د طالبانو د صنعت او سوداګرۍ وزارت او سیکارام احمدي بازارموندنې شرکت په همکارۍ د نیمروز ولایت په زرنج ښار کې د کورنیو تولیداتو درې ورځنی ملي نندارتون پیل شو، چې پهکې د خوراکي توکو، صنعتي تولیداتو، لاسي صنایعو او درملو محصولات نندارې ته وړاندې شوي.
د فلسطین روغتیا وزارت خبر ورکړی، چې د اکټوبر له لسمې نېټې د اوربند له پیل راهیسې تر اوسه پر غزې د اسراییل په بریدونو کې لږترلږه ۴۶۴ فلسطینیان وژل شوي او ۱۲۷۵ نور بیا ټپیان شوي دي. د راپور له مخې؛ یوازې د اکټوبر په ۱۹مې او ۲۹مې نېټې بریدونو کې ټولټال ۱۵۴ کسان وژل شوي دي.
د پاکستان ډان ورځپاڼې راپور ورکړی، چې په دغه هېواد کې د تازه مېوو سوداګر له ګڼو ستونزو سره مخ دي او پر ډیورنډ تړلو لارو او پر تهران د بندیزونو ګواښ د کینو صادرات په ټپه درولي دي. راپور زیاتوي، د افغانستان له لارې دغه مېوه روسیې ته په ۹ورځو او د ایران له لارې په ۲۵ورځو کې رسېده.
په بلخ کې د طالبانو د صنعت او سوداګرۍ ریاست وایي، د روان کال له پیل راهیسې په دغه ولایت کې ټولټال ۸۵۶ سوداګریز او صنعتي جوازونه وېشل شوي چې له دې ډلې ۲۸۴ نوي او پاتې ۵۷۲ نور تمدید شوي جوازونو دي.
د چیلي په سوېل کې د ځنګلونو پراخې اورلګېدنې لږترلږه ۱۸ کسان مړه او ۲۰زره نور بېځایه کړي دي. د چیلي د ځنګلونو ادارېCONAF په وینا؛ د چیلي په ۲۴ بېلابېلو سیمو کې د اورلګېدنې پېښې راپور شوې، چې تر ټولو لویې یې د نوبل او بایو بایو په سیمو کې وې.
د طالبانو تر کنټرول لاندې د کډوالو ستونزو ته د رسېدنې عالي کمېسیون راپور ورکړی، یوازې د یکشنبې په ورځ د افغانستان له بېلابېلو لارو نږدې ۲۰۴۸ افغانان اړ اېستل شوي چې افغانستان ته ستانه شي. طالبان وایي دغه کډوالو سره یې په بېلابېلو برخو کې مرستې کړې دي.
د اسراییل پوځ د یکشنبې په ورځ اعلان وکړ، چې د لاکهېډ مارټین شرکت درې اېف-۳۵ جنګي الوتکې د ناواتیم هوايي اډې ته ښکته شوې دي. اسراییل ټایمز اف ورځپاڼې راپور ورکړی، چې دغه اقدام د اسراییل د غوښتنې له مخې شوی او د ایران له روان کړکېچ سره هیڅ تړاو نهلري.
د پاکستان د کراچۍ ښار په ګل پلازه کې اورلګېدنه له ۳۳ ساعتونو وروسته مهار شوې، چې د ژغورنې عملیاتو پر مهال ۸ نور مړي هم موندل شوي دي. امنیتي چارواکو ویلي، چې په دې پېښه کې ۱۴ کسان مړه او ۲۲ نور ټپيان شوي دي.
په داسې حال کې چې په پاکستان او ایران کې د افغان کډوالو د نیولو او جبري ستنولو لړۍ په بېساري ډول پراخه شوې؛ طالبان وايي، یوازې په تېرو شپږو میاشتو کې تر یو مېلیون او ۷۰۰زره ډېر افغانان له پاکستان او ایران نه افغانستان ته ستانه شوي دي.
په بغلان کې د طالبانو د احصايې او معلوماتو ریاست خبر ورکړی، چې د روان کال په لړ کې د دغه ولایت اوسېدونکو ته شاوخوا ۴۴زره برېښنايي او ۲۹زره کاغذي پېژندپاڼې وېشل شوې دي. د یاد ریاست په وینا؛ په دغه ولایت کې د پېژندپاڼو د وېش لړۍ لاهم روانه ده.
د سوریې حکومت اعلان کړی، چې د کُردانو تر مشرۍ لاندې د سوریې ډېموکراټیکو ځواکونو سره یې د سملاسي اوربند تړون لاسلیک کړی دی. د هوکړې له مخې؛ د دغه هېواد په شمالختیځ کې د څو ولایتونو کنټرول بېرته مرکزي حکومت ته سپارل کېږي او کُردي ځواکونه به په دولتي او امنیتي بنسټونو کې مدغم شي.
د طالبانو د امربالمعروف وزارت ویاند سیف الاسلام خیبر د یکشنبې په ورځ د هرات پوهنتون د طب پوهنځي د زدهکړیالانو د فراغت په مراسمو کې د دغه وزارت د وسلهوالو محتسبانو د مداخلې او د زدهکړیالانو د نېکټایونو له لرې کولو خبرې دفاع وکړه.
د خیبر پښتونخوا د کرک ولسوالۍ په صابر اباد سیمه کې تر «کورنۍ شخړې» وروسته د ناپېژاندو وسلهوالو په ډزو کې د دوو ښځو او ماشومانو په ګډون د یوې کورنۍ شپږ غړي وژل شوي دي.
په دایکنډي کې د طالبانو د امنیې قوماندانۍ ویاند صدیق الله صدیقي خبر ورکړی، چې د دغه ولایت په میرامور ولسوالۍ کې د یوې ټرافیکي پېښې له امله یو کس مړ او ۹ نور ټپیان شوي دي. د هغه په وینا؛ د یادې پېښې ټپیان د درملنې لپاره روغتون ته لېږدول شوي دي.
د افغانستان د فوټسال ملي لوبډلې روزونکي مجید مرتضایي د ویتنام په وړاندې په دوستانه لوبه کې د خپلې لوبډلې له بریا وروسته د لوبغاړو له ښه لوبېدو خوښي څرګنده کړه او ټینګار یې وکړ، چې افغان لوبډله د ۲۰۲۶کال د اسیا جام فوټسال سیالیو لوړو پړاوونو ته د رسېدو وړتیا لري.
د «افروتروس» په نوم یوې هالندۍ شبکې د «له طالبانو ور هاخوا هیلا» مستند په هرات کې د طالبانو له لوري د یوې ټکواندو کارې خدیجه احمدزاده له نیول کېدو وروسته له خپلو شبکو حذف کړ. دغې شبکې ویلي، دا پرېکړه د هغو ښځو د خوندینې لپاره شوې چې په یاد مستند کې ونډه لري.
د ننګرهار ولایت لپاره د طالبانو د امنیه قومندانۍ مسوولین وايي، دغه کس یې د یکشنبې په ورځ (د مرغومي ۲۸مه) د جلالاباد ښار له اوومې امنیتي حوزې له شاوخوا سیمو له ۴۱۲۳ زیکب تابلیتونو سره نیولی دی.
د افغانستان د کرېکټ ملي لوبډله د ۲۰ اوریزو نړۍوالو سیالیو په ترڅ کې د ویسټانډیز لوبډلې پر وړاندې میدان ته ځي. د دغه سریز لومړۍ لوبه سبا د دوبۍ په نړۍوال کرېکټ لوبغالي کې ترسره کېږي. د افغانستان کرېکټ بورډ اعلان کړی، چې دا لوبه به د کابل پر وخت ماښام اووه بجې پیل شي.
د فراه ولایت لپاره د طالبانو له پېښو سره د مبارزې چمتووالي ریاست په بکواه او ګلستان ولسوالیو کې د وروستیو سېلابونو له امله د یکشنبې په ورځ (د مرغومي ۲۸مه) پر ۷۰۹ زیانمنو کورنیو له سروې وروسته یو شمېر خوراکي او غېرخوراکي توکي ووېشل.
د جرمني د بهرنیو چارو وزیر یوهان وادیفول وایي، د ترهګریزې ډلې په توګه د سپاه پاسداران د اعلانولو وخت رسېدلی دی.
د طالبانو د چاپېریال ساتنې ادارې او اکسس پواینټ (Access Point) مشورتي او مالي شرکت ترمنځ د ۱۵۰ زره ډالرو په ارزښت د چاپېریالي او اقلیمي بدلون اړوند پروژې د تطبیق په موخه یوه هوکړه لاسلیک شوه. دا پروژه د یواېنډيپي له لوري تمویلېږي او د ۶ میاشتو موده کې به په کونړ کې تطبیق شي.