د طالبانو د عامې روغتیا وزارت مرستیال تېره اونۍ د روغتیا او درمل جوړونې په نندارتون کې د ګډون په موخه هند ته سفر کړی دی. هندي رسنیو راپور ورکړی، چې دا سفر د طالبانو د بهرنیو چارو وزیر امیرخان متقي د احتمالي سفر څخه مخکې ترسره شوی دی.
د پاکستان پوځ د یوې اعلامیې په خپرولو سره ویلي، چې د سپټمبر له ۱۰مې تر ۱۳مې نېټې په دوو جلاجلا عملیاتو کې ۳۵ وسلهوال او ۱۲ پاکستاني سرتیري وژل شوي دي. د پاکستان پوځ وژل شوي وسلهوال د هند ملاتړي بللي دي.
په ننګرهار کې ځايي سرچینو افغانستان انټرنشنل ته وویل چې په دغه ولایت کې د طالبانو د امربالمعروف ریاست نن له روغتیاپالانو دیني ازموینه اخلي. په دې ازمونه کې د خصوصي موسسو روغتیاپالان هم کډون لري.
راپورونه وايي چې د ترکیې یوه څارنوال د استانبول د یوې ناحیې د ښاروال په ګډون د مخالف ګوند د ۴۸ غړو د نیولو امر کړی دی.
د راپورونو لهمخې، د نیوزیلېنډ ترټولو لوی ښار اوکلېنډ کې زرګونو خلکو د فلسطین د ملاتړ په موخه لاریون وکړ. د دې لاریون تنظیموونکو ویلي چې شاوخوا ۵۰ زره خلک لاریون ته راغلي، خو پولیسو بیا دا شمېر ۲۰ زره ښودلی دی.
د طالبانو د احصایې او معلوماتو ادارې ویلي چې د تېرې زمري میاشتې د صادراتو ارزښت ۱۴۴.۹ مېلیونه او وارداتو ارزښت بیا یو مېلیارډ او ۱۹۵.۶ ډالرو ته رسېدلی دی.
د خېبرپښتونخوا د بېلابېلو سیمو د قومي مشرانو، دیني عالمانو او ځوانانو ترمنځ په جوړه شوې جرګه کې د دغه ایالت د پراخې ناامنۍ په تړاو اندېښنه ښودل شوې او ټینګار شوی چې د دې کشالې د حل لپاره باید له افغان طالبانو سره مذاکرات وشي.
نړۍوالې رسنۍ وايي چې د امریکا د بهرنیو چارو وزیر مارکو روبیو د روانې اوونۍ په پای کې د منځنيختیځ ملګرو ترمنځ د کړکیچ په لړ کې اسرايیل ته ځي. روبیو داسې مهال دا سفر کوي چې څو ورځې مخکې اسرايیل په قطر کې د حماس د مشرانو پر غونډې برید وکړ.
د طالبانو تر واک لاندې باختر اژانس خبر ورکړی چې تېره ورځ له ایران او پاکستان نه یو زرو او ۱۰۲ کورنۍ افغانستان ته ستنې شوې دي. له دې ډلې ۷۳۷ کورنۍ د تورخم او سپین بولدک له لارې او ۳۶۵ بیا د اسلامکلا او ورېښمو پر پله افغانستان ته دننه شوې دي.
د پولنډ امنیتي ځواکونو یو افغان نیولی چې د اروپايي ټولنې پولیسو تر څار لاندې و. پر نوموړي دا تور دی چې له بېلاروس څخه یې د پولنډ سرتېرې په ډبرو او فلزي پایپونو ویشتل. هغه څو پولهساتي ټپيان کړي او یو موټر یې هم ویجاړ کړی دی.
د طالبانو د کرنې او اوبو لګونې وزارت وايي، اوس مهال په افغانستان کې د شاتو مچیو ۳ زره او ۲۰۰ فارمونه فعال دي چې هر کال ۲ زره او ۲۰۰ مټریک ټنه شات تولیدوي. نوموړي وزارت ویلي چې د دغه سکټور لا پراختیا لپاره هڅې روانې دي.
د شمالي کوریا ولسمشر کېم جونګ اون وايي چې راتلونکي ګوندي کنګرې ته به د هېواد اټومي وسلو او دودیز پوځي ځواک د ګډ پرمختګ تګلاره وړاندې کړي.
د طالبانو د بلخ امنیه قوماندانۍ ویلي چې پرون د یو سراچه موټر په ټکر کې یو کس مړ شوی او څلور نور ټپيان شوي دي. ورته مهال، د یادې ډلې د سمنګان امنیه قوماندانۍ ویاند بیا لیکلي چې تېره شپه د موټر په چپه کېدو کې ۲ مسافر مړه او دوه نور ټپيان شوي دي.
د اتريش په وېنا ښار کې د فارسي ژبې او کلتور د درناوي څلورم ګډ جشن د ګڼ شمېر ډېپلوماټانو، فرهنګي څېرو او د نړۍوالو بنسټونو د استازو په ګډون ونماځل شو. دغه پروګرام د افغانستان، ايران او تاجکستان د سفارتونو او سياسي استازولیو په کوربهتوب او د «سوسايټي مګزين» په همکارۍ جوړ شو.
د طـالبانو له پېښو سره د مبارزې چمتووالي ادارې ویلي چې د نوموړې ادارې مشر نورالدین ترابي کونړ ولایت ته سفر وکړ او هلته یې د مالیزیا د طبي مرستو ټولنې له اجراییوي مدیر سره ولیدل.
د طالبانو ریاست الوزرا رسنیز دفتر خبر ورکړی چې د دغې ډلې اداري مرستیال عبدالسلام حنفي د فاریاب ولایت شیرین تګاب ولسوالۍ ته سفر کړی او هلته ځايي اوسېدونکو له نوموړي سره خپلې ستونزې شریکې کړې دي.
نړۍوالې رسنۍ وايي چې د روسیې د کمچاتکا سیمې ختیځ ساحل ته نږدې ۷.۴ درجې زوروره زلزله شوې او په ځمکه کې یې ژوروالی ۳۹.۵ کیلومتره ښودل شوی دی.
په اسلاماباد کې د طالبانو سفارت خبر ورکړی چې د خېبرپښتونخوا سر وزیر علي امین ګنډاپور د خپلې ایالتي کابینې د یو شمېر غړو په ملتیا د دغې ډلې سفارت ته ورغلی او هلته یې د ختیځو ولایتونو زلزلهځپلو په تړاو خپله غمرازي شریکه کړې ده.
د تاجکستان د بهرنیو چارو وزارت خبر ورکړی چې د شانګهای سازمان غونډې ته په ورته بڼه د نوموړي سازمان غړو هېوادونو په پلازمېنه دوشنبه کې دوه ورځنۍ غونډه وکړه.
له پاکستان نه د کډوالو د اېستلو د درېیم پړاو پیل سره سم، د ملګرو ملتونو د کډوالو عالي کمېشنرۍ له دغه هېواد نه غوښتي چې د نړۍوال خوندیتوب له مخې دې د افغانانو د اېستل کېدو بهیر ودروي. دغه سازمان وایي چې د اېستل کېدونکو افغانانو له ډلې ځینې یې افغانستان کې له ګواښ سره مخ کېږي.
د طالبانو برېښنا شرکت خبر ورکړی چې د نوموړي شرکت مشر ډاکټر عبدالباري عمر او ورسره مل پلاوي په متحده عربي اماراتو کې د «جياېسیو» شرکت له مشر سره لیدلي دي.