې د امریکا حکومت له سوریې څخه د خپلو ټولو سرتېرو د اېستلو پر پلان کار پیل کړی دی. دا پرېکړه د سوریې ډیموکراتیک ځواکونو له پاشل کېدو وروسته تر بحث لاندې نیول شوې ده.
د مخکیني جمهوري نظام پر مهال د افغانستان د بشري حقونو خپلواک کمېسیون پخوانۍ رییسه شهرزاد اکبر وایي، د طالبانو تازه «جزایي اصولنامه» د افغانانو لپاره نوی دوزخ او وحشت دی. نوموړې وايي، په دې نوې کړنلاره کې لږکي، ښځې او ماشومان د سخت تاوتریخوالي ښکار دي.
د امریکا ولسمشر ډونالډ ټرمپ د ناټو پر متحدانو نیوکه کړې، چې افغانستان کې د دغه سازمان د غړو هېوادونو ځواکونه د «جګړې له لومړۍ کرښې شا ته او لرې» ځای پر ځای شوي وو؛ حال دا چې دغه ځواکونه د طالبانو پر وړاندې د متحده ایالتونو د پوځي عملیاتو د ملاتړ لپاره لېږل شوي وو.
د پاکستان تحریک انصاف ګوند د یوې اعلامیې په خپرولو سره د ډونالډ ټرمپ په مشرۍ له «سولې نړۍوال بورډ» سره د پاکستان حکومت د یو ځای کېدو پرېکړه غندلې ده. یاد ګوند پر شهباز شریف غږ کړی، چې ژر تر ژره دې په یاد بورډ کې د پاکستان ګډون لغوه کړي.
د پاکستان د جمعیت علمای اسلام مشر مولانا فضل الرحمان لهخوا پر شهباز شریف له سختو نیوکو وروسته د طالبانو اړوند رسنیو هم د ډونالډ ټرمپ له سولې پلاوي سره د پاکستان پر یو ځای کېدو سختې نیوکې کړې دي.
د روسیې ولسمشر ولادیمیر پوتین د چهارشنبې په ورځ په کرملېن ماڼۍ کې د فلسطین له ولسمشر محمود عباس سره د لیدنې پر مهال اعلان وکړ، چې د امریکا د ولسمشر ډونالډ ټرمپ هغه بلنه مني، چې لهمخې یې روسیه د «غزې د سولې بورډ» غړیتوب ترلاسه کوي.
شهزاده رضا پهلوي د پنجشنبې په ورځ د (سلواغې ۲مه) په یوه ویډیويي پیغام کې له بهر مېشتو ایرانيانو وغوښتل چې د اخوندي رژیم خلاف د زمري او لمر تر تاریخي بېرغ لاندې یو موټی پاتې شي او شخصي اختلات دې یوې خوا ته کړي.
ملګرو ملتونو ویلي، چې په غزه کې د ژوند کولو شرایط په بې ساري ډول خراب شوي او د غزې نږدې ۸۰ سلنه وګړي له سختې لوږې سره مخ دي. تر دې مخکې ګڼو نړۍوالو بشري بنسټونو هم په غزه کې د قحطۍ له رامنځته کېدو خبرداری ورکړی وو.
د طالبانو د مخابراتو او معلوماتي ټکنالوژۍ وزارت ویلي، چې په افغانستان کې شاوخوا ۲۶ میلیونه سیمکارټونه فعال دي، چې له دې شمېر څخه یې تر دې دمه ۲۴ میلیونه سیمکارټونه ثبت او راجسټر کړي دي.
د ایران ولسمشر مسعود پزشکیان او د ترکیې ولسمشر رجب طیب اردوغان د سیمې هېوادونو پر روان وضعیت او دوه اړخیزو اړیکو ټیلیفوني خبرې کړې دي. پزشکیان ویلي، د اسلامي امت دښمنان هڅه کوي چې د سیمې په هېوادونو کې د کړکېچونو پر رامنځته کولو سره ترهګري او نا امني خپره کړي.
په دوحه کې د طالبانو سفیر محمد سهیل شاهین په قطر کې د ماشومانو د ملاتړ او وسلهوالو شخړو لپاره د ملګرو ملتونو د سرمنشي د ځانګړي استازي د دفتر د تحلیل او عامه پوهاوي مرکز له مشر داود المصري سره کتلي او د ماشومانو د خوندیتوب په اړه یې خبرې کړې دي.