د خیبر پښتونخوا په اورکزۍ ولسوالۍ کې د امنیتي پېښو له ډېرېدو سره سږکال د لوی اختر پر مهال د سیلانیانو شمېر کم شوی و. په سیمه کې له شپږو میاشتو راهیسې انټرنېټ هم بند دی چې زده کوونکي او د سیمې اوسېدونکي یې له سختو ستونزو سره مخ کړي.
په سمنګان ولایت کې د طالبانو د بدني روزنې او سپورټ امریت وايي چې د غیږنیونې په یو ورځنیو سیالیو کې د کندز، بغلان، جوزجان، بلخ او سمنګان ولایتونو ۶۰ ورزشکارانو ګډون کړی و. سمنګان په دغو سیالیو کې بریالی ولایت اعلان شوی.
طالبانو په خوست ، پکتیا او پکتیکا ولایتونو کې پر ډیورنډ کرښه خپلو امنیتي پوستو ته د خندقونو د کېندلو چارې پیل کړې دي. سرچینو افغانستان انټرنشنل ته وویل، چې دغه خندقونه په ځاځي میدان، علیشیرو، ګوربزو، تڼیو او سپیره ولسوالۍ کې پیل شوي او په نورو ولایتونو کې هم په پلان کې دي.
د طالبانو تر واک لاندې د دولتي شرکتونو مسوولان وايي، د بغلان ولایت په تاله برفک ولسوالۍ کې د ډبرو سکرو له یوه تازه کشف شوي کان څخه د سکرو د استخراج چارې پیل شوې دي.
د طالبانو د چارو ادارې رییس نورالحق انور د طالبانو اداره او د هغوی کړنې د ابراهیم ع او د اسلام د نورو پیغمبرانو له لارې سره تشبېه کړې دي او ادعا کوي چې د طالبانو اداره د نبیانو په پلونو روانه ده.
د طالبانو د نیمروز ولایت د فرعي ګمرکونو ریاست وایي، ګرځنده ډلې یې توانېدلې د یاد ولایت په چهار برجک ولسوالۍ کې نږدې یو ټن او ۹۰۰ کیلوګرامه قاچاقي درمل ونیسي. یاد ریاست وايي، قاچاق وړونکو غوښتل دغه درمل له پاکستان نه افغانستان ته په غیرقانوني ډول وارد کړي.
د طالبانو د غزني ولایت د اندړو ولسوالۍ د امربالمعروف امریت محتسبانو د سردې بند تفریحي سیمې ته ورغلو سېلانیانو سخه دریاوې او ځینې نور تفریحي توکي اخیستي دي. ځینو سېلانیانو ویلي، چې طالبانو دې سیمې ته د اختر په ورځو کو د مېرمنو د ورتګ مخه هم نیولې وه.
کابل ښاروالی ویلي، چې د عرفې د ورځې او لوی اختر په دریو ورځو کې یې د کابل ښار له بېلابېلو برخو څخه ۴۶۵۳ ټنه خځلې راټولې کړې دي. ښاروالۍ له ښاریانو څخه د ښار په پاک ساتلو کې د همکارۍ غوښتنه کړې ده.
د جرمني د تورینګن ایالت په زونبرګ ښار کې یو۳۳ کلن افغان پناه غوښتونکی، چې څو اونۍ وړاندې یې په وسپنیزې میلې پر پولیسو او یوې هټۍ برید کړی و، محکمې ته وړاندې کېږي.
د افغانستان د اتومي انرژۍ په اداره کې سرچینو افغانستان انټرنشنل ته وویل، چې ددې ادارې کارکوونکو ته طالبانو شرایط سخت کړي دي. طالبانو په دې اداره کې د ارشاد او دعوت یو ریاست هم فعال کړی او دفتر یې هم له پخواني ځای څخه لېږدولی دی.
بلخ کې د طالبانو امنیه قومانداني وایي، د لوی اختر په ورځو او شپو کې د مزارشریف ښار او د دغه ولایت په بېلابېلو ولسوالیو کې ۱۸ ترافیکي پېښې رامنځته شوې دي چې پکې شپږ کسان وژل شوي دي.
د هلمند په نهرسراج ولسوالۍ کې یو کس د خپل کلي د جومات ملا امام له دې امله د چاقو په برید کې ټپی کړی چې دده د کوکنارو کروندې یې د طالبانو د کوکنارو له منځه وړو کمپاین ته ورښودلې وې. د طالبانو د یاد کمپاین غړو د نوموړي کس د کوکنارو کروندې له منځه وړې دي.
د طالبانو د کور او ښار جوړونې وزارت وایي، په درېیو ولایتونو ننګرهار، فاریاب او سمنګان کې یې ۵۳۰ راستنېدونکو کډوالو کورنیو ته استوګنیزې نمرې وېشلې دي.
د ایران په مشهد ښار کې د طالبانو تر ادارې لاندې د افغانستان کونسلګرۍ ویلي، چې د دغه هېواد لپاره د طالبانو جنرال کونسل نورمحمد متوکل د خراسان رضوي له والي غلامحسین مظفري سره د افغان کډوالو، ترانزیټي ستونزو، د افغان بندیانو د لېږد او سوداګریزو اړیکو په اړه خبرې کړې دي.
د خېبر پښتونخوا ایالت د هنګو ولسوالۍ په کوټکي سیمه کې څلور افغان ماشومان د اوبو په یوه ډنډ کې د ډوبېدو له امله مړه شوي او یو بل ماشوم ژغورل شوی دی.
د ۲۰۰۹ کال په جون کې د امریکايي ځواکونو د بلک فوټ کمپنۍ د دویم کنډک سرتېرو د پکتیکا ولایت د یوسف خېلو ولسوالۍ د میست څارونکې پوستې لپاره دفاعي خنډونه جوړول، اغزن سیم یې غځاوه اوله جالیو جوړ خنډونه یې له تېږو او خاورې ډکول.
طالبان وایي د لوی اختر په ورځو کې د کاپیسا او پنجشیر ولایتونو له تفریحي سیمو شاوخوا ۱۸۸ زره سیلانیانو لیدنه کړې ده.
د بلوچستان په بېلابېلو سیمو کې د ډزو، تاوتریخوالي او ټرافیکي پېښو له امله لږ تر لږه شپږ کسان وژل شوي او ۱۵ نور ټپیان شوي دي. د پولیسو او ځايي سرچینو په وینا، دغه پېښې په مکران، چمن، کوټه، ډېره بګټي، ګوادر او زیارت ولسوالیو کې رامنځته شوې دي.
د افغانستان د ازادۍ جبهې ادعا کړې چې ځواکونو یې د بدخشان ولایت د بهارک ولسوالۍ په مربوطاتو کې د طالبانو پر یوه کندک راکټي برید کړی او تر شلو دقیقو یې ورسره نښه کړې ده.
د خیبر پښتونخوا د روغتیا چارواکي وايي، د پېښور د ۳۰۰ بستره ماشومانو تخصصي روغتون پرانیسته د مالي ستونزو له امله تر اوسه نه ده شوې او د ځنډ سره مخ ده.
په غزني ولایت کې د طالبانو امنیه قومانداني وایي، د لوی اختر په ورځو کې د دغه ولایت په مرکز او بېلابېلو ولسوالیو کې ۳۴ټرافیکي پېښې رامنځته شوې دي له امله یې درې کسان مړه او ۳۴ نور ټپیان دي.