د پاکستان مرستیال صدراعظم اسحاق ډار د پنجشنبې په ورځ اعلان وکړ چې د هند او پاکستان پوځونو د تېرې اونۍ اوربند د یکشنبې تر ورځې، د مې ۱۸مې پورې غځولی دی. ډار ټینګار وکړ چې پاکستان د اوربند غوښتنه نه ده کړې.
هغه د پنجشنبې په ورځ د پاکستان مشرانو جرګې ته په وینا کې وویل چې دا غځېدنه د سیاسي خبرو لپاره لار هواروي.
ډار وویل: «اوس دا [اوربند] تر [مې] ۱۸ پورې غځېدلی، نو ښکاره ده چې بالاخره به خبره خبرو اترو ته لاړه شي».
هغه زیاته کړه، چې دا مهال د دواړو هېوادونو ترمنځ پوځي-پوځي خبرې دي، نو بیا به سیاسي خبرې هم وشي.
ډار ټینګار وکړ چې پاکستان د اوربند غوښتنه نه ده کړې. هغه ادعا وکړه چې د اوربند په اړه لومړۍ اړیکه د امریکا د بهرنیو چارو وزیر ونیوله او ویې ویل چې هند اوربند غواړي.
نوموړي وویل، چې پاکستان اوربند ته هغه وخت رضایت وښود چې ورته ورته غوښتنې له سعودي عربستان، ترکیې او چین څخه هم ورسیدې.
هغه زیاته کړه: « موږ له شخړې مخکې له خپلو دوستو هېوادونو سره په تماس کې وو. موږ هغوی ته خپل زغم ښکاره کړ او واضحه مو کړه چې که څه هم موږ جګړه نه پېلوو، خو د هند هر ډول تېری به له پیاوړي غبرګون سره مخ شي».
