آرشیف

د شمالي کوریا ولسمشر کېم جونګ اون وايي چې راتلونکي ګوندي کنګرې ته به د هېواد اټومي وسلو او دودیز پوځي ځواک د ګډ پرمختګ تګلاره وړاندې کړي.

د طالبانو د بلخ امنیه قوماندانۍ ویلي چې پرون د یو سراچه موټر په ټکر کې یو کس مړ شوی او څلور نور ټپيان شوي دي. ورته مهال، د یادې ډلې د سمنګان امنیه قوماندانۍ ویاند بیا لیکلي چې تېره شپه د موټر په چپه کېدو کې ۲ مسافر مړه او دوه نور ټپيان شوي دي.

د اتريش په وېنا ښار کې د فارسي ژبې او کلتور د درناوي څلورم ګډ جشن د ګڼ شمېر ډېپلوماټانو، فرهنګي څېرو او د نړۍوالو بنسټونو د استازو په ګډون ونماځل شو. دغه پروګرام د افغانستان، ايران او تاجکستان د سفارتونو او سياسي استازولیو په کوربه‌توب او د «سوسايټي مګزين» په همکارۍ جوړ شو.

د طـالبانو له پېښو سره د مبارزې چمتووالي ادارې ویلي چې د نوموړې ادارې مشر نورالدین ترابي کونړ ولایت ته سفر وکړ او هلته یې د مالیزیا د طبي مرستو ټولنې له اجراییوي مدیر سره ولیدل.

د طالبانو ریاست الوزرا رسنیز دفتر خبر ورکړی چې د دغې ډلې اداري مرستیال عبدالسلام حنفي د فاریاب ولایت شیرین تګاب ولسوالۍ ته سفر کړی او هلته ځايي اوسېدونکو له نوموړي سره خپلې ستونزې شریکې کړې دي.

نړۍوالې رسنۍ وايي چې د روسیې د کمچاتکا سیمې ختیځ ساحل ته نږدې ۷.۴ درجې زوروره زلزله شوې او په ځمکه کې یې ژوروالی ۳۹.۵ کیلومتره ښودل شوی دی.

په اسلام‌اباد کې د طالبانو سفارت خبر ورکړی چې د خېبرپښتونخوا سر وزیر علي امین ګنډاپور د خپلې ایالتي کابینې د یو شمېر غړو په ملتیا د دغې ډلې سفارت ته ورغلی او هلته یې د ختیځو ولایتونو زلزله‌ځپلو په تړاو خپله غمرازي شریکه کړې ده.

د تاجکستان د بهرنیو چارو وزارت خبر ورکړی چې د شانګهای سازمان غونډې ته په ورته بڼه د نوموړي سازمان غړو هېوادونو په پلازمېنه دوشنبه کې دوه ورځنۍ غونډه وکړه.

له پاکستان نه د کډوالو د اېستلو د درېیم پړاو پیل سره سم، د ملګرو ملتونو د کډوالو عالي کمېشنرۍ له دغه هېواد نه غوښتي چې د نړۍوال خوندیتوب له مخې دې د افغانانو د اېستل کېدو بهیر ودروي. دغه سازمان وایي چې د اېستل کېدونکو افغانانو له ډلې ځینې یې افغانستان کې له ګواښ سره مخ کېږي.

د طالبانو برېښنا شرکت خبر ورکړی چې د نوموړي شرکت مشر ډاکټر عبدالباري عمر او ورسره مل پلاوي په متحده عربي اماراتو کې د «جي‌اېس‌یو» شرکت له مشر سره لیدلي دي.

نړۍوالې رسنۍ وايي، د کانګو ډېموکراټیک جمهوریت لوېدیځ کې یوې کښتۍ په سیند کې اور اخیستی چې له امله یې لږترلږه ۱۰۷ مسافر مړه شوي دي.

په داسې حال کې چې د طالبانو تر کنټرول لاندې افغانستان هره ورځ د هدفي او مرموزو وژنو، غلاوو او نورو وسله‌والو پېښو شاهد دی، د متحده ایالتونو ولسمشر ډونالډ ټرمپ ادعا کوي چې دغه هېواد اوس مهال د امریکا تر شیکاګو ښار ډېر خوندي دی.

د ټایوان لوړپوړي چارواکي په واشنګټن کې ویلي چې چین د ټایوان نیولو لپاره چمتوالی نیسي. د هغه په وینا، که چین دا ټاپو ونیسي پر سیمه به ناوړه اغېزې ولري او د امریکا د امنیت لپاره به لوی ګواښ وي.

د اوراکل شرکت بنسټګر «لری الیسون» ۳۷۱ میلیارد او ۷۰۰ میلیونه ډالرو په شتمنۍ په لرلو سره یو ځل بیا د نړۍ د شتمنو کسانو د نوملړ په سر کې ځای پر ځای شوی دی. د راپورونو له مخې، د ده شتمني د «کلوډ» قراردادونو او مصنوعي ځیرکتیا په برخه کې د پانګونې له امله په بې‌ساري ډول لوړه شوې ده.

په جرمني کې دوو افغان کډوالو، عباس بصیر (د افغانستان د لوړو زده کړو وزارت پخوانی وزیر) او حکیم رضايي په «پولهایم» او «بورکن» ښارونو کې سیمه ییزو شوراګانو لپاره ځانونه نوماند کړي دي. عباس بصیر له درېیو کلو او حکیم رضايي له لسو کلونو راهیسې په جرمني کې ژوند کوي.

د افغانستان د خبریالان مرکز وايي، بلخ لپاره د طالبانو له ځايي مسوولینو سره پر وېډیویي مرکو د بندیز له اعلان وروسته د دوی په امر د دغه ولایت د «ملي ټلویزیون»نشرات ودرول شول او یوازې «ملي راډيو» فعالیت لري.د دغه مرکز په وینا، بلخ ۲۱م ولایت شو چې دا بندیز په کې په رسمي ډول اعلانېږي.

ټاکل شوې چې نن شنبه به د قطر لومړی وزير محمد بن عبدالرحمن ال ثاني امريکا ته ولاړ شي او هلته د امريکا له ولسمشر ډونالډ ټرمپ سره د اسراييل د وروستي بريد په اړه خبرې وکړي.

د کډوالو لپاره د ناروې شورا «این ار سي» عمومي منشي «یان اېګلند» ټینګار کړی، چې د نړیوالو مرسته کوونکو له‌خوا بېړنۍ او انعطاف‌ منونکې بودجه د ختیځ افغانستان زلزله‌ځپلو خلکو د ژغورنې او مرستې لپاره اړینه ده.

په نیپال کې د اعتراضونو له دوام سره هم مهاله چې تر اوسه یې له امله ۵۱ کسان وژل شوي، رسنیو او مدني ټولنې په دغه هېواد کې د پاچاهۍ د بېرته راګرځېدو په تړاو بحثونه پیل کړي دي.

د سعودي عربستان بهرنیو چارو وزارت د «نیویارک له اعلامیې» د ملاتړ په برخه کې د ملګرو ملتونو د عمومي اسمبلۍ د پرېکړه لیک له تصویبېدو او د دوو خپلواکو هېوادونو (فلسطین او اسراییل) په تړاو له ضمیمو هرکلی وکړ.

په غزه کې روغتیایي سرچینو ویلي، چې د اسرایلي ځواکونو په نننیو بریدونو کې لږ تر لږه ۶۵کسان وژل شوي دي. د وژل شویو په ډله کې ۱۴ تنه د یوې کورنۍ غړي دي.